‘மூட்டை முடிச்சுகளை கட்டுங்கள்’- ட்விட்டர் கலாய்ப்புகளை கண்ணியமாக விளாசிய சாய்னா

-
சாய்னா நேவால் | தி இந்து.
—————————————
பாட்மிண்டன் வீராங்கனை சாய்னா நேவாலுக்கு மைதானத்தில் லாவகமாக பந்துகளை விளாச மட்டும் தெரிந்திருக்கவில்லை தன் மீதான கலாய்ப்புகளையும் கண்ணியமாக விளாசத் தெரிந்திருக்கிறது அவருக்கு.

ரியோ ஒலிம்பிக் துவங்குவதற்கு முன்பிருந்தே சாய்னா நிச்சயம் பதக்கம் பெற்றுத்தருவார் என எதிர்பார்க்கப்பட்டது. ஆனால், அவர் காயம் காரணமாக வெளியேறிவிட்டார்.

ஆனால் பி.வி.சிந்து வெள்ளி வென்றுள்ளார். சிந்து வெள்ளிப் பதக்கம் வென்றதை ஒப்பிட்டு சாய்னாவை பழிக்கும் வகையில் ட்விட்டரில் ஒருவர் புண்படுத்தும் கருத்தை பதிந்தார்.

anshul sagar @ImAnshS6 என்பவர் ட்விட்டரில், “மூட்டை முடிச்சுகளைக் கட்டுங்கள் சாய்னா. சாதனையாளர்களை வீழ்த்தும் ஒருவர் எங்களுக்கு கிடைத்துவிட்டார்” என்றார்.

இதற்கு பதிலளித்த சாய்னா (@NSaina), “நிச்சயமாக கிடைத்திருக்கிறார். நன்றி. சிந்து நன்றாக விளையாடுகிறார். இந்தியா சிறப்பாக செயல்படுகிறது” என கண்ணியமாக பதிலளித்தார்.

அன்சூலின் பதிவுக்கு பலரும் அவரை திட்டித்தீர்க்க ட்விட்டரில் மன்னிப்பு கேட்டார் அவர். “உங்களை புண்படுத்தியதற்காக வருந்துகிறேன்” என அவர் பதிவிட்டார்.

மேலும் மற்றொரு பதிவில், “உங்களை காயப்படுத்த வேண்டும் என்பதற்காக நான் சொல்லவில்லை. நான் தங்களது மிகப்பெரிய விசிறி. இப்போதும் தங்களை நேசிக்கிறேன்” எனப் பதிவிட்டார்.

சாய்னாவின் இந்த அணுகுமுறையை சமூக வலைதளவாசிகள் பலரும் நெகிழ்ச்சியுடன் பாராட்டிப் பகிர்ந்து வருகிறார்கள்.