தமிழகத்தின் வட மாவட்டங்களில் சில இடங்களில் இன்று மழை பெய்யும்

**ayyasamy ram** · **ayyasamy ram** Fri Aug 26, 2016 6:26 am

சென்னை,

மத்திய வங்கக்கடல் வளி மண்டலத்தில் மேலடுக்கு சுழற்சி
நிலவுவதால், தமிழகத்தின் வட மாவட்டங்களில் சில இடங்களில்
மழை பெய்யும் என்றும் இன்று குறைந்த காற்றழுத்த தாழ்வு நிலை
உருவாக வாய்ப்பு உள்ளது என்றும் வானிலை மைய
இயக்குனர் எஸ்.பாலச்சந்திரன் தெரிவித்தார்.

மேலடுக்கு சுழற்சி

தமிழ்நாட்டில் தென் மேற்கு பருவமழை காலம் நடைபெற்று
வருகிறது. இந்த நிலையில் குறைந்த காற்றழுத்த தாழ்வு நிலை
இன்று உருவாகிறது என்று வானிலை மையம் தெரிவித்துள்ளது.
அது குறித்து சென்னை வானிலை மைய இயக்குனர்
எஸ்.பாலச்சந்திரன் கூறியதாவது:-

மத்திய மேற்கு வங்கக்கடல் வளி மண்டல பகுதியில்
மேலடுக்கு சுழற்சி நிலவுகிறது. இதனால் அடுத்த
24 மணிநேரத்தில் (இன்று) குறைந்த காற்றழுத்த தாழ்வு
நிலை உருவாகும்.

இன்று மழை பெய்யும்

மேலடுக்கு சுழற்சி காரணமாக இன்று (வெள்ளிக்கிழமை)
தமிழ்நாட்டின் வடமாவட்டங்களில் சில இடங்களில் மழை
அல்லது இடியுடன் கூடிய மழை பெய்யும்.

தென் மாவட்டங்களில் ஓரிரு இடங்களில் மழை பெய்யும்.
சென்னையில் வானம் மேக மூட்டமாக இருக்கும். சென்னையின்
சில பகுதிகளில் சில நேரங்களில் மழை பெய்ய வாய்ப்பு உண்டு.

தென் மேற்கு பருவமழையை பொறுத்தவரை நேற்றைய
நிலவரப்படி 170 மில்லி மீட்டர் மழை பெய்துள்ளது.

ஆனால் சராசரியாக 183 மில்லி மீட்டர் மழை பெய்யவேண்டும்.
அதாவது 7 சதவீதம் குறைவாக பெய்துள்ளது.

இவ்வாறு இயக்குனர் எஸ்.பாலச்சந்திரன் தெரிவித்தார்.

மழை அளவு

நேற்று காலை 8.30 மணியுடன் 24 மணிநேரத்தில் பெய்த மழை
அளவு வருமாறு:-

வானூர் 6 செ.மீ., புதுச்சேரி 5 செ.மீ., மயிலம், விருதுநகர், செஞ்சி
தலா 3 செ.மீ., கீழ் கோதையாறு , குன்னூர், பெருந்துறை,
காட்டுக்குப்பம் தலா 2 செ.மீ., வேதாரண்யம், தரங்கம்பாடி,
நடுவட்டம், பவானி, திருமங்கலம், வால்பாறை, உத்திரமேரூர்
தலா 1 செ.மீ. மழை பெய்துள்ளது
-
----------------------------
தினத்தந்தி

தமிழகத்தின் வட மாவட்டங்களில் சில இடங்களில் இன்று மழை பெய்யும்

தமிழகத்தின் வட மாவட்டங்களில் சில இடங்களில் இன்று மழை பெய்யும்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக