கனவு நீங்கிய தருணங்கள்

**ayyasamy ram** · **ayyasamy ram** Wed Jul 20, 2016 10:18 pm

-
நிலைப்படி தாண்டாத
மனத்தின் விரலிடுக்கில்
புரையோடிப் போயிருந்தது
களிம்பிடாமல் வைத்திருந்த
இருத்தலின் காயங்கள்
–
நித்தமும் எரிந்து
சமைத்துச் சலித்திருக்கும்
அடுப்பில் பொங்கிப்
பரவியிருந்த பாலின் கறையை
சுத்தம் செய்யாமலே
உறங்கச் செல்கின்றாள்
இரவுகளுக்கும்
விடியல்களுக்கும்
இடைப்பட்ட பொழுதுகளில்
–
வெகுதூரம் பயணிக்கிறாள் அவள்
ஆணிவேர்களை
அலட்சியம் செய்து விட்டு
உதிரும் இலையென
இலகுவாய் மிதந்து
காற்றில் அலைகிறாள்
–
காய்ந்த சிறகுகளில்
பெரும் அனல் மூட்டி
கையில் திணிக்கப்பட்ட
வழிகாட்டி வரைபடத்தை
இலக்குகளோடு சேர்த்து
எரித்துச் சாம்பலாக்குகிறாள்

**ayyasamy ram** · **ayyasamy ram** Wed Jul 20, 2016 10:18 pm

–
நிலவற்ற அடர்காட்டில்
மின்மினிப் பூச்சிகளின்
ஒளி பற்றி அடியெடுத்து
நெடுந்தூரம் நடக்கிறாள்
–
வாடையில் வெம்மையாய்
வெப்பத்தில் குளிராய்
மழையில் வேட்கையாய்
தனக்குத் தானே இயற்கையை
தகவமைத்துக் கொள்கிறாள்
–
பயணத்தின் முடிவில்
ஒரு பால்வீதி வருகிறது..
நீந்த யத்தனிக்கும் முன்
விடியலின் ஒளி வீச்சில்
நிறம் மாறுகின்றன பாதைகள்
–
கரி துடைக்கும் துணியால்
பால்கறையை சுத்தம்
செய்து கொண்டிருக்கிறாள்
கனா நீங்கிய தருணங்களின்
சாயல்கள் சிறிதுமற்று
–
——————————
-லதா அருணாச்சலம்
குங்குமம்

கனவு நீங்கிய தருணங்கள்

கனவு நீங்கிய தருணங்கள்

Re: கனவு நீங்கிய தருணங்கள்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக