" நுங்கம்பாக்கம் "

**M.Jagadeesan** · **M.Jagadeesan** Sun Sep 11, 2016 7:39 am

" ஏன் லேட் ? " அப்பா கேட்டார் .

அப்பா கேட்ட கேள்விக்கு
முதல் முறையாகப் பொய் சொன்னேன் !
அவரைத்
தலைநிமிர்ந்து பார்க்கும் தைரியம்
எனக்கு இல்லாமல் போனது .

அப்பா எதுவும் பேசாமல் அமைதி ஆனார்.

அன்று இரவு
நிம்மதியான தூக்கம் இல்லை .
அப்பா
அதிர்ந்து பேசும்போதும் , ஆத்திரப் படும்போதும்
கவலைப்படாத என்மனம்
அவரது ஆழ்ந்த மௌனத்தைக்கண்டு அச்சமடைந்தது .

பொழுது விடிந்தது
எல்லாமே எந்திர கதியில் நடந்தது .
கல்லூரி சென்றுவிட்டு
மாலையில் வீடு திரும்பியபோது
மஞ்சள் பையுடன் ஒருவர் வெளியே சென்றார் .

அவசர அவசரமாக
அடுக்களைக்குச் சென்று அம்மாவிடம் கேட்டேன் .
" யாரம்மா அது ? "
" கல்யாணத் தரகர் "
" யாருக்குக் கல்யாணம் ? "
" உனக்குத்தான் ! "
" எனக்குக் கல்யாணமா ? அதுவும் எனக்குத் தெரியாமலா ? "
அம்மா எதுவும் பேசவில்லை .
" அம்மா ! என் கேள்விக்கு என்ன பதில் ? "

" நுங்கம்பாக்கம் "