பிரிய(கி)ங்கா? - காங்கிரஸ் உத்தி தேறுமா? தேறாதா?

எத்தைத் தின்றால் பித்தம் தெளியும் என்ற இடத்துக்கு
காங்கிரஸ் வந்திருக்கிறது என்பதற்கு சமீபத்திய உதாரணம்,
பிரியங்கா காந்திக்கான முக்கியத்துவம்,

ஏற்கெனவே சோனியா, ராகுலின் பிரசாரக்குழு மேலாளராகச்
செயல்பட்ட வரை, விரைவில் நடைபெறவிருக்கும் உத்தரப்
பிரதேச மாநிலத் தேர்தல் பிரசார குழுவுக்குத் தலைவராக்கியுள்ளது
காங்கிரஸ்.

காங்கிரஸ் இல்லாத பாரதம்
-
சுதந்திரம் வாங்கித்தந்த கட்சி என்ற ஹோதாவில் வலம்வந்து
கொண்டிருந்த காங்கிரஸ், தனது 130 ஆண்டுகால வரலாற்றில்
ஆகப்பெரிய பின்னடைவைச் சந்தித்திருக்கிறது. நாட்டின் பிரதான
எதிர்க்கட்சி அந்தஸ்துகூட அதிகார பூர்வமாக காங்கிரஸ்
வசமில்லை என்பது அதற்கான சாட்சியம்.
-
போதாக்குறைக்கு, ஆட்சிக்கு வந்ததும் 'காங்கிரஸ் இல்லாத பாரதம்'
என்ற அரசியல் முழக்கத்தை முன்வைத்து பா.ஜ.க. தீவிர
பிரசாரத்தில் ஈடபட்டுக் கொண்டிருக்கிறது.

சமீபத்தில் தேர்தல் நடந்த பல மாநிலங்களில் காங்கிரஸ் அல்லாத
கட்சிகளே அதிக அளவில் வெற்றி பெற்றன. குறிப்பிடத்தக்க வெற்றி
எதையும் காங்கிரஸ் பெற்றுவிடவில்லை.

இன்னொரு பக்கம், இதுவரை தடம் பதிக்காத கேரளம், மேற்கு
வங்கத்தில் எல்லாம் பா.ஜ.க. கணக்கு தொடங்கி விட்டது.

நிலைமை இப்படியே நீடிக்கும் பட்சத்தில் அடுத்த மக்களவைத்
தேர்தலிலும்கூட காங்கிரஸ் ஆட்சியமைக்க வாய்ப்பில்லை என்பதே
யதார்த்தம். அதற்காக அப்படியே விட்டு விடமுடியுமா என்ன...
எல்லாம் தீர்ந்து போவதற்குள் ஏதாவது செய்தே தீரவேண்டும்
அல்லவா?

அதற்காக காங்கிரஸ் கண்டுபிடித்திருக்கும் புதிய உபாயம்தான்;
உத்தரப்பிரதேசத் தேர்தலும் பிரியங்கா காந்தியின் வருகையும்.
-
--------------------------------------

வெற்றி முக்கியம், வேகத்தடை அதிவிட!
-
இந்தியாவின் மிகப்பெரிய மாநிலம் உத்தரப் பிரதேசம்.
நாட்டை ஆளப்போவது யார் என்பதைத் தீர்மானிக்கும்
சக்தி படைத்த மாநிலமும் கூட, ஆகவே, அங்கு பெறுகின்ற
ஒவ்வொரு வெற்றியும் எந்தவொரு அரசியல் கட்சிக்கு
முக்கியமானது.

அதிலும் குறிப்பாக, தோல்விப் பள்ளத்தாக்கில் துவண்டு
கிடக்கும் காங்கிரஸ் மீண்டும் துளிர்த்தெழ விரைவில்
நடைபெறவிருக்கும் உ.பி. சட்டமன்றத் தேர்தல்
முக்கியமானது.

உண்மையில், அங்கே போட்டி என்பது சமாஜ்வாதி,
பகுஜன் சமாஜ் இடையில்தான். ஆனால் சமீபத்திய
மக்களவைத் தேர்தலில் பெற்ற பிரம்மாண்ட வெற்றியின்
மூலம் பா.ஜ.க. அங்கே பேருருவம் கொண்டுள்ளது.
அந்த வகையில் உ.பி.யில் காங்கிரஸ் என்பது
போட்டியிலேயே இல்லை.

