ஜில்லென்ற ஏசி புதுமைகள்: மின்சாரமில்லாத 'ஏசி!':

**krishnaamma** · **krishnaamma** Thu Jun 23, 2016 1:07 am

வங்கதேசத்தில், 70 சதவீத மக்கள் தகரக் கூரைகளின் கீழ் தான் வசிக்கின்றனர். வறுத்தெடுக்கும் கோடையில் அவர்களது நிலைமையை நினைத்துப் பாருங்கள்! டாக்காவிலுள்ள, 'கிரே' விளம்பர நிறுவனமும், 'கிராமீன் இன்டெல் சோஷியல் பிசினஸ் லிமிடெட்' என்ற சமூக தொழில் அமைப்பும் சேர்ந்து, வங்கதேச மக்களை குளிர்விக்க முடிவு செய்தன. அதன் விளைவாக உருவானது தான், மின்சாரம் தேவைப்படாத, 'எகோ கூலர்' சாதனம்.

வீட்டின் ஜன்னல் அளவுக்கு, ஒரு அட்டை அல்லது பலகையை வெட்டி தயார் செய்ய வேண்டும். பின், அதில் துளைகளை இட வேண்டும். அந்த துளைகளில், பயன்படுத்தி வீசப்பட்ட பிளாஸ்டிக் பாட்டில்களை பாதியாக வெட்ட வேண்டும்.

பாட்டில்களின் குறுகலான வாய் பகுதிகளை, துளைகளில் பொருத்த வேண்டும்; அவ்வளவு தான், ஏழைகளின், 'ஏசி' தயார். எப்படி வேலை செய்கிறது எகோ கூலர்? உங்கள் வாயை அகலத் திறந்து புறங்கை மீது காற்றை ஊதிப் பாருங்கள். கதகதப்பாக இருக்கும். அதுவே, உதட்டை குவித்து ஊதிப் பாருங்கள். சில்லென்று இருக்கும்.

இதுதான் எகோ கூலரின் பின்னணி அறிவியல். பாட்டிலின் அகலமான பகுதியில் நுழையும் காற்று, பாட்டிலின் கழுத்துப் பகுதியில் குறுக்கப்படும்போது, குளிர்ச்சியடைகிறது. எந்த அளவுக்கென்றால், வெளியே உள்ளதைவிட, 5 டிகிரி செல்சியஸ் அளவுக்கு! மின்சாரமே இல்லாமல் இது நடப்பதும், பழைய பொருட்களை மறுசுழற்சி செய்ய முடிவதும் எகோ கூலரால் விளையும், 'போனஸ்' பலன்கள்.

தினமலர்