அரபிக் கடலில் சத்ரபதி சிவாஜிக்கு ரூ.3,600 கோடியில் பிரமாண்ட நினைவிடம்:

-
மறைந்த மராட்டிய மன்னர் சத்ரபதி சிவாஜிக்கு மும்பை
அருகே அரபிக் கடலில் ரூ.3,600 கோடி செலவில் பிரமாண்ட
நினைவிடம் அமைக்கும் பணியை பிரதமர் நரேந்திர மோடி
சனிக்கிழமை தொடங்கி வைத்தார்.

மும்பை அருகே அரபிக் கடல் பகுதியில் இந்த நினைவிடம்
அமைக்கப்படுகிறது. இதற்காக நினைவிடம் அமைக்கும் பகுதிக்கு
தெற்கு மும்பையில் உள்ள கிர்காம் சௌபாட்டி கடற்கரையில் இருந்து
“ஹோவர்காப்ட்’ படகு மூலம் பிரதமர் நரேந்திர மோடி சென்றார்.

அவருடன் மகாராஷ்டிர ஆளுநர் சி. வித்யாசாகர் ராவ், முதல்வர்
தேவேந்திர பட்னவீஸ், சிவசேனை தலைவர் உத்தவ் தாக்கரே, மராட்டிய
மன்னர் சிவாஜியின் வழித் தோன்றல்களும், நாடாளுமன்ற
உறுப்பினர்களுமான உதயன்ராஜே போஸ்லே, சம்பாஜி ராஜே
ஆகியோரும் உடன்சென்றனர்.

பின்னர் அங்கு நடைபெற்ற நிகழ்ச்சியில், மகாராஷ்டிர மாநிலம்
முழுவதும் உள்ள ஆறுகளில் இருந்து சேகரிக்கப்பட்ட புனித நீர்,
பல்வேறு இடங்களில் சேகரிக்கப்பட்ட மணல் ஆகியவற்றை பிரதமர்
மோடியிடம் முதல்வர் தேவேந்திர பட்னவீஸ் அளித்தார்.

அதையடுத்து, சிவாஜிக்கு நினைவிடம் அமைக்கும் பணியை தொடங்கி
வைப்பதற்கான “ஜல் பூஜான்’ பூஜையை பிரதமர் மோடி செய்தார்.

இதுதொடர்பாக மகாராஷ்டிர அரசு வெளியிட்ட அறிவிப்பில்,
“அரபிக் கடலில் சிவாஜி நினைவிடத்தில் அமைக்கப்படவிருக்கும்
சிலைதான் உலகிலேயே மிகவும் உயரமான சிலையாக இருக்கும்’
எனத் தெரிவிக்கப்பட்டுள்ளது.

ரூ.3,600 கோடி செலவில் கட்ட திட்டமிடப்பட்டுள்ள இந்த நினைவிடத்தில்,
சத்ரபதி சிவாஜி குதிரை மீது அமர்ந்திருப்பது போல 192 மீட்டர் உயரம்
கொண்ட பிரமாண்ட சிலையும் அமைக்கப்பட இருக்கிறது.
அதைச் சுற்றிலும், கலை அருங்காட்சியகம், மண்டபம், கண்காட்சி
அரங்கம் உள்ளிட்டவைகள் அமைக்கப்படவுள்ளன.

சத்ரபதி சிவாஜிக்கு நினைவிடம் அமைப்பதற்கான பணியை
பிரதமர் மோடி தொடங்கி வைக்க வருகை புரிந்ததால், மகாராஷ்டிரத்தை
ஆளும் பாஜக அரசின் சார்பில் விளம்பரங்கள் அதிக அளவில் செய்யப்
பட்டிருந்தன. அந்த மாநில செய்தி ஒளிபரப்புத் துறை அமைச்சகம் சார்பில்,
பல்வேறு மாவட்டங்களிலும், பிரமாண்ட பதாகைகள், சுவராட்டிகள்
வைக்கப்பட்டிருந்தன.

செய்தித் தாள்களில் விளம்பரங்களும், தொலைக்காட்சிகள்,
வானாலிகளிலும் மாநில அரசு சார்பில் விளம்பரங்கள் அதிக அளவில்
கொடுக்கப்பட்டிருந்தன.

மீனவர்கள், சுற்றுச்சூழல் ஆர்வலர்கள் எதிர்ப்பு:
சத்ரபதி சிவாஜிக்கு அரபிக் கடலில் நினைவிடம் அமைப்பதற்கு
மகாராஷ்டிர மீனவ அமைப்புகளும், சுற்றுச்சூழல் ஆர்வலர்களும்
எதிர்ப்புத் தெரிவித்துள்ளனர். இதனால், அரபிக் கடலில் சுற்றுச்சூழல்
பாதிக்கப்படும் என்று அந்த அமைப்புகள் தெரிவித்துள்ளன.

தினமணி

இது அமைந்தால், இது தான் உலகத்திலேயே பெரியநினைவிடமாய் இருக்கும் என்று சொல்கிறார்கள்....whatsup இல் போட்டோ கூட வந்தது.