திருமலையில் ஆகஸ்ட் மாத ஆர்ஜித சேவா டிக்கெட்டுகள் வெளியீடு

திருமலை ஏழுமலையானின் ஆர்ஜித சேவா டிக்கெட்டுகளின் ஆகஸ்ட் மாத கோட்டாவை தேவஸ்தானம் வெளியிட்டது.

திருமலை திருப்பதி தேவஸ்தானம் மாதந்தோறும் முதல் வெள்ளிக்கிழமை காலை 11 மணிக்கு ஆர்ஜித சேவா டிக்கெட்டுகளை இணையதளத்தில் வெளியிட்டு வருகிறது. கடந்த ஜூலை மாதம் 1-ஆம் தேதி சுமார் 1 லட்சத்துக்கும் மேற்பட்ட ஆர்ஜித சேவா டிக்கெட்டுகள் இணையதளத்தில் வெளியிடப்பட்டன.

அதில் ஆகஸ்ட் மாதத்துக்கு முன்பதிவு செய்யப்படாமல் நிலுவையில் உள்ள ஆர்ஜித சேவா டிக்கெட்டுகளை தேவஸ்தானம் வெளியிட்டுள்ளது. இந்த டிக்கெட்டுகளை திருமலைக்கு வரும் பக்தர்கள் பெற்று ஆர்ஜித சேவையில் ஏழுமலையானை தரிசிக்கலாம்.

இந்த டிக்கெட்டுகளை பெற பக்தர்கள் தரிசன தேதிக்கு முன்தினம் திருமலை விஜயா வங்கியில் காலை 11 மணியிலிருந்து மாலை 5 மணிக்குள் தங்கள் பெயர், செல்லிடப்பேசி எண், பெருவிரல் ரேகை பதிவு மூலம் டிக்கெட்டை முன்பதிவு செய்ய வேண்டும்.

அவ்வாறு பதிவு செய்த டிக்கெட்டுகளை குலுக்கல் மூலம் தேர்ந்தெடுத்து சம்பந்தப்பட்ட பக்தரின் செல்லிடப்பேசி எண்ணுக்கு குறுந்தகவல் அனுப்பப்படும். அதை பெற்ற பக்தர் விரைந்து சென்று பணம் செலுத்தி டிக்கெட்டை பெற்றுக் கொண்டு, அதில் குறிப்பிட்டுள்ள நேரத்தில் சென்று ஏழுமலையானை தரிசிக்கலாம்.

டிக்கெட் விவரம்: ஆகஸ்ட் 2-ஆம் தேதி 6 தோமாலை, 17 அர்ச்சனா, 3-ஆம் தேதி 7 தோமாலை, 15 அர்ச்சனா, 4-ஆம் தேதி 7 தோமாலை, 26 அர்ச்சனா, 5-ஆம் தேதி 1 மேல்சாட் வஸ்திரம், 35 பூராபிஷேகம், 9-ஆம் தேதி 6 தோமாலை, 12 அர்ச்சனா, 10-ஆம் தேதி 5 தோமாலை, 18 அர்ச்சனா, 11-ஆம் தேதி 9 அர்ச்சனா, 12-ஆம் தேதி 2 மேல்சாட் வஸ்திரம், 17-ஆம் தேதி 31 அர்ச்சனா, 19-ஆம் தேதி 2 மேல்சாட் வஸ்திரம், 23-ஆம் தேதி 6 அர்ச்சனா, 25-ஆம் தேதி 17 அர்ச்சனா, 26-ஆம் தேதி 1 மேல்சாட் வஸ்திரம், 31-ஆம் தேதி 45 அர்ச்சனா டிக்கெட்டுகள் நிலுவையில் உள்ளன.

இந்த வாய்ப்பை பக்தர்கள் பயன்படுத்தி கொண்டு ஆர்ஜித சேவையில் ஏழுமலையானை தரிசிக்கலாம் என தேவஸ்தானம் தெரிவித்துள்ளது.
-
தினமணி

ஏழுமலையான் கோயில் உண்டியல் காணிக்கை ரூ. 3.48 கோடி
-
திருமலை ஏழுமலையான் கோயில் உண்டியல் காணிக்கை ரூ. 3.48 கோடி வசூலானது.

திருமலைக்கு வரும் பக்தர்கள் ஏழுமலையானை தரிசித்தபின், ஸ்ரீவாரி உண்டியலில் தங்களால் இயன்ற காணிக்கைகளை செலுத்தி வருகின்றனர். அதன்படி வெள்ளிக்கிழமை மாலை முதல் சனிக்கிழமை மாலை வரை பக்தர்கள் உண்டியல் செலுத்திய காணிக்கைகளைக் கணக்கிட்டதில் ரூ. 3.48 கோடி வசூலானதாக தேவஸ்தானம் தெரிவித்துள்ளது.

82,518 பேர் தரிசனம்: ஏழுமலையானை சனிக்கிழமை 82,518 பேர் தரிசனம் செய்துள்ளனர். 39,459 பேர் தலைமுடியை காணிக்கையாக செலுத்தினர்.

ஞாயிற்றுக்கிழமை காலை தர்ம தரிசன பக்தர்கள் 20 காத்திருப்பு அறைகளிலும், நடைபாதை பக்தர்கள் 4 அறையிலும் காத்திருந்தனர். தர்ம தரிசனத்துக்கு 6 மணி நேரமும், நடைபாதை பக்தர்களுக்கு 3 மணி நேரமும் ஆனது.

ரூ. 31 லட்சம் நன்கொடை: ஏழுமலையானின் அன்னதான அறக்கட்டளைக்கு தெலங்கானா பகுதியைச் சேர்ந்த ராமாஞ்சநேயலு ரூ. 10 லட்சம், கோ சம்ரக்ஷண அறக்கட்டளைக்கு பெங்களூரு மஞ்சுநாத் ரூ.10 லட்சம், பெயர் சொல்ல விரும்பாத பக்தர்கள் 6 பேர் ரூ. 11 லட்சம் என மொத்தம் ரூ. 31 லட்சத்தை சனிக்கிழமை நன்கொடையாக அளித்தனர்.
-
தினமணி