விபத்தில் உயிரிழந்த காதலியை மறக்காத டோனி: உருக்கமான தகவல் வெளியானது

-
ராஞ்சி:

இந்திய கிரிக்கெட் அணியின் வெற்றிகரமான கேப்டனாக
பெயரெடுத்தவர் மகேந்திர சிங் டோனி. இவரது வாழ்க்கை
வரலாற்று படம், ‘எம்.எஸ்.டோனி-தி அன் டோல்டு ஸ்டோரி’
என்ற பெயரில் பாலிவுட்டில் தயாரிக்கப்பட்டு வருகிறது.

சுஷாந்த் சிங் ராஜ்புட் நடிக்க, நீரஜ்பாண்டே இயக்குகிறார்.
ரசிகர்கள் மத்தியில் பெரும் எதிர்பார்ப்பை ஏற்படுத்தியுள்ள
இந்த படம் வரும் செப்டம்பரில் வெளியிடப்படுகிறது.

இதனிடையே டோனியின் கிரிக்கெட் கேரியரின் துவக்கத்தில்,
அவர் தனது காதலியை விபத்தில் பறிகொடுத்த உருக்கமான
தகவல்கள் வெளிவந்துள்ளது. இதற்கு 2002ம் ஆண்டுக்கு
பின்னோக்கி செல்ல வேண்டும். அப்போது ப்ளூ ஜெர்சியில்
(இந்திய அணியின் ஜெர்சி) விளையாட வேண்டும் என்ற க
னவுடன் இருந்த டோனிக்கு வயது இருபதுகளில் இருந்தது.

அப்போது பிரியங்கா ஜா என்ற பெண்ணை டோனி காதலித்தார்.
அவரை எப்படியும் வாழ்க்கை துணையாக்கி விட முடியும் என
நம்பினார்.
-
இதனிடையே 2002-2003ல் பரம எதிரியான பாகிஸ்தான் மற்றும்
கென்யா அணிகளுக்கு எதிரான முத்தரப்பு தொடரில், இந்திய
ஏ அணிக்காக சிறப்பாக செயல்பட்டார் டோனி. இது அப்போது
கேப்டனாக இருந்த கங்குலியின் கவனத்தை ஈர்த்து,
இந்திய தேசிய அணியிலும் இடத்தை பெற்று தந்தது.

ஆனால் இந்த தொடர் முடிந்து வீடு திரும்பிய டோனிக்கு அதிர்ச்சி
காத்திருந்தது. அவரது காதலி விபத்தில் உயிரிழந்திருந்தார்.
இதனால் ஓராண்டாக டோனி, சோகத்துடனே இருந்தார். இதன்பின்
2004ல் வங்கதேச அணிக்கு எதிரான தொடரில் இந்திய அணிக்காக
அறிமுகமாகும் வாய்ப்பு டோனிக்கு கிடைத்தது.

காதலியை இழந்த சோகத்துடனே, இந்திய அணியின் வெற்றிகரமான
கேப்டன் என்ற பெயரையும் டோனி பெற்றார்.

இதனிடையே 2010ம் ஆண்டு ஜூலை 4ம் தேதி சாக்‌ஷியை,
டோனி திருமணம் செய்தார். ஆனால் திருமணத்திற்கு பின்பும்
டோனி, தனது முதல் காதலை மறக்கவில்லை என கூறப்படுகிறது.

தனது வாழ்க்கையின் முக்கியமான இந்த பகுதியை நீண்ட
யோசனைக்கு பின் படமாக்க டோனி ஒப்புதல் அளித்த தகவல்கள்
தெரியவந்துள்ளது.

இதனால் இந்த படத்தை ரசிகர்கள் ஆவலுடன் எதிர்பார்த்துள்ளனர்.
டோனியின் மனைவி சாக்‌ஷியாக கீரா அத்வானி நடிக்கிறார்.
-
-------------------------

தினகரன்