பிரதமர் தெரசா மே அறிவிப்பு இங்கிலாந்தில் முன்கூட்டியே பொது தேர்தல் நடத்த முடிவு

லண்டன்:
இங்கிலாந்து அரசின் பதவிக்காலம் முடிய இன்னும்
3 ஆண்டுகள் இருக்கும் நிலையில், வரும் ஜூன் 8ம் தேதி
பொதுத் தேர்தல் நடத்தும் திட்டத்தை பிரதமர் தெரசா மே
அறிவித்துள்ளார்.

ஐரோப்பிய யூனியனில் இருந்து வெளியேற இங்கிலாந்து
முடிவெடுத்தது. இதற்கான நடவடிக்கைகள் நடந்து வருகின்றன.
இந்த விஷயத்தில் நாடாளுமன்றத்தில் ஆளுங்கட்சி, எதிர்க்கட்சி
இடையே கருத்து வேறுபாடு உள்ளது.

இதனால் ஐரோப்பிய யூனியனில் இருந்து வெளியேறியபின்
அரசின் ஒவ்வொரு நடவடிக்கைக்கும் எதிர்க்கட்சிகள்
முட்டுக்கட்டையை ஏற்படுத்தும்.
இதனால் அரசு திறம்பட செயல்பட முடியாத நிலை ஏற்படும்.

இங்கிலாந்தில் பழமைவாத கட்சியின் பதவிக்காலம் 2020ம்
ஆண்டுதான் முடிகிறது. ஆனால் அதற்கு முன்பாக பொதுத்
தேர்தலை சந்தித்து ஆட்சிக்கு வந்தால்தான், அரசின்
ஸ்திரத்தன்மையை வெளிப்படுத்த முடியும் என தெரசா மே
கருதுகிறார்.

நேற்று நடந்த அமைச்சரவை கூட்டத்துக்குப்பின் பொதுத்
தேர்தலை இந்தாண்டு ஜூன் 8ம் தேதி நடத்த விரும்புவதாக
இங்கிலாந்து பிரதமர் தெரசா மே அறிவித்துள்ளார்.

பொதுத் தேர்தலை முன்கூட்டியே நடத்த நாடாளுமன்றத்தில்
மூன்றில் இரண்டு பங்கு ஆதரவு தேவை. இதற்கான
மசோதாவை நாடாளுமன்றத்தில் தெரசா மே இன்று தாக்கல்
செய்கிறார். இதற்கு நாடாளுமன்ற உறுப்பினர்கள் ஆதரவு
தெரிவிக்க வேண்டும் என அவர் வேண்டுகோள்
விடுத்துள்ளார்.

இது குறித்து எதிர்க்கட்சியான தொழிலாளர் கட்சி தலைவர்
ஜெரிமி கார்பின் கூறுகையில், ‘‘முன்கூட்டியே தேர்தல்
நடத்தும் தெரசா மேவின் முடிவை வரவேற்கிறேன்.

நாட்டின் பொருளாதாரத்தை வலுப்படுத்த தவறிய ஆளும்
கட்சிக்கு, தொழிலாளர் கட்சி சிறந்த மாற்றாக விளங்கும்’’
என்றார்
-
--------------------------------
தினகரன்