'தோனி தான் சிறந்த ஃபினிஷர்' : புனே அணி உரிமையாளர் ஹர்ஷ் கோயங்கா அந்தர் பல்டி!

-
இன்று சன்ரைசர்ஸுடன் நடந்த போட்டியில் சிறப்பாக
ஆடிய தோனியை பாராட்டி ட்விட்டரில் பதிவிட்டுள்ளார்
புனே அணியின் உரிமையாளர் ஹர்ஷ் கோயங்கா.
-
கடந்த சில போட்டிகளுக்கு முன்பு புனே அணியின்
உரிமையாளர் ஹர்ஷ் கோயங்காவின் கருத்துக்கள்
சமூக வலைதளங்களில் சர்ச்சைகளை கிளப்பி வந்தன.

இந்த ஐபிஎல் தொடரில் புனே அணிக்காக விளையாடி
வரும் தோனி முதலில் கேப்டன் பதவியில் இருந்து
நீக்கப்பட்டார். இதையடுத்து ஸ்டீவ் ஸ்மித் தான் சிறந்த
கேப்டன் என ஹர்ஷ் கோயங்கா ட்விட்டரில் பதிவிட்டார்
-
.மேலும் முதற்கட்ட ஆட்டங்களில் தோனி ரன் குவிக்க
தடுமாறிய போது ஹர்ஷ் கோயங்கா புனே அணி
வீரர்களின் சராசரியை ட்வீட்டாக போட்டு தோனி
ரசிகர்களை மேலும் வெறுப்பேற்றினார்.
-
இதையடுத்து தோனியின் மனைவி சாக்‌ஷி மாலிக்
உள்பட பலர் கோயங்காவை, திட்டியும், கலாய்த்தும்
ஸ்டேட்டஸ் தட்டினர். அவர்களை கோயங்கை ஃப்ளாக்
செய்தார்.
-
இந்நிலையில், தற்போது 'தோனியே சிறந்த ஃபினிஷர்'
என அவர் பதிவிட்டுள்ளார் கோயங்கா. சன்ரைசர்ஸ்
உடன் நடந்த போட்டியில் தோனி அரைசதம் அடித்ததோடு,
கடைசி வரை நின்றுதான் ஒரு சிறந்த ஃபினிஷர் என்பதை
மீண்டும் நிரூபித்துள்ளார். இதையடுத்து,'தோனியின்
சிறப்பான ஆட்டம். அவர் மீண்டும் ஃபார்முக்கு வந்திருப்பது
மகிழ்ச்சி' என கூறியுள்ளார் கோயங்கா.

இதை தொடர்ந்து சமூக வலைதளங்களில் தோனியின்
ரசிகர்கள் கோயங்காவின் ட்வீட்டை வைத்து அட்டகாசம்
செய்து வருகின்றனர்.
-
---------------------------------------
விகடன்

"பாட்ஷா.. மாணிக் பாட்ஷா!" - தோனி ரிட்டர்ன்ஸ்
-

-
கேப்டன் பதவி பறிப்பு, புனே உரிமையாளர்
கோயங்காவின் நக்கல் ட்வீட், மோசமான ஃபார்ம்,
ஓய்வு சர்ச்சைகள் என தோனிக்கு கொஞ்ச நாள்
போதாத காலம்.

இப்படியே ஆடிக்கொண்டிருந்தால் புனே அணியில் ஒரு
வீரராக கூடத் தொடர முடியாது எனும் அளவுக்கு
சொதப்பல் இன்னிங்ஸ் ஆடிக்கொண்டிருந்தார் தோனி.

புனே நிர்வாகத்துக்கும் தோனிக்கும் என்ன புகைச்சலோ
தெரியவில்லை. அவர் சொதப்பல் ஆட்டம் ஆடுவதை
ஒரு வகையில் ரசித்துக் கொண்டிருந்தனர். ரசிகர்கள்
தோனி பக்கம் நின்றார்கள்.

தோனி இனியும் எதையும் நிரூபிக்கத் தேவையில்லை
என சப்போர்ட்டுக்கு வந்தார் வார்னே.

முதல் மூன்று ஆட்டங்களில், தோனி பேட் பிடிக்க வந்தால்
பவுலர்கள் குஷியாகும் அளவுக்கு நிலைமை இருந்தது.
பெங்களூருக்கு எதிரான போட்டியில் ஸ்டேடியத்தை விட்டு
வெளியே செல்லும் அளவுக்கு ஒரு இமாலய சிக்ஸர் வைத்த
தோனி, தனது மின்னல் வேக ஸ்டம்பிங்கால் டிவில்லியர்ஸை
பெவிலியனுக்கு அனுப்பி புனேவுக்கு வெற்றியை
உறுதிப்படுத்தினார்.

கடந்த போட்டியில் லேசாக ஃபார்முக்கு வரும் அறிகுறி
தெரிந்தது.
இதோ இன்று பழைய பன்னீர் செல்வமாக திரும்பி
வந்திருக்கிறார் தோனி.
-
-----------------------------------

சன் ரைசர்ஸ் அணியும், புனே அணியும் இன்று புனே
மைதானத்தில் மோதின. புனே மைதானத்தை பொறுத்த
வரையில் அது ஸ்லோ பிட்ச். அதிரடி ஆட்டம் ஆடுவது
அவ்வளவு எளிதல்ல. டேவிட் வார்னரும், ஷிகர் தவனும்
முதல் பத்து ஓவர்களில் ஒன்றிரண்டாகவே ரன்களைச்
சேர்த்தனர்.

அதிரடி வீரர் வார்னர் களத்தில் இருந்தபோதும் ரன் ரேட்
7ஐ கூட தொடவில்லை. கடைசி கட்ட ஓவர்களில்
மோசஸ் ஹென்றிக்ஸ் அதிரடி காட்ட 175 ரன்கள் என்ற
கவுரமான இலக்கை அடைந்தது.

