கட்டளை போட்ட மந்திரி யார்? கேட்கிறது தகவல் ஆணையம்

"வழக்கு ஒன்றில் தனக்கு வேண்டிய நபருக்கு சாதகமாகச் செயல்படும்படி, சென்னை ஐகோர்ட் நீதிபதிக்கு கட்டளையிட்ட மத்திய அமைச்சர் யார் என்பதை சுப்ரீம் கோர்ட் தெரிவிக்க வேண்டும்' என, மத்திய தகவல் ஆணையம் உத்தரவிட்டுள்ளது.


சென்னை ஐகோர்ட் நீதிபதியாக இருப்பவர் ரகுபதி. இவர் சில மாதங்களுக்கு முன், சென்னை ஐகோர்ட்டில் வழக்கு விசாரணை நடந்து கொண்டிருந்த போது, "மத்திய அமைச்சர் ஒருவர் தன் வக்கீல் மூலமாக என்னை தொலைபேசியில் தொடர்பு கொண்டு பேசினார். சி.பி.ஐ., விசாரிக்கும் வழக்கு ஒன்றில், தனக்கு வேண்டிய நபருக்கு சாதகமாகச் செயல்பட வேண்டுமென கட்டளையிட்டார்' என்றார். சென்னை ஐகோர்ட் நீதிபதியின் இந்தக் குற்றச்சாட்டு, நாடு முழுவதும் பெரும் பரபரப்பை ஏற்படுத்தியது.


இந்நிலையில், டில்லியைச் சேர்ந்த சுபாஷ் சந்திர அகர்வால் என்பவர், மத்திய தகவல் ஆணையத்தில் மனு ஒன்றைத் தாக்கல் செய்தார். அதில் கூறியிருந்ததாவது: வழக்கு விசாரணையில் சாதகமாகச் செயல்படும்படி தனக்கு கட்டளையிட்ட அமைச்சர் தன்னிடம் நேரடியாகப் பேசவில்லை என, சென்னை ஐகோர்ட் தலைமை நீதிபதிக்கு, நீதிபதி ரகுபதி கடிதம் எழுதியுள்ளார். இந்த விவரத்தை சுப்ரீம் கோர்ட் தலைமை நீதிபதி கூறியுள்ளார். அதனால், அந்த மத்திய அமைச்சர் யார் என்ற விவரத்தை தெரிவிக்கும்படி, சுப்ரீம் கோர்ட்டிற்கு உத்தரவிட வேண்டும். இவ்வாறு மனுவில் கோரியிருந்தார்.


மனுவை விசாரித்த மத்திய தகவல் ஆணையர் வாஜாகத் அபிபுல்லா, ""சுபாஷ் அகர்வால் கேட்ட விவரங்களை 15 நாட்களுக்குள் தர வேண்டும்,'' என சுப்ரீம் கோர்ட்டிற்கு உத்தரவிட்டார்.