வேரோடு சாய்ந்த மரம்

ச. சந்திரசேகரன் · 16/09/2012

வேரோடு சாய்ந்த மரம்

மரம் போனது
மனம் மரத்துப் போனது

நிழல் போனது
நெஞ்சம் நினைத்து வாடுது

பசுமை போனது
பஞ்சம் பல்லைக் காட்டுது

கிளை போனது
கிள்ளை கிடந்து வாடுது

அடி போனது
அரட்டை ஆட்டம் கண்டது

உச்சி முறிந்தது
ஊஞ்சல் ஆட்டம் முடிந்தது

இலை இறந்தது
இயற்கை இனிமை இழந்தது

பழம் பறந்தது
பசி படுத்தி எடுத்தது

கூடு சிதைந்தது
கூட்டமாய் பறவை அலைந்தது

வேர்கள் வெடித்தது
வானம் பொழிய மறந்தது

மரம் போனது
மனம் மரத்துப் போனது

அடுத்த தலைமுறை
ஆட்டம் அடங்கிப் போகுமோ?

சுடும் சூரியனால்
சுற்றம் சுண்டிப் போகுமோ?

மழை மறுத்ததால்
மாந்தர் விக்கித் தவிப்பரோ?

இயற்கை இறந்திடவே
இறைவன் பணிக்கும் முன்பே

மரங்களை நட்டிடுவோம்
மண் வளத்தைக் காத்திடுவோம்

சிரத்தை பாராமல்
சீர்மிகு உலக மைப்போம்

தரத்தை தந்திங்கு
தலைமுறை காத்திடுவோம்
ச.சந்திரசேகரன்