விரைவில் 10 ரூபாய் பாலிமர் நோட்டுக்கள்: ரிசர்வ் வங்கி துணை பொது மேலாளர்..

விரைவில் 10 ரூபாய் பாலிமர் நோட்டுக்கள்: ரிசர்வ் வங்கி துணை பொது மேலாளர்



10 ரூபாய் பாலிமர்' நோட்டுக்கள் விரைவில் வெளியிடப்படும் என்று ரிசர்வ் வங்கியின் துணை பொது மேலாளர் காயா திரிபாதி தெரிவித்துள்ளார்.

இந்திய ரிசர்வ் வங்கியின் பவள விழாவை முன்னிட்டு பாரத ஸ்டேட் வங்கி சார்பில் சென்னை கோபாலபுரத்தில் பழைய கிழிந்த ரூபாய் நோட்டுக்களை மாற்றுதல், சில்லரை நாணயங்கள் வழங்குதல் மற்றும் கள்ள ரூபாய்களை கண்டறிவது பற்றிய விழிப்புணர்வு முகாம் நடைபெற்றது.

முன்னதாக, இந்த முகாமினை பாரத ரிசர்வ் வங்கியின் துணை பொது மேலாளர் காயா திரிபாதி தொடங்கி வைத்து பேசினார். அப்போது அவர் கூறியதாவது:

பொதுமக்களிடம் பழைய, கிழிந்த ரூபாய் நோட்டுக்களே இல்லாமல் நல்ல ரூபாய் நோட்டுகள் மட்டுமே இருக்கும் நிலையை வங்கிகள் ஏற்படுத்தி கொடுக்க வேண்டும். மக்களிடம் இருந்து அழுக்கான கிழிந்த நோட்டுக்களை பெற்று கொண்டு, புதிய ரூபாய் நோட்டுக்களை அரசு மற்றும் தனியார் வங்கிகள் வழங்க வேண்டும்.

பழைய கிழிந்த ரூபாய் நோட்டுக்களை பெற்று கொண்டு புதிய ரூபாய்களை வழங்குவதற்காக இந்த முகாம் நடத்தப்படுகிறது. இது போன்ற முகாம்கள் அதிக அளவில் நடைபெற வேண்டும். அனைத்து வங்கிகளும் தங்களது கிளை அமைந்திருக்கும் பகுதிகளை சுற்றியுள்ள இடங்களில் அடிக்கடி இது போன்ற முகாம்களை நடத்த வேண்டும்.

வங்கிகள் மற்றும் ஏ.டி.எம். மையங்களில் கள்ள நோட்டுக்களை கண்டறிவதற்குரிய வழிமுறைகள் அடங்கிய பிரசுரங்கள் ஒட்டப்பட்டுள்ளது. இதை பார்த்து அது நல்ல நோட்டா? கள்ள நோட்டா? என்பதை பொதுமக்கள் தெரிந்து கொள்ளலாம். பணம் பரிவர்த்தனை அதிக நடக்கும் வங்கிகள், கருவூலகங்களில் கள்ள நோட்டை அறியும் வகையில் இயந்திரங்கள் வைக்க அறிவுறுத்தப்பட்டுள்ளது.

தமிழகம் முழுவதிலும் உள்ள பள்ளி, கல்லூரிகளில் கள்ள நோட்டை கண்டறிவதற்குரிய முகாம்கள் விரைவில் நடத்தப்படும். இந்தியா முழுவதும் 10 ரூபாய் நோட்டுக்கள் அதிக அளவில் புழக்கத்தில் உள்ளது. மேலும், 10 ரூபாய் நோட்டுகளின் ஆயுட்காலம் குறைவாகவும் இருந்து வருகிறது.

இக்குறைப்பாட்டை நீக்கும் வகையில் 10 ரூபாய் பாலிமர்' நோட்டுக்களை ரிசர்வ் வங்கி அறிமுகப்படுத்தி உள்ளது. விரைவில் இந்த பாலிமர்' நோட்டுக்கள் பொதுமக்கள் பயன்பாட்டிற்காக புழக்கத்தில் விடப்படும் என்றார்.

தகவலுக்கு நன்றிகள் அண்ணா ,
ஒரு பத்து ரூபா கிடைக்குமா கை மாற்றா ?