சசிகலா மீதான அன்னிய செலாவணி மோசடி வழக்கு : எழும்பூர் நீதிமன்றத்தில் இன்று விசாரணை

சென்னை :
சசிகலா மீதான அன்னிய செலாவணி மோசடி வழக்கு
எழும்பூர் நீதிமன்றத்தில் நேற்று தள்ளிவைக்கப்பட்டு
இன்று மீண்டும் விசாரணைக்கு வருகிறது.

ஜெஜெ டிவிக்கு அப்லிங்க் வசதிகளை ஏற்படுத்தியதிலும்,
கருவிகளை வாடகைக்கு எடுத்ததிலும் அன்னிய செலாவணி
விதிகளை மீறியதாக அதிமுக பொதுச் செயலாளராக உள்ள
வி.கே.சசிகலா மீது 1996ம் ஆண்டு அமலாக்கப் பிரிவு வழக்கு
பதிவு செய்தது.

இதற்காக அயல்நாட்டு நிறுவனங்களான ரிம்சாட் மற்றும்
சுபிக்பே ஆகியவற்றுக்கு 5 லட்சம் அமெரிக்க டாலர்களை
மாற்றியதாகவும், அப்பூப்ஸ் என்ற நிறுவனத்துக்கு,
10.45 லட்சம் சிங்கப்பூர் டாலர்களை மாற்றியதாகவும்,
அமலாக்கப் பிரிவு வழக்குப் பதிவு செய்தது.

இதுதொடர்பான வழக்கு நடைபெற்று வந்த சென்னை எழும்பூர்
நீதிமன்றத்தில், தன் மீதான குற்றச்சாட்டுகளுக்கு போதிய
ஆதாரம் இல்லை என்றும், இதனால் தங்களை வழக்கில்
இருந்து விடுவிக்க வேண்டும் என்றும் சசிகலா மனு தாக்கல்
செய்திருந்தார்.

மனுவை விசாரித்த எழும்பூர் பொருளாதார குற்றவியல்
நீதிமன்ற நீதிபதி தட்சணாமூர்த்தி, அன்னிய செலாவணி மோசடி
வழக்கிலிருந்து சசிகலாவை விடுவித்து உத்தரவிட்டார்.

இந்த உத்தரவை எதிர்த்து மத்திய அமலாக்கப் பிரிவு உதவி
இயக்குனர் சார்பில் சென்னை உயர் நீதிமன்றத்தில் தொடரப்பட்ட
மேல்முறையீட்டை நீதிபதி ஜி.சொக்கலிங்கம் விசாரித்தார்.
அவர் பிறப்பித்த உத்தரவில், பணப் பரிமாற்றம் நடைபெற்றதாக
கூறப்படும் நிறுவனங்களின் அன்றாட நிர்வாகத்தில் சசிகலா
உள்ளிட்டோர் பங்கெடுத்ததற்கான ஆதாரங்கள் உள்ளதாக கூறி
சசிகலாவை விடுவித்த எழும்பூர் நீதிமன்ற உத்தரவை ரத்து
செய்து, அன்னிய செலாவணி வழக்கை எதிர்கொள்ள வேண்டும்
என பிப்ரவரி 17ம் தேதி உத்தரவிட்டார்.

இந்த வழக்கின் விசாரணை தற்போது எழும்பூர் நீதிமன்றத்தில்
நடைபெற்று வரும் நிலையில், பெங்களூரு பரப்பனா
அக்ரஹாரா சிறையில் இருக்கும் சசிகலா எழும்பூர் நீதிமன்றத்தில்
மனு ஒன்றை தாக்கல் செய்துள்ளார்.

அதில் தனது உடல் நலம் மற்றும் பாதுகாப்பு காரணங்களை
கருத்தில் கொண்டு குற்றச்சாட்டு பதிவு செய்யும் நடை
முறையில் காணொலி காட்சி மூலம் பங்குபெற அனுமதிக்க
வேண்டும் என கோரிக்கை வைத்துள்ளார்.

இந்த வழக்கு நேற்று மீண்டும் விசாரணைக்கு வந்தபோது,
மூத்த வழக்கறிஞர் ஆஜராகி வாதிட இருப்பதால் வழக்கை
ஒத்திவைக்க வேண்டுமென நீதிபதி முன்னிலையில் கோரிக்கை
வைக்கப்பட்டது. அதனை ஏற்ற நீதிபதி வழக்கை நாளைக்கு
(ஏப்ரல் 19) அதாவது இன்று தள்ளிவைத்து உத்தரவிட்டார்.
-
----------------------------------
தினகரன்

இந்த வழக்கிலும் குற்றவாளி என்று நிரூபிக்கப்பட்டால் , ஆயுள் முழுவதும் களிதான் !