29 லட்சம் என்.ஜி.ஓ.,க்களா?; மிரண்டது சுப்ரீம் கோர்ட்

புதுடில்லி
: 'நாடு முழுவதும், 29 லட்சம், என்.ஜி.ஓ., எனப்படும்
அரசு சாரா அமைப்புகள் உள்ளனவா; இவற்றின் உண்மையான
செயல்பாடு தான் என்ன; இவற்றை கட்டுப்படுத்த போதிய
சட்டப் பிரிவுகள் உள்ளனவா' என, சுப்ரீம் கோர்ட், சரமாரி கேள்வி
எழுப்பியுள்ளது.

'என்.ஜி.ஓ.,க்களுக்கு கிடைக்கும் நிதி, நன்கொடைகளை கட்டுப்
படுத்தவும், அவற்றை முறையாக பயன்படுத்தவும் வழிமுறைகளை
உருவாக்க வேண்டும்' என, சுப்ரீம் கோர்ட்டில் பொது நலன் வழக்கு
தொடரப்பட்டுள்ளது.

இதை விசாரித்த, தலைமை நீதிபதி, டி.எஸ்.தாக்குர் தலைமையிலான
அமர்வு கூறியதாவது:

நாடு முழுவதும், 29 லட்சம் என்.ஜி.ஓ.,க்கள் உள்ளதாகவும், அதில்,
80 சதவீதம், வெளிநாடுகளில் இருந்து நன்கொடைகளை பெறுவதாகவும்
கூறப்பட்டுள்ளது. என்.ஜி.ஓ., என்றால் என்ன; யார் வேண்டுமானாலும்
பதிவு செய்து துவங்கி விடலாமா;

இவற்றை கண்காணிக்க போதுமான கட்டுப்பாடுகள் இருக்க வேண்டாமா?
இவ்வாறு முறைப்படுத்த போதிய சட்டங்கள் இல்லாவிட்டால், இவற்றை
கட்டுப்படுத்தவே முடியாது.

உலகெங்கிலும் இருந்து இவர்களுக்கு நிதி கிடைக்கிறது;
இது மிகவும் முக்கியமான பிரச்னை. அதிர்ச்சி அளிக்கக் கூடியதாக உள்ளது
இந்த பிரச்னை. இந்த என்.ஜி.ஓ.,க்களை பதிவு செய்ய, கட்டுப்படுத்த,
நன்கொடைகளை பெறுவதற்கு, நிதியை பயன்படுத்த போதிய சட்டங்கள்
உள்ளதா என்பது குறித்து ஆராய வேண்டும்.

இதற்காக கோர்ட்டுக்கு உதவ, மூத்த வழக்கறிஞர் ராகேஷ் திவேதி,
'அமிகஸ் கியூரி'யாக நியமிக்கப்படுகிறார். இது தொடர்பான சட்டங்களை
கொண்டு வருவது குறித்து, சட்ட கமிஷனுக்கும் பரிந்துரை செய்யப்படும்.
இவ்வாறு நீதிபதிகள் குறிப்பிட்டனர்.

இந்த வழக்கில், சுப்ரீம் கோர்ட் உத்தரவின்படி, நாடு முழுவதும் உள்ள,
என்.ஜி.ஓ.,க்கள் குறித்த விபரங்களை, சி.பி.ஐ., நேற்று தாக்கல் செய்தது;
அதில் கூறப்பட்டுள்ளதாவது:

நாட்டிலேயே மிகவும் அதிகமாக, மஹாராஷ்டிராவில், 5.18 லட்சம்,
என்.ஜி.ஓ.,க்கள் உள்ளன. கேரளாவில், 3.69; மேற்கு வங்கத்தில், 2.34;
தமிழகத்தில், 1.55; ஆந்திராவில், 2.92; மத்திய பிரதேசத்தில், 1.36 லட்சம்
என்.ஜி.ஓ.,க்கள் உள்ளன. இவ்வாறு அதில் கூறப்பட்டுள்ளது.
-
------------------------------------------------
தினமலர்

5 /6 பேர்கள் சேர்ந்தால் ஒரு NGO குழு ஆரம்பிக்கலாம் .
தமிழ் மேம்பாட்டுக்கு என்று சொல்லி 5/6 பேர் சேர்ந்து ஒரு NGO ஆரம்பித்து ,
உதவிகள் , நன்கொடைகள் பெறலாம் .
சுகமாக இருக்கலாம் .

ரமணியன்