இந்த பிட்சில் 170 ரன்கள் என்பது நல்ல இலக்கு தான்.
ஆகவே புனே வெற்றி பெறுவது அவ்வளவு சுலபமல்ல
என்றே எல்லோரும் கருதினார்கள்.

ஸ்லோ பிட்ச்களில் நன்றாக ஆடக் கூடிய ரஹானே
இரண்டே ரன்களில் திருப்திபட்டார். ஸ்மித் பந்தை தவறாக
கணித்து அவுட் ஆனார். இன்னொரு முனையில் அசாத்திய
இன்னிங்ஸ் ஆடிக் கொண்டிருந்தார் ராகுல் திரிபாதி.

நிஜத்தில் இன்று பாராட்டப்பட வேண்டிய இளம் வீரர்
அவர் தான். வேகப்பந்து வீச்சாளர்களை இறங்கி வந்து
அவர் சாத்திய விதத்தை பார்க்கும் போது, அவர்
நீல ஜெர்சியில் ஆடப்போகும் நாள் அவ்வளவு தூரம் இல்லை
என்றே தோன்றியது .

ஒரு கட்டத்தில் திரிபாதி அவுட் ஆகும் போது அணியின்
ஸ்கோர் 98 / 3 .

6.5 ஓவர்களில் 78 ரன்கள் அடிக்க வேண்டும் என்ற நிலை.
களத்தில் தோனியும், ஸ்டோக்சும் இருந்தார்கள். இருவருமே
முழு ஃபார்மில் இல்லை என்பதால், புனே அணி அவ்வளவு
தான் என தோன்றியது. எதிர்பார்த்தது போலவே ஸ்டோக்ஸ்
10 ரன்னில் அவுட் ஆகினார்.

புவனேஸ்வர் குமாருக்கு இன்னும் இரண்டு ஓவர் மீதம்
இருந்தது. இந்த சீசனில் புவனேஸ்வர் குமார் மிக அற்புதமாக
வீசி வருகிறார். அவரது பந்துவீச்சை எதிர்கொண்டு விக்கெட்டைக்
கொடுக்காமல் ஆடினாலே போதுமானது என்ற மனநிலையில்
தான் ஆடுகிறார்கள் எதிரணி பேட்ஸ்மேன்கள்.

துல்லியமான புவியின் ஓவரை எப்படிச் சமாளிக்கப் போகிறது
புனே அணி என மிகப்பெரிய கேள்வி எழுந்தது.

முதல் 26 ரன்களை எடுக்க 23 பந்துகளை எடுத்துக் கொண்ட
தோனி, அதன் பின்னர் முதல் கியரில் இருந்து தடலாடியாக
நான்காவது கியருக்கு மாற்றினார். 3 ஓவருக்கு 46 ரன் அடிக்க
வேண்டும் என்ற நிலையில், 18 வது ஓவரை வீசிய
முகமது சிராஜ் ஓவரில் ஒரு சிக்ஸர், ஒரு பவுண்டரி வீசினார்.

மிக முக்கியமான 19 வது ஓவரை வீச வந்தார்
புவனேஸ்வர் குமார். அவரின் முதல் பந்தை எல்லைக்
கோட்டுக்கு அனுப்பி வரவேற்றார் தோனி. இரண்டாவது
பந்தில் கிட்டதட்ட தேர்ட்மேன் திசையில் ஒரு அட்டகாச
பவுண்டரி அடித்தார். மூன்றாவது பந்தை ஒரு முரட்டு சிக்ஸர்
அடித்தார்.

மேட்ச் புனே பக்கம் திரும்பியது. கடைசி ஓவரில் 11 ரன் எடுக்க
வேண்டும் புனே. தனது பாணியில் பவுண்டரி விளாசி
மேட்ச்சை முடித்து வைத்தார் தோனி.

இந்த போட்டியில் தோற்றிருந்தால் பிளே ஆஃப் செல்லும்
வாய்ப்பு மங்கியிருக்கும். தோனி, மனோஜ் திவாரி,
ராகுல் திரிபாதி ஆகியோரின் ஆட்டத்தால் தப்பித்தது புனே.

நீண்ட நாட்களுக்கு பிறகு மேட்ச் முடிந்த பிறகு நடக்கும்
பிரசன்டேஷன் நிகழ்வில் தோனி கலந்து கொண்டார்.
அவர் தான் மேன் ஆஃப் தி மேட்ச்.

"கொஞ்சம் கஷ்டமான தருணம் தான். ஆனால் எங்களிடம்
நல்ல பேட்ஸ்மேன் வரிசை இருந்தது . எங்கள் திட்டப்படி
ஆடி ஜெயித்தோம். இந்த போட்டியில் மனோஜ் திவாரியின்
பங்களிப்பு மிக முக்கியமானது. பாராட்டப்பட வேண்டியது"
என்றார்.

ஐபிஎல் முடிந்து சாம்பியன்ஸ் டிராபி ஆரம்பிக்கவுள்ள
சூழ்நிலையில், தோனியின் ஃபார்ம் மிக முக்கியம்.
அவரின் பங்களிப்பு இல்லாமல் கோலி கோப்பையை தூக்குவது
இப்போதைக்கு கடினமே. கொஞ்ச நாட்களாக தோனியின்
ரசிகர்கள் சோகத்தில் இருந்தார்கள். சிஎஸ்கே ரசிகர்களும்
தான்.

அவர்களுக்கு தோனியின் இந்த இன்னிங்ஸ் உற்சாக டானிக்காக
அமைந்திருக்கிறது.
-
--------------------------
-விகடன்