"சூரிய ஒளி மின்சக்தி உற்பத்தியை அதிகரிக்க தீவிர நடவடிக்கை'

-
சூரிய ஒளி மின்சக்தி உற்பத்தியை அதிகரிக்க தீவிர
நடவடிக்கைகள் மேற்கொள்ளப்பட்டு வருகின்றன என்று
அண்ணா பல்கலைக்கழக ஆற்றல் படிப்புத்துறை
இயக்குனர் ஆர்.வேல்ராஜ் கூறினார்.

சென்னை வண்டலூரை அடுத்த கொளப்பாக்கம் ஸ்ரீராமானுஜர்
பொறியியல் கல்லூரியின் செவ்வாய்க்கிழமை நடைபெற்ற
10-ஆவது பட்டமளிப்பு விழாவில் அவர் பேசியதாவது:

நாட்டில் தற்போது மின் உற்பத்திக்கென செயல்படுத்தப்பட்டு
வரும் தொழில்நுட்பங்களில் மாசற்ற, வலுவான, நிலையான
தொழில்நுட்பமாகத் திகழ்ந்து வரும் சூரிய மின்சக்தி தொழில்
நுட்பத்தைப் பயன்படுத்தி மின் உற்பத்தியை அதிகரிக்க
பல்வேறு தீவிர நடவடிக்கைகள் மேற்கொள்ளப்பட்டுள்ளன.

இந்திய அளவில் காற்றாலை மூலம் உற்பத்தி செய்யப்படும்
மொத்த மின்சாரத்தில் 50 சதவீதம் தமிழ்நாட்டில் மட்டுமே
உற்பத்தி செய்யப்படுகிறது.

2022-ஆம் ஆண்டுக்குள் 175 ஜிகாவாட் சூரிய மின்சக்தி இந்திய
அளவிலும், 3500 மெகாவாட் சூரிய மின்சக்தி தமிழக அளவிலும்
உற்பத்தி செய்ய இலக்கு நிர்ணயிக்கப்பட்டு,
அதற்கான தீவிர நடவடிக்கைகள் மேற்கொள்ளப்பட்டுள்ளன.

இந்தியா சுதந்திரம் அடைந்தபோது இந்தியாவின் மொத்த மின்
உற்பத்தி 1500 மெகாவாட் தான். தற்போது மின் உற்பத்தி 3 லட்சம்
மெகாவாட்டாக உயர்ந்துள்ளது.

மின்சக்தி உற்பத்திக்கு தற்போது அதிக அளவில் பயன்
படுத்தப்பட்டு வரும் நிலக்கரி, எண்ணெய் தொழில்நுட்பம் மூலம்,
35 சதவீத வெப்ப ஆற்றல் மட்டுமே மின்சக்தியாக மாற்றப்படுகிறது.
65 சதவீத வெப்ப ஆற்றல் வீணாவதுடன், புவி வெப்பத்தையும்
அதிகரிக்கச் செய்கின்றன.

கரியமில வாயு உள்ளிட்ட இதர வாயுக்கள் காற்றில் கலந்து
சுற்றுச்சூழல் பாதிப்பை ஏற்படுத்துகிறது.
ஆகவே, சூரிய ஒளி மின்சக்தி தொழில்நுட்பத்தை மேம்படுத்துவதில்
அக்கறை செலுத்தி வரும் அரசின் நடவடிக்கைக்கு உறுதுணையாகத்
திகழும் வகையில் ஆராய்ச்சி நடவடிக்கைகளில் கவனம்
செலுத்துங்கள் என்றார் அவர்.

விழாவில் 403 மாணவர்களுக்கு பட்டங்கள் வழங்கப்பட்டன.
-
----------------------------------------
தினமணி