ஆனாலும் நேரு குடும்பத்தின் மீது உ.பி. மக்களுக்கு எப்போதும்
பாசமுண்டு, மரியாதையுண்டு. அதுவே காங்கிரஸின் விதை நெல்,
அதைக் கொண்டு, வரவிருக்கும் தேர்தலில் ஏதேனும் செய்துவிட
வேண்டும் என்று விரும்புகிறது காங்கிரஸ்.
-
சோனியா இருக்கும்போதுதான் காங்கிரஸ் அதலபாதாளத்தில்
வீழந்தது. ராகுல் காந்தியாலும் பெரியதாகச் சாதிக்க முடிய
வில்லை. எனில், இப்போதிருக்கும் ஒரே வாய்ப்பு, பிரியங்கா காந்தி,
நேரு குடும்பத்து முகம். பாட்டி இந்திராவின் முகச்சாயல் கொண்டவர்.

இதுவரை தோல்வி எதையும் சந்தித்திராத முகம்.
ஆகவே பிரியங்காவைக் காட்டி வெற்றியை அறுவடை செய்துவிட
முடியும். ஆம், பிரியங்காவைக் கொண்டு பெண்கள் வாக்குகளை
வசீகரிக்க முடியும்; இளைய தலைமுறையின் வாக்குகளையும்
கவரமுடியும்; திசைமாறிப்போன காங்கிரஸின் பாரம்பரிய
வாக்குகளையும் மறுதிரட்டல் செய்ய முடியும் என்பது காங்கிரஸின்
கணிப்பு.
-
அதேசமயம், உ.பி.யில் ஆட்சியைப் பிடிப்பது காங்கிரஸின்
நோக்கமாக இருக்க முடியாது. அது உடனடியாகச் சாத்தியமல்ல என்பது
காங்கிரஸ் தலைமைக்கும் தெரியும். ஆனால் அதைவிட முக்கியமான
காரியம் ஒன்று இருக்கிறது. அது பா.ஜ.க.வின் வெற்றி ஓட்டத்தை தடுத்து
நிறுத்துவது.

கடந்த மக்களவைத் தேர்தலில் உ.பி. யில் உள்ள 80 தொகுதிகளில்
71 தொகுதிகளை பா.ஜ.க.வும் அதன் கூட்டணி கட்சியான அப்னா தளம்
2 தொகுதிகளையும் கைப்பற்றின. எஞ்சிய ஏழு மட்டுமே ஏனைய
கட்சிகளுக்குக் கிடைத்தன.
-

பெருவெற்றி பெற்ற பா.ஜ.க., வரவிருக்கும் சட்டமன்றத் தேர்தலிலும்
அதேபோன்றதொரு வெற்றியைப் பெற வியூகம் வகுத்துக்
கொண்டிருக்கிறது. அதன் நீட்சியாகவே, சமீபத்தில் நடந்த மத்திய
அமைச்சரவை மாற்றத்தில் உ.பி.யைச் சேர்ந்தவர்கள்
அமைச்சர்களாக்கப்பட்டுள்ளார்கள். உ.பி.யின் கூட்டணிக் கட்சியான
அப்னா தளமும் அமைச்சரவையில் சேர்ந்துள்ளது.
-
ஆக, உ.பி.யைக் குறிவைத்து பா.ஜ.க. வகுத்து வருகின்ற வியூகங்களை
முறியடிக்கவேண்டும் என்பதும் காங்கிரஸின் நோக்கங்களுள் ஒன்று.
இப்போது காங்கிரஸையும் துளிர்த்தெழச் செய்ய வேண்டும்
-
.பா.ஜ.க.வின் வேகத்துக்கும் தடைபோட வேண்டும் என்றால் அதற்கு
ஒரே வழி, பிரியங்கா காந்தியின் முகத்தைப் பயன்படுத்துவதுதான்
என்ற முடிவுக்கு காங்கிரஸ் வந்திருக்கிறது.
அதன் வெளிப்பாடுதான் பிரியங்காவுக்குத் தரப்படும் முக்கியத்துவம்.
-
---------------------------------

