அர்த்தமுள்ள கிறிஸ்துமஸ்

-
சின்னஞ்சிறு பாலனாய் பிறந்த இயேசு உலகுக்கு கொண்டு
வர நினைத்தது சமாதானம், அன்பு மற்றும் மகிழ்ச்சி!
இடையர்களுக்கு கிறிஸ்து பிறப்பின் செய்தியை அறிவிக்க
வந்த ஆண்டவரின் தூதர்களுடன் விண்ணகத் தூதர் பேரணியும்
சேர்ந்து பாடிய பாடலும் இதையே வலியுறுத்துகிறது.
–
“உன்னதத்தில் கடவுளுக்கு மாட்சி உரித்தாகுக. உலகில்
அவருக்கு உகந்தோருக்கு அமைதி உண்டாகுக’ என்பதே
வானதூதர்களின் வாழ்த்துப் பாடலாகும்.
–
கிறிஸ்து இவ்வுலகில் வந்து ஒரு குழந்தையாகப் பிறக்க தேர்ந்து
கொண்டது ஓர் எளிய தச்சுக் குடும்பத்தையல்லவா? பிறந்ததும்
ஓர் வசதியற்ற மாட்டுக் கொட்டிலில் அல்லவா? தாம் இவ்வுலகில்
வந்து பிறந்ததன் நோக்கம் என்ன என்பதை அசாயா
இறைவாக்கினர் வழியாக இவ்வாறு கூறுகிறார் இயேசு,
–
“ஏழைகளுக்கு நற்செய்தி அறிவிக்கவும்; உள்ளம் உடைந்தோரைக்
குணப்படுத்தவும்; சிறைபட்டோருக்கு விடுதலையை பறை
சாற்றவும்; கட்டுண்டோருக்கு விடிவைத் தெரிவிக்கவும்; துயருற்று
அழுவோருக்கு ஆறுதல் அளிக்கவும்; புலம்பலுக்குப் பதிலாக
மகிழ்ச்சித் தைரியத்தை வழங்கவும் என்னை அனுப்பியுள்ளார் (61:1-3).
–
கிறிஸ்துமஸ் விழாவை அர்த்தமுள்ளதாகக் கொண்டாட நாம் என்ன
செய்ய வேண்டும்? நம் சிறுவர்களின் உள்ளத்தில் இதற்கான
விதைகளை விதைப்பது பெற்றோர் மற்றும் ஆசிரியர்களின் கடமை
அல்லவா? கிறிஸ்து பிறப்பின் மகத்தான நற்செய்தி முதலில்
அறிவிக்கப்பட்டது எளியோராகிய இடையர்களுக்குத் தானே?

இதனை மனத்தில் கொண்டு, ஆடம்பர ஆர்பாட்டங்களைத் தவிர்த்து,
பகிர்தலில் உள்ள நிஜமான மகிழ்ச்சி பற்றி சிறுவர்களுக்கு
எடுத்துரைக்க வேண்டும். பிஞ்சு நெஞ்சங்களில் வித்திடப்படும் நல்ல
எண்ணங்களே பிற்காலத்தில் நற்கனிகளைத் தரும் மரங்களாக
மாறிவிடும் என்பதை நாம் மறக்கக்கூடாது.
–
நம் அருகில் வாழும் வசதியில்லாத எளியோருக்கு உதவி செய்து
அவர்களது மகிழ்ச்சியில் பங்கு கொள்வதுதான் இயேசு பாலனுக்கு
நாம் கொடுக்கப்போகும் தகுந்த கிறிஸ்துமஸ் பரிசு என்பதை
அவர்களுக்கு உணர்த்த வேண்டும்.

எனவே வானதூதர்கள் அறிவித்த சமாதானமும் மகிழ்ச்சியும் உலகம்
எங்கும் தழைத்தோங்க நம்மால் இயலும் சிறுசிறு முயற்சிகளைச்
செய்வதே உண்மையான கிறிஸ்துமஸ் கொண்டாட்டத்தின்
மையமாகத் திகழ வேண்டும்.

எனவே, பகிர்ந்து வாழ்வோம்; பரிவினைக் காட்டுவோம்.
அன்பினைப் பொழிவோம்; ஆடம்பரம் தவிர்ப்போம்; தன்னலம்
ஒழிப்போம்; பிறர் நலம் பேணுவோம். அமைதியும் மகிழ்வும் நிலவ
அந்த அருட்பெரும் சோதியை வேண்டுவோம்.
–
——————————————-
– பிலோமினா சத்தியநாதன்
தினமணி