சீன முட்டை விற்பனை செய்யும் வியாபாரிகள் மீது வழக்கு: உணவுத் தர நிர்ணய பாதுகாப்பு அதிகாரி எச்சரிக்கை

-


உடல்நலத்துக்கு கேடு விளைவிக்கும் சீன முட்டைகளை விற்பனை
செய்யும் வியாபாரிகள் மீது வழக்குப் பதிவு செய்யப்படும் என்று
மாவட்ட உணவுத் தர நிர்ணய பாதுகாப்பு அதிகாரி கருணாநிதி
எச்சரிக்கை விடுத்துள்ளார்.

சீன முட்டை விற்பனையைத் தடுக்கும் வகையில் உணவுத் தர
நிர்ணய பாதுகாப்புப் பிரிவு அதிகாரிகள் ஈரோடு, பெருந்துறை,
கோபி போன்ற பகுதிகளில் சனிக்கிழமை ஆய்வு மேற்கொண்டனர்.

இப்பகுதிகளில் முட்டை விற்பனை செய்யும் அங்காடிகளில்
விற்பனையாகும் முட்டைகளை எடுத்து உடைத்துப் பார்த்தும்,
அவற்றை ஆய்வுக்காகவும் அதிகாரிகள் எடுத்துச் சென்றனர்.

முதல்கட்டமாக ஈரோடு, பெருந்துறை, கோபி பகுதிகளில் சீன
முட்டை விற்பனையைத் தடுக்கும் வகையில் சோதனை மேற்
கொண்டதாகவும், சீன முட்டை விற்பனை செய்வது கண்டறியப்
பட்டால் அவர்களுக்கு அபராதம், வழக்குப் பதிவு செய்யப்படும் என
மாவட்ட உணவுத் தர நிர்ணய பாதுகாப்புப் பிரிவு மாவட்ட அலுவலர்
கருணாநிதி தெரிவித்தார்.

இதுகுறித்து, டாக்டர் கருணாநிதி கூறியதாவது:

சீன முட்டை அதிகப்படியான ரசாயனப் பொருள்களால் தயார்
செய்யப்படும் செயற்கை முட்டையாகும். வழக்கமாக விற்பனை
செய்யும் கோழி முட்டையைவிட அளவில் சற்று பெரியதாகும்,
அதில் உள்ள மெல்லிய சவ்வு, உள்ளே உள்ள வெள்ளைக்கருவில்
அமினோ அமிலங்களும், ஆல்புமின், முட்டையின் ஓடுகளின்
தரத்தைப் பார்த்து அவை செயற்கை முட்டையா என்பதை
அடையாளம் காண முடியும்.

முதல்கட்டமாக நடத்திய ஆய்வில் சீன முட்டை எங்கும் விற்பனை
செய்யப்படவில்லை என்பது ஊர்ஜிதமாகியுள்ளது. தொடர்
சோதனையில் சீன முட்டை விற்பனை செய்வது கண்டறியப்பட்டால்
சம்பந்தப்பட்ட வியாபாரிக்கு அபராதம் விதிக்கப்பட்டு, வழக்குத்
தொடரப்படும் என்றார்.
-
----------------------------------------------------
தினமணி