கோடைவிடுமுறையில் சிறப்பு நீதிமன்றம்: லீவு எடுக்காமல் பணிக்கு வரும் நீதிபதிகள்

சென்னை உயர்நீதிமன்றம் மற்றும் உயர்நீதிமன்றம் மதுரை கிளை
ஆகியவற்றுக்கு 1.5.17 முதல் 31.5.17 வரை கோடை விடுமுறை
அறிவிக்கப்பட்டுள்ளது.

அவர்களுக்கு இன்னும் ஒரு சில தினங்களில் கோடை விடுமுறை
தொடங்குகிறது. கோடைவிடுமுறையில் வாரத்துக்கு இரண்டு
அல்லது மூன்று நாட்கள் மட்டுமே நீதிமன்றம் செயல்படும்.

இரண்டு அல்லது மூன்று நீதிபதிகள்தான் பணிக்கு வருவார்கள்.
அவசர முக்கியத்துவம் வாய்ந்த வழக்குகள் மட்டுமே கோடை
விடுமுறை அமர்வுகளில் விசாரிக்கப்படும்.

நாடு முழுவதும் உச்சநீதிமன்றத்தில் இருந்து உயர்நீதிமன்றங்கள்
அனைத்திலும் இதுதான் பொதுவான நடைமுறை.
ஆனால், கோடைவிடுமுறை நாட்கள் மாறுபடலாம்.

இந்த ஆண்டு கோடைவிடுமுறையில் ''உச்சநீதிமன்றமும்
உயர்நீதிமன்றங்களும் கோடைவிடுமுறை நீதிமன்றத்தோடு
சிறப்பு நீதிமன்றங்களையும் அமைத்து செயல்பட வேண்டும்.

அதில், மிகவும் முக்கியமான சிறப்புமிக்க வழக்குகளை விசாரிக்க
முன்னுரிமை தர வேண்டும்' என்று உச்சநீதிமன்றம் சமீபத்தில்
கேட்டுக் கொண்டது. ஒவ்வொரு மாநில உயர்நீதிமன்றங்களும்
இதற்கு முன்னுரிமை தர வேண்டும் என்று கேட்டுக் கொண்டது.

அதன்படி, சென்னை உயர்நீதிமன்றம் மற்றும் உயர்நீதிமன்றம்
மதுரைக் கிளை ஆகியவற்றில் கோடை விடுமுறை நீதிமன்றத்தோடு
சிறப்பு நீதிமன்றங்களும் அமைக்கப்பட இருக்கிறது.

இதுகுறித்து சென்னை உயர்நீதிமன்ற வழக்கறிஞர் என்.ரமேஷ்
கூறுகையில், ''வழக்கமாக கோடைவிடுமுறை என்றால்
ஒரு சில நீதிபதிகள், வாராத்தில் இரண்டு அல்லது மூன்று நாட்கள்
பணிக்கு வருவார்கள். அவர்களும் சுழற்சி முறையில்தான்
வருவார்கள்.

மிகவும் அவரச முக்கியத்துவம் வாய்ந்த வழக்குகள் மட்டுமே
விசாரணைக்கு எடுத்துக் கொள்ளப்படும். சமீபத்தில் உச்சநீதிமன்றம்
அறிவுறுத்தியபடி, கோடைவிடுமுறை நீதிமன்றம் வழக்கம் போல்
செயல்படும் என்றும் கோடைவிடுமுறை காலத்தில் சிறப்பு
நீதிமன்றங்கள் அமைக்க வேண்டும் என்றும் கூறியிருந்தது.

அதில், முத்தலாக் போன்ற சிறப்பு வழக்குகளும் தீர்க்கப்படாமல்
இருக்கும் பழைய வழக்குகளையும் விசாரித்து தீர்ப்பு வழங்க
வேண்டும் என்று அறிவுறுத்தி இருந்தார்கள்.

அதன்படி இந்த ஆண்டு முதல் தடவையாக கோடைவிடுமுறையில்
சிறப்பு நீதிமன்றங்கள் செயல்பட இருக்கிறது. ஒரு சில நாட்கள்
மட்டுமே லீவு எடுத்துவிட்டு பணிக்கு வருவதாக பெரும்பாலான
நீதிபதிகள் தெரிவித்துள்ளார்கள். அதனால், இந்த கோடை
விடுமுறையில் சென்னை உயர்நீதிமன்றத்தில் சிறப்பு நீதிமன்றங்கள்
செயல்பட இருப்பதால் வழக்கமான பரபரப்புக்கு சற்றும்
குறைவில்லாமல் சென்னை உயர்நீதிமன்றம் செயல்படும்'' என்று
கூறினார்.


-
-----------------------------
விகடன்