முதுமையை முந்தித் தரும் மின்னணு சாதனங்கள்

முதுமையை முந்தித் தரும் மின்னணு சாதனங்கள்

மின்னணு சாதனங்களை மிக அதிகமாகப் பயன்படுத்துவதனால், நமக்கு முதுமை, அதன் காலத்திற்கு முன்பே வந்துவிடும் வாய்ப்புகள் இருப்பதாக, பல மருத்துவ அறிஞர்கள் எச்சரித்துள்ளனர். மொபைல் போன்கள், டேப்ளட் பி.சி.க்கள் பயன்படுத்துவதனால், “tech neck” என்னும் உடல் குறைபாடு ஏற்பட்டு, அது முதுமையான தோற்றத்தை மக்களுக்குத் தருகிறது என மருத்துவர்கள் தெரிவித்துள்ளனர்.
“tech neck” என்னும் உடல் குறைபாடு, நம் சருமத்தினை தொய்வுறச் செய்கிறது. தாடை எலும்பினை கீழாக இழுக்கிறது. இதனால், நம்


முகத்தோற்றம் கடுமையாகப் பாதிக்கப்படுகிறது. முகச் சுளிப்பு எப்போதும் அமைவது போல் ஒரு தோற்றம் முகத்தில் ஏற்படுகிறது. கண்களுக்குக் கீழே கருப்பு வளையங்கள் தோன்றுகின்றன. கழுத்தைச் சுற்றிலும் கோடுகள் உருவாகி, கொழுப்புச் சத்தின் தாக்கத்தைக் காட்டுகின்றன.
ஸ்மார்ட் போன், டேப்ளட் பி.சி. அல்லது கம்ப்யூட்டர் என பெரும்பாலும் கைகளில் மின்னணு சாதனங்களைப் பயன்படுத்துபவர்கள், பல மணி நேரம் சற்று குனிந்தே வேலை பார்க்கின்றனர். ஸ்மார்ட் போன்களில் இந்த குனிந்த நிலையில் செயல்பட்டு டெக்ஸ்ட் அமைப்பவர்களுக்கு, கழுத்து, உடலின் பின்புறம் மற்றும் தோள்பட்டைகளில் வலி ஏற்படுகிறது. இந்த வலி தவிர, தலைவலி, உடல் மரத்துப்போகும் உணர்ச்சி, தோள் எலும்புகளில் குறுகுறுப்பு, கைகளில் வலி, தோள்பட்டையில் வலி ஆகியவை ஏற்படுகின்றன என்று, மும்பை போர்டிஸ் மலர் மருத்துவமனையில் பணியாற்றும் அறுவை சிகிச்சை நிபுணர் வினோத் விஜ் அறிவித்துள்ளார்.
அண்மையில், இந்திய இணையம் மற்றும் மொபைல் அமைப்பு (Internet and Mobile Association of India (IAMAI)) இந்தியாவில், மொபைல் வழி இணையம் பயன்படுத்துவோர் எண்ணிக்கை 3.71 கோடியை எட்டும் என அறிவித்துள்ளது. இதில் 40% பேர், 19முதல் 30 வயதுள்ளவராக இருக்கின்றனர் என்றும் தெரிவித்துள்ளது. இவர்கள், அடிக்கடி, தங்கள் முதுகை முன்புறமாக வளைத்தே, மின்னணு சாதனங்களைப் பயன்படுத்தும் பழக்கம் உள்ளவர்களாக உள்ளனர். இந்தப் பழக்கம், கழுத்து எலும்பு முட்கள், வளைவுகள், கழுத்துக்கு ஆதரவு கொடுக்கும் தசை நார்கள் ஆகியவற்றில் படிப்படியாக சேதம் ஏற்படுத்துகின்றன. இது வளர்ந்து அதிக வலியைத் தரும்போது மட்டுமே, இவர்கள் இதனை உணர்கின்றனர். இந்த சேதங்கள், பின் நாளில் வரும் முதுமைப் பிரச்னைகளை, இளம் வயதிலேயே அளிக்கின்றன.
மோகன் தாமஸ் என்ற அறுவை சிகிச்சை நிபுணர் இது பற்றிக் கூறுகையில், மக்கள் பொதுவாக நம் உடல் நலத்திற்கு மாறுதலான விளைவை உருவாக்கும் மின்னணு சாதனப் பழக்கத்தினைக் குறைத்துக் கொள்ள வேண்டும். அல்லது, சரியான நிலையில் வைத்து, இவற்றைப் பயன்படுத்த வேண்டும் என்று எச்சரித்துள்ளார்.
தொடர்ந்து இது பற்றிக் கூறுகையில், கழுத்து சதை சுருங்குவதுடன், அது சருமத்தின் ஈர்ப்பு சக்தியை கீழ் நோக்கி இழுக்கிறது. இதன் விளைவாக, சருமம் தொய்வுறுகிறது. மோவாய்க் கட்டை இரண்டாகக் காட்சி அளிக்கிறது. உதடுகளிலிருந்து, முகவாய்க்கு நெட்டுக் கோடுகள் ஏற்படுகின்றன.
கீழ் தாடை அதன் இடத்தில் இல்லாமல் அலை பாயும் நிலைக்குச் செல்கிறது. இவை அனைத்தும் மொத்தத்தில் முதுமைத் தோற்றத்தினைக் கொடுக்கின்றன. தற்போது, மருத்துவ உலகில், இந்த நிலையைக் கொண்டவர்களின் முகத்தினை “smartphone face,” என்று குறிப்பிடுவதாகவும் கூறியுள்ளார்.
நன்றி இணையம்