பாஜக எம்.பி.க்கள், எம்எல்ஏக்களுக்கு மோடி அதிரடி: வங்கிக் கணக்கு விவரங்களைத் தாக்கல் செய்ய உத்தரவு

-
அதிக மதிப்புடைய ரூபாய் நோட்டுகள் செல்லாது
என்ற அறிவிப்பு வெளியிடப்பட்ட தினத்திலிருந்து
(நவ.8) டிசம்பர் 31 வரை தங்களது வங்கிக் கணக்குகளில்
மேற்கொள்ளப்பட்ட பணப் பரிவர்த்தனை குறித்த
அறிக்கைகளை ஜனவரி 1-ஆம் தேதி சமர்ப்பிக்க வேண்டும்
என்று பாஜக எம்.பி.க்கள் மற்றும் எம்எல்ஏக்களுக்கு
பிரதமர் நரேந்திர மோடி உத்தரவிட்டுள்ளார்.
-
அதிக மதிப்புடைய ரூபாய் நோட்டுகள் செல்லாது என்று
முறைப்படி அறிவிப்பு வெளியாவதற்கு முன்பே பாஜகவினருக்கு
அது தெரியும் என்று எதிர்க்கட்சிகள் குற்றம்சாட்டி வருகின்றன.

இந்தச் சூழலில் இத்தகைய அறிவிப்பை பிரதமர் மோடி
வெளியிட்டுள்ளார். பாஜக எம்.பி.க்கள் குழுக் கூட்டம், தில்லியில்
செவ்வாய்க்கிழமை நடைபெற்றது. இந்தக் கூட்டத்தில் பங்கேற்று
பிரதமர் மோடி பேசியதாவது:

வரிவிதிப்பு சட்டத் திருத்த மசோதா அறிமுகப்படுத்தப்பட்டிருப்பது,
கருப்புப் பணத்தை சட்டப்பூர்வமாக மாற்றுவதற்கு உதவுவதற்காக
அல்ல. ஏழைகளிடம் இருந்து கொள்ளையடிக்கப்பட்ட, கணக்கில்
வராத பணத்தை மீட்டு மீண்டும் அவர்களின் நலனுக்காக பயன்
படுத்துவதற்காகவே இந்த மசோதா கொண்டுவரப்பட்டது.

"லோக் கல்யாண் மார்க்'கிலிருந்து (இது பிரதமர் இல்லம் இருக்கும்
சாலையின் பெயர். இதன்பொருள் "மக்கள் நலச் சாலை')
ஏழைகளின் நலனுக்காக கொண்டுவரப்பட்ட திட்டம் இது.

பாஜக எம்.பி.க்கள், எம்எல்ஏக்கள் அனைவரும் நவம்பர் 8 முதல்
டிசம்பர் 31 வரை தங்களது வங்கிக் கணக்குகளில் மேற்கொண்ட
பணப்பரிவர்த்தனை குறித்த அறிக்கைகளை கட்சித் தலைவர்
அமித் ஷாவிடம் ஜனவரி 1-ஆம் தேதி சமர்ப்பிக்க வேண்டும் என்று
பிரதமர் மோடி தெரிவித்தார்.

இதுகுறித்து நாடாளுமன்ற விவகாரங்கள் துறை அமைச்சர்
அனந்த்குமார், பின்னர் செய்தியாளர்களிடம் கூறியதாவது:

கருப்புப் பணத்துக்கு எதிராக மத்திய அரசின் அடுத்தகட்ட
நடவடிக்கையாக வரிவிதிப்புச் சட்டத்திருத்த மசோதா
அறிமுகப்படுத்தப்பட்டுள்ளது.
இதன்மூலம் மீட்கப்படும் பணம் கல்வி, மின்சார வசதி,
சாலைகள், கழிப்பறைகள் அமைத்தல் உள்ளிட்ட மக்கள் நலத்
திட்டங்களுக்கு பயன்படுத்தப்படும் என்று பிரதமர் மோடி
தெரிவித்தார்.

ரூபாய் நோட்டு விவகாரம் குறித்து நாடாளுமன்றத்தில் விவாதிக்க
பாஜக தயாராக இருக்கிறது. எதிர்க்கட்சிகள் விரும்பினால்
நாடாளுமன்றத்தில் இந்த விவகாரம் குறித்து பிரதமர் மோடியும்
விளக்கமளிக்கத் தயாராக இருக்கிறார் என்றார் அனந்த் குமார்.
-
---------------------------------
தினமணி