பசுமைச் சுவர்கள்

பசுமைச் சுவர்கள் பச்சை வண்ணம் தீட்டப்பட்ட சுவர்கள்
அல்ல. அவை பசுமைத் தாவரங்களால் சூழப்பட்ட சுவர்கள்.
நினைத்தாலே இனிக்கும் இப்படியொரு ஐடியாவுக்கான
காப்புரிமையைப் பெற்றவர் பாட்ரிக் ப்ளான்க் என்ற
பிரெஞ்சு நாட்டைச் சேர்ந்த பிரபல தாவரவியலாளர்.

இவர் காப்புரிமை பெற்றது நெடுக்கு திசை தோட்டம்
என்பதற்காக.

பண்டைய ஏழு அதிசயங்களில் ஒன்றான பாபிலோனியாவின்
தொங்கும் தோட்டம் குறித்து நாம் கேள்விப் பட்டதுண்டு.
நம்மில் சிலர் வீடுகளில் மணி பிளாண்ட் வளர்த்து வருவோம்.

அவை சுவர்களின் மீதும் படர்வது உண்டுதான். ஆனால்
பசுமைச் சுவர் என்பது அதையெல்லாம் தாண்டிய ஒன்று.

கண்ணுக்குக் குளிர்ச்சி என்ற ஒரு காரணத்துக்காக மட்டுமல்ல,
பசுமைச் சுவர்கள் நமக்குச் செய்யக்கூடிய பலவித
நன்மைகளுக்காகவே அவற்றை நாம் வளர்ப்பது
புத்திசாலித்தனம்.

தாவரங்கள் கரியமில வாயுவை உள்ளிழுத்துக் கொண்டு
ஆக்சிஜனை வெளியேற்றும் என்பது நமக்குத் தெரிந்ததுதான்.
தவிர, சுற்றுப்புறத்திலுள்ள அசுத்தங்களை வடிகட்டும்
பணியையும் இவை செய்கின்றன.

பலவித காரணங்களால் கட்டங்களுக்குள்ளே நச்சுக் காற்று
சுழன்று கொண்டிருக்கிறது. அந்த நச்சுக் காற்றைத்தான்
பசுமை சுவரிலுள்ள தாவரங்கள் வடிகட்டுகின்றன.

கடுமையான மழைக்குப் பிறகு சுவர்களில் தங்கும் நீரையும்,
ஈரக்கசிவையும் வெளியேற்றும் வேலையையும் கூட பசுமைச்
சுவர் தாவரங்கள் சிறப்பாக செய்கின்றன.

பொதுவாக கிராமங்களைவிட நகரங்கள் மிக அதிக வெப்பம்
கொண்டவை. மேலும் செங்கல்லோ, கான்க்ரீட்டோ சூரிய
வெப்பத்தில் அதிக நேரம் இருக்கும்போது, அந்த வெப்பத்தின்
ஒரு பகுதியைத் தங்களுக்குள் சேமித்து வைத்துக் கொள்ளும்.

ஆனால் தாவரங்கள் அப்படிச் செய்வதில்லை என்பதால்
பசுமைச் சுவர்கள் கொண்ட வீடுகள் குளிர்ச்சியாகவே இருக்கும்.

குளிர்காலத்திலோ, கட்டடத்தை இலை ஒ இன்சுலேட்டர்போல
அரவணைக்கின்றன. அதாவது வெளியிலுள்ள குளிர் முழுவதும்
உள்ள நுழையாதபடி தடுக்கின்றன.
பசுமைச் சுவர்கள் ஒலி மாசுபடுவதையும் குறைக்கின்றன எ
ன்கிறார்கள்.

பசுமைச் சுவர்களில் பெரும்பாலும் Ivy எனப்படுகிற கொடி
தாவரம்தான் பயன்படுத்தப்படுகிறது. இதற்கு முக்கிய காரணம்
சரியான சூழலில் இதனால் சுமார் 100 அடி உயரத்துக்குக்கூட
வளர முடியும். இந்தத் தாவரம் பார்ப்பதற்கும் ரம்மியமாக
இருக்கும்.

இதன் இலைகள் மூன்று மூன்று இலைக்கொத்துக்கள் போல
காட்சித் தருகின்றன. இதன் வேர்கள் மண்ணில் பதியவேண்டும்
என்பதில்லை. சுவரையே ஆதாரமாகக் கொண்டு பரவக்கூடியது
இது. மண்ணில் உள்ள வேர் மட்டும் கீழே படர்ந்து சத்துக்களை
உறிஞ்சிக் கொள்ளுமே தவிர மேல் பகுதிகள் சுவருக்கு
பாதிப்பை உண்டாக்குவதில்லை.

Lipstrick plant, Sword Fern, Acacia, Dracaena
போன்ற தாவரங்களையும் பசுமைச் சுவர்களுக்குப் பயன்படுத்த
முடியும் என்கிறார்கள்.

லண்டனில் பசுமைச் சுவர்களை அதிகம் உருவாக்குவதில்
ஆர்வம் செலுத்துகிறார் அதன் மேயர். பார்க்க குளுமை, சுற்றுச்
சூழல் பாதுகாப்பு போன்ற கோணங்களில் விக்டோரியா நகரம்
அருகிலுள்ள ஒரு பிரபல ஹோட்டலில் சுவர்களில் 68 அடி உயர
சுவரில் பசுமை சேர்க்கப்பட்டது.

நகர மக்களுக்கு இயற்கையை மீண்டும் தினமும் கண்முன்
தரிசிப்பதற்கான ஒரு வாய்ப்பு பசுமைச் சுவர்கள். தவிர
கான்க்ரீட் காடுகளை வளர்த்துக் கொண்டிருக்கும் குறறத்தைப்
புரிந்து கொண்டிருக்கும் நமக்கு இது ஒரு சிறிய பிராயச்சித்தமும்
கூட.
–
—————————-

– ஜி.எஸ்.எஸ்.
மங்கையர் மலர்