சாத்தியங்களும் சவால்களும்
-
உ.பி.யில் நேரு காலத்திலெல்லாம் காங்கிரஸ் வரைந்ததே வட்டம்.
ஆனால் இந்திரா காலத்தில் லேசான மாற்றம் ஏற்பட்டது.
சஞ்சய் கைங்கர்யத்தால் ஏற்ற இறக்கங்கள் இருந்தன.
ராஜீவ் காலத்தில் தொடங்கிய தடுமாற்றம் மெல்ல மெல்ல மிக
மோசமான நிலைமைக்கு நகர்ந்துவிட்டது. காங்கிரஸைத் தோள்
மீது வைத்திருந்த உ.பி. வாக்காளர்கள், மெல்ல மெல்ல காங்கிரஸிலிருந்து
விலகி பிராந்தியக் கட்சிகளின் பக்கம் நகர்ந்துவிட்டனர்.
-
கடந்த சில பத்தாண்டுகளாக உ.பி. அரசியல் மாநிலக் கட்சிகளைச்
சுற்றியே நடக்கிறது. தேசியக் கட்சிகள் பார்வையாளர்கள் மட்டுமே.
சமீபத்தில் அதில் லேசான மாற்றம். அதுவும்கூட காங்கிரஸுக்கு
அலல, பா.ஜ.க.வுக்குக் சாதகமானது. விளைவு,
-
ஆளும் சமாஜ்வாதி, ஆண்ட பகுஜன் சமாஜ், ஆளத் துடிக்கும் பா.ஜ.க.
ஆகியோருக்கு இடையிலான மும்முனைப்போட்டியில்
காங்கிரஸுக்கான வாய்ப்பு என்பது மிகவும் சொற்பமாகிவிட்டது.
-
அதேசமயம், பிகார் சட்டமன்றத் தேர்தலில் தன்னுடைய மெய்யான
இடத்தைப் புரிந்து கொண்டு, நிதீஷ் - லாலு - காங்கிரஸ் என்ற அணியை
உருவாக்கி, பா.ஜ.க.வின் வெற்றிவாய்ப்பைத் தடுத்து நிறுத்தியது போல,
உத்திரபிரதேசத்திலம் ஒரு வியூகத்தை வகுத்து, அதைச் செயல்படுத்தும்
பட்சத்தில் காங்கிரஸுக்கான வாய்ப்புகள் (ஆட்சியை பிடிக்க அல்ல)
அதிகரிக்கலாம்

உதாரணமாக, மேற்கு வங்கத்தில் காங்கிரஸும் இடதுசாரிகளும்
செய்து கொண்ட அரசியல் புரிந்துண்ர்வு போல, அது எதிர்காலத்தில்
நடைபெறவிருக்கும் மக்களவைத் தேர்தலை எதிர்கொள்ளத்
தேவையான தெம்பைக் கொடுக்கலாம்.
-
ஆட்சியதிகாரத்திலேயே இறுதிவரை இருந்தவர் நேரு. ஆனால் இந்திரா
பெருவெற்றியையும் பார்த்திருக்கிறார்; கௌரவமான தோல்வியையும்
அடைந்திருக்கிறார். ஏறக்குறைய ராஜீவும், அப்படியே.
ஆனால் சோனியா காந்தியின் அரசியல் பாதை சற்றே வித்தியாசமானது.
மிகப் பெரிய எதிர்பார்ப்புடன் வந்தவர். அடுத்தடுத்து தோல்விகளையே
சந்தித்தார். மெல்ல மெல்ல வெற்றிபெற்றார்.

இழந்துபோன அதிகாரத்தை மீட்டெடுத்தார். பத்தாண்டுகால
ஆட்சியதிகாரத்துக்கு ஆகப்பெரிய காரணமாக இருந்தார். அதலபாதாளத்
தோல்வியின்போது அவரே தலைமைப் பொறுப்பில் இருந்தார்.

ஆக, அரசியலின் அனைத்து அம்சங்களையும் பார்த்துவிட்டார்,
மகன் ராகுல் காந்தியின் தோல்வி உள்பட, இப்போது பிரியங்கா காந்தியின்
முறை, பார்க்கலாம், பிரியங்காவின் முன்னோடி யாரென்று!
-
-------------------

- ஆர். முத்துக்குமார்
கல்கி