அமெரிக்கா: கலிஃபோர்னியா பாடத்திட்டத்தில் ஹிந்து மதத் தகவல்கள்

அமெரிக்காவில் உள்ள கலிஃபோர்னியா மாகாணத்தில், பள்ளிப் பாடத்திட்டத்தில் பண்டைய இந்தியா மற்றும் ஹிந்து மதம் பற்றிய தகவல்களை சேர்ப்பதற்கு ஒப்புதல் அளிக்கப்பட்டுள்ளது.

மேலும், அந்தப் பாடத்திட்டத்தில் இருந்து முஸ்லிம் மதத்தைத் தவறாகச் சித்திரிக்கும் தகவல்கள் நீக்கப்பட்டுள்ளன.

கலிஃபோர்னியாவில் அமலில் உள்ள பள்ளி பாடத்திட்டங்களில் புதிய தகவல்களை இணைத்து திருத்தங்கள் செய்வது தொடர்பாக, கடந்த இரண்டாண்டுகளாக பொதுமக்களின் கருத்துகள் கேட்கப்பட்டன. பண்டைய இந்தியாவை தெற்காசியா என்று மாற்ற வேண்டும் என்று சில கல்வியாளர்கள் சர்ச்சை எழுப்பியது உள்பட பல்வேறு சர்ச்சைகளும் எழுந்தன. கல்வியாளர்களின் எதிர்ப்புகளுக்கு இடையிலும், இந்தியாவுக்கு ஆதரவாக கலிஃபோர்னியா கல்வி வாரியம் முடிவெடுத்துள்ளது.

இந்தப் புதிய பாடத்திட்டத்தில், வேத கால முனிவர்கள், ஹிந்து மத போதனைகள், தத்துவங்கள், துறவிகள், அறிவியல் துறைக்கு ஹிந்து மதத்தின் பங்களிப்பு உள்ளிட்ட விஷயங்கள் சேர்க்கப்பட்டுள்ளன.

இதுகுறித்து அமெரிக்க ஹிந்து கல்வி அமைப்பின் இயக்குநர் சந்தீப் தேஜாத் கூறியதாவது:

பிற மதங்கள் மற்றும் நாகரிகங்களுடன் ஹிந்து மதம் மற்றும் இந்திய நாகரிகம் தொடர்பாக தகவல்களைச் சேர்ப்பதற்கு ஏராளமான நடவடிக்கைகள் எடுக்க வேண்டியிருந்தது. கடந்த இரண்டாண்டுகளில் இந்த முன்னேற்றம் ஏற்பட்டுள்ளது என்று நாங்கள் நம்புகிறோம். கல்வி வாரியத்தின் நடவடிக்கை எங்களுக்கு திருப்திகரமாக உள்ளது என்றார் சந்தீப் தேஜாத்.

இதுதொடர்பாக, கலிஃபோர்னியா அரசின் பொது கல்வித் துறை கண்காணிப்பாளர் டாம் டோர்லக்சன் வெளியிட்ட அறிக்கையில் கூறப்பட்டுள்ளதாவது:

இந்தப் புதிய பாடத்திட்டம், வரலாறு மற்றும் சமூக அறிவியல் பாடங்களில் கற்றலையும், கற்பித்தலையும் மேம்படுத்தும்.

எங்கள் மாணவர்கள் அண்மையில் நிகழ்ந்த வரலாற்று ஆய்வுகள், மாகாணத்தின் பன்முகத்தன்மை ஆகியவற்றை தெரிந்து கொள்ள இந்தப் புதிய பாடத்திட்டம் உதவும் என்று அந்த அறிக்கையில் கூறப்பட்டுள்ளது.

மேலும், இந்தப் பாடத்திட்டத்தில் அமெரிக்காவிலும் கலிஃபோர்னியாவிலும் உள்ள திருநங்கையர் மற்றும் ஓர் பாலின ஈர்ப்பாளர்கள் பற்றிய வரலாறு, அமெரிக்காவில் நிகழ்ந்த இனப் படுகொலைகள், சீக்கிய அமெரிக்கர்கள் சந்திக்கும் பிரச்னைகள் ஆகியவற்றைப் பற்றிய தகவல்களும் இடம்பெற்றுள்ளதாக, கலிஃபோர்னியா கல்வித் துறை தெரிவித்துள்ளது.
-
தினமணி