சதுரங்க தரவரிசை பட்டியல் வெளியீடு: இந்திய அளவில் புதுச்சேரி சிறுமி முதலிடம்

புதுச்சேரி: பன்னாட்டு சதுரங்க கூட்டமைப்பு வெளியிட்ட தரவரிசைப் பட்டியலில் இந்திய அளவில் புதுச்சேரி சிறுமி முதலிடம் பெற்று சாதனை படைத்துள்ளார்.

பன்னாட்டு சதுரங்க கூட்டமைப்பு ஜூன் மாதத்துக்கான சர்வதேச சதுரங்க வீரர்களுக்கான தரவரிசை பட்டியலை அண்மையில் வெளியிட்டது. புதுச்சேரி வைத்திக்குப்பத்தை சேர்ந்த கார்த்திகேயன் - மாதரசி தம்பதியின் மகள் கமலினி ஆராதனா. இவர் சிறுவயதிலேயே நிம்பன் தரவரிசைப் பட்டியலில் இடம் பெற்று சாதனை படைத்துள்ளார். இவர் புதுச்சேரி சங்கர வித்யாலயா மேல்நிலைப்பள்ளியில் முதலாம் வகுப்பு படித்து வருகிறார்.

இதுகுறித்து கமலினியின் பயிற்சியாளரும், பிஷப் சதுரங்க கழக தலைமை பயிற்சியாளருமான வினோத்குமார் கூறியதாவது:

5 வயது பூர்த்தி அடைந்துள்ள கமலினி ஆராதனா நிம்பன் சர்வதேச தரவரிசை பட்டியலில் 1048 புள்ளிகள் பெற்று 6 வயதுக்கு உட்பட்டோர் பிரிவில் இந்திய அளவில் முதலிடத்தையும், சர்வதேச அளவில் 4வது இடத்தையும் பிடித்துள்ளார்.

இவர் 7 வயதுக்கு உட்பட்டோர் பட்டியலில் இந்திய அளவில் 4-வது இடத்தையும், ஆசிய அளவில் 7-வது இடத்திலும், சர்வதேச அளவில் இருபதாவது இடத்திலும் உள்ளார்.

சக வயது சதுரங்க வீரர்களின் மதிப்பீடு தரவரிசை பட்டியலில் இடம் பெற்ற முதல் மற்றும் ஒரே வீராங்கனை இவர் ஆவார். 5 வயதுக்கு உட்பட்டோர் தேசிய செஸ் சாம்பியன்ஷிப் போட்டியில் சாதித்தது போல் எதிர்வரும் செப்டம்பர் மாதம் புதுச்சேரியில் நடைபெறவுள்ள 7 வயதுக்கு உட்பட்ட தேசிய செஸ் சாம்பியன்ஷிப் போட்டியில் சிறப்பாக செயல்பட்டு வெற்றி வாகை சூடுவார் என்ற நம்பிக்கை உள்ளது.

கமலினியிடம் ஆர்வம், முயற்சி மற்றும் ஒத்துழைப்பு ஆகியவை ஒரு சேர இருப்பதால் வரும் ஆண்டுகளில் புதிய உச்சங்களை அடைவார் என்றார் வினோத்குமார்.
-
தினமணி

வாழ்த்துகள் !