ஹிரோ…! – ஒரு பக்க கதை

**ayyasamy ram** · **ayyasamy ram** Fri Jul 15, 2016 4:55 pm

டாப் ஸ்டார் தமிழரசனை வைத்து, புதிய படமொன்றை
இயக்கிக் கொண்டிருந்தார் பிரபல இயக்குநர் ராகவேந்தர்.
படத்தை அடுத்த மாதமே ரிலீஸ் செய்யத் திட்டமிட்டிருந்ததால்
ஷூட்டிங் ஸ்பாட்டில் ராகவேந்தரின் யூனிட் ஆட்கள் பம்பரமாய்
சுழன்று கொண்டிருந்தனர்.
–
கேமராமேனுடன் அடுத்த ஷாட் குறித்து விவாதித்துக் கொண்டிருந்த
ராகவேந்தரை நெருங்கிய அந்த வடநாட்டு ஹீரோயின், தயங்கித்
தயங்கிப் பேசினாள்.
–
‘‘சார்! நாளைக்கு காலை மும்பைல ஒரு ஆடியோ ரிலீஸ் ஃபங்ஷன்
இருக்கு, என் காட்சிகளை எல்லாம் இன்னைக்கு ராத்திரியே முடிச்சிட்டா
நல்லாயிருக்கும்!’’சற்று யோசனையில் ஆழ்ந்த ராகவேந்தர்,
–
‘‘கொஞ்சம் இரும்மா… ஹீரோகிட்ட கேட்டுச் சொல்றேன்!’’ என்றார்.
கேரவன் கதவைத் தட்டி உள்ளே சென்று ராகவேந்தர் விஷயத்தைச்
சொன்னதும், தமிழரசன் தாம் தூம் என்று குதித்தான்.
–
‘‘நைட் ஷூட்டிங்கா? காலைல இருந்து ஷூட்டிங்ல இருக்குறதே
கண்ணெல்லாம் எரியுது. ராத்திரியில கண் விழிச்சி எனக்குப்
பழக்கமில்லை. என்னால முடியாது!’’ என்றான். அமாவாசை என்ற
பெயரோடு ஒரு தொழிற்சாலையில் நைட் வாட்ச்மேன் வேலை
பார்த்துக்கொண்டிருந்தவனை, தற்செயலாகப் பார்த்து, அவனுக்கு
‘தமிழரசன்’ என்று பெயர் வைத்து, அவனை டாப் ஸ்டார் ஆக்கிய
தனது முட்டாள்தனத்தை எண்ணி மனதுக்குள் சிரித்துக் கொண்டார்
ராகவேந்தர்.
–
——————————————–

-ஜெ.கண்ணன்
குங்குமம்