சொந்த நாட்டுக்கு திரும்பிப் போ’ என கூறியபடி அமெரிக்காவில் இந்தியர் மீது மர்மநபர் துப்பாக்கிச்சூடு: அடுத்தடுத்த சம்பவங்களால் பீதி

**ayyasamy ram** · **ayyasamy ram** Mon Mar 06, 2017 6:15 am

நியூயார்க்:
‘சொந்த நாட்டுக்கு திரும்பிப் போ’ என கத்தியபடி சீக்கியர் ஒருவர் மீது மர்ம ஆசாமி துப்பாக்கிச்சூடு நடத்திய சம்பவம் அமெரிக்காவில் மீண்டும் பீதியை கிளப்பி உள்ளது.

அமெரிக்காவில் புதிய அதிபராக டெனால்ட் டிரம்ப் பதவியேற்ற பிறகு இந்தியர்கள் மீதான இனவெறி, நிறவெறி தாக்குதல்கள் அதிகரித்து வருகின்றன. கடந்த 23ம் தேதி கன்சாஸ் நகரில் இந்திய இன்ஜினியர் ஸ்ரீநிவாஸ் குச்சிபோட்லா (32) மதுபான பாரில் சுட்டுக் கொல்லப்பட்டார்.

அவரை சுட்டுக் கொன்றவர் ‘நாட்டை விட்டு வெளியேறு’ என கத்தியபடி துப்பாக்கியால் சுட்டுள்ளார். இந்த சம்பவத்தின் அதிர்ச்சி அடங்குவதற்குள், கடந்த இரு தினங்களுக்கு முன்பு, தெற்கு கலிபோர்னியாவின் லான்கேஸ்டர் கவுன்டியில் இந்திய தொழிலதிபர் ஹர்னிஷ் பட்டேல் (43) தனது வீட்டின் முன்பாக மர்ம நபரால் சுட்டுக் கொல்லப்பட்டார்.

இந்நிலையில், மீண்டும் ஒரு சீக்கியர் மீது துப்பாக்கிச்சூடு நடத்தப்பட்டுள்ள சம்பவம் அதிர்ச்சி ஏற்படுத்தி உள்ளது. வாஷிங்டனின் கென்ட் பகுதியில் வசிப்பவர் தீப் ராய் (39). சீக்கியர். இந்திய வம்சாவளியைச் சேர்ந்தவரான இவர், அமெரிக்க குடியுரிமை பெற்றவர்.

இவர் கடந்த வெள்ளிக்கிழமை, தனது வீட்டின் முன், வாகனத்தை சரிபார்த்துக் கொண்டிருந்தார். அப்போது, அவ்வழியாக, முகத்தை பாதி முடியபடி, முகமூடி அணிந்த வந்த ஒரு 6 அடி உயர ஆசாமி, தீப் ராய்யுடன் வாக்குவாதத்தில் ஈடுபட்டுள்ளர்.

திடீரென அந்த ஆசாமி மறைத்து வைத்திருந்த துப்பாக்கியை எடுத்து, ‘சொந்த நாட்டுக்கு திரும்பிப் போ’ என கத்தியபடி, தீப் ராயை நோக்கி சுட்டுள்ளார். இதில், தீப் ராயின் கையில் குண்டு துளைத்தது. ரத்த வெள்ளத்தில் அவர் சரிந்ததும், மர்ம ஆசாமி தப்பி ஓடிவிட்டான்.

தகவலறிந்த போலீசார் விரைந்து வந்து தீப் ராயை மருத்துவமனையில் சேர்த்தனர். இது குறித்து கென்ட் நகர தலைமை போலீஸ் அதிகாரி கென் தாமஸ் கூறுகையில், ‘‘உயிருக்கு ஆபத்தான காயம் ஏதும் படவில்லை. இந்த விஷயத்தை மிக தீவிரமாக விசாரித்து வருகிறோம்’’ என்றார்.

இந்த துப்பாக்கிச்சூடும் இந்தியர்களுக்கு எதிரான இனவெறி தாக்குதலே என அமெரிக்க பத்திரிகைகள் செய்தி வெளியிட்டுள்ளன.
அமெரிக்காவில் இந்தியர்கள் மீதான இனவெறி தாக்குதல் தினசரி நிகழ்வாக மாறியிருப்பது, அங்கிருக்கும் இந்தியர்கள் மற்றும் அவர்களது உறவினர்கள் மத்தியில் பீதியை கிளப்பி உள்ளது.

பாதுகாப்பு உறவை பலப்படுத்தும் இந்தியா-அமெரிக்கா: இதற்கிடையே, டிரம்ப் தலைமையிலான அமெரிக்க அரசு, இந்தியாவுடனான பாதுகாப்பு உறவை பலப்படுத்துவதில் தொடர்ந்து அக்கறை காட்டி வருகிறது. தீவிரவாத தடுப்பு உதவி திட்டத்தின்கீழ் பயிற்சி அளிப்பது தொடர்பாக கடந்த வாரம் இந்தியா வந்த அமெரிக்க பிரதிநிதிகள், வெளியுறவுத்துறை அதிகாரிகளிடம் ஆலோசனை நடத்தினர்.

அதன்படி, இந்திய போலீஸ் அதிகாரிகள் விரைவில் அமெரிக்காவில் நடக்க உள்ள இப்பயிற்சியில் பங்கேற்க உள்ளனர். அதில், பிணைக் கைதிகளை மீட்பது, தீவிரவாத சம்பவத்தில் புலனாய்வு மேற்கொள்வது ஆகியவற்றுடன் சைபர் கிரைம், கடல் பாதுகாப்பு குறித்த பயிற்சிகள் அளிக்கப்பட உள்ளது.
-
தினகரன்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக