டெல்லி மேல்-சபையில் பா.ஜனதா கூட்டணியின் பலம் 74 ஆக அதிகரிப்பு

**ayyasamy ram** · **ayyasamy ram** Mon Jun 13, 2016 4:52 am

புதுடெல்லி,

டெல்லி மேல்-சபையில் பாரதீய ஜனதா தலைமையிலான
தேசிய ஜனநாயக கூட்டணியின் பலம் 74 ஆக அதிகரித்து
உள்ளது.

டெல்லி மேல்-சபை தேர்தல்

245 உறுப்பினர்களை கொண்ட மேல்-சபையில்
57 உறுப்பினர்களின் பதவிக்காலம் முடிவடைய இருப்பதை
ஒட்டி, அந்த காலி இடங்களை நிரப்ப தேர்தல் அறிவிக்கப்பட்டது.
இதில் தமிழகம் உள்பட 8 மாநிலங்களில் இருந்து 30 பேர்
போட்டியின்றி தேர்ந்து எடுக்கப்பட்டனர்.

தமிழ்நாட்டில் இருந்து அ.தி.மு.க. சார்பில் 4 பேரும்,
தி.மு.க. சார்பில் 2 பேரும் போட்டியின்றி தேர்வு செய்யப்பட்டனர்.

மீதம் உள்ள 27 பதவி இடங்களுக்கு நேற்று முன்தினம் தேர்தல்
நடைபெற்றது. இதில் பாரதீய ஜனதா சார்பில் ராஜஸ்தானில் இருந்து
4 பேர், அரியானா, மத்திய பிரதேசம், ஜார்கண்ட் மாநிலங்களில்
இருந்து தலா 2 பேர், உத்தரபிரதேசம், கர்நாடகத்தில் இருந்து தலா
ஒருவர் என மொத்தம் 12 பேர் தேர்ந்து எடுக்கப்பட்டனர்.

காங்கிரஸ் சார்பில் கர்நாடகத்தில் இருந்து 3 பேர், உத்தரபிரதேசம்,
மத்திய பிரதேசம், உத்தரகாண்ட் மாநிலங்களில் இருந்து தலா ஒருவர்
என மொத்தம் 6 பேர் தேர்வு செய்யப்பட்டனர்.

இதுதவிர உத்தரபிரதேசத்தில் இருந்து சமாஜ்வாடி சார்பில்
7 பேரும், பகுஜன் சமாஜ் சார்பில் 2 பேரும் தேர்ந்து எடுக்கப்
பட்டார்கள்.

பா.ஜனதா பலம் அதிகரிப்பு

மேல்-சபையில் ஆளும் பாரதீய ஜனதா தலைமையிலான தேசிய
ஜனநாயக கூட்டணிக்கு போதிய பலம் இல்லாததால் முக்கிய
மசோதாக்களை நிறைவேற்ற முடியாத சூழ்நிலை இருந்து
வருகிறது. இப்போது நடந்த இந்த தேர்தல் மூலம் மேல்-சபையில்
தேசிய ஜனநாயக கூட்டணியின் பலம் 69-ல் இருந்து 74 ஆக
(பா.ஜனதா-55, தெலுங்கு தேசம்-6, சிவசேனா-3, அகாலிதளம்-3,
மக்கள் ஜனநாயக கட்சி-2, பிற கட்சிகள் மற்றும் சுயேச்சை-5)
அதிகரித்து உள்ளது.

காங்கிரஸ் தலைமையிலான ஐக்கிய
முற்போக்கு கூட்டணியின் பலம் 74-ல் இருந்து 71 ஆக
(காங்கிரஸ்-61, கேரள காங்கிரஸ் (எம்.)-1, முஸ்லிம் லீக்-1, பிற
கட்சிகள்-8) குறைந்து இருக்கிறது.

ஐக்கிய முற்போக்கு கூட்டணியை விட தேசிய ஜனநாயக
கூட்டணிக்கு 3 உறுப்பினர்கள் அதிகம் உள்ள போதிலும் போதிய
மெஜாரிட்டி கிடைக்கவில்லை.

பிராந்திய கட்சிகள்

முக்கிய மசோதாக்களை நிறைவேற்ற வேண்டுமானால் பிராந்திய
கட்சிகளை சார்ந்து இருக்க வேண்டிய நிலையிலேயே தேசிய
ஜனநாயக கூட்டணி அரசு இருக்கிறது. பிராந்திய கட்சிகளுக்கு
80-க்கும் அதிகமான உறுப்பினர்கள் உள்ளனர்.

முலாயம் சிங்கின் சமாஜ்வாடி கட்சிக்கு 19 உறுப்பினர்களும்,
அ.தி.மு.க.வுக்கு 13 உறுப்பினர்களும், திரிணாமுல் காங்கிரசுக்கு
12 உறுப்பினர்களும், மார்க்சிஸ்ட் கம்யூனிஸ்டு கட்சிக்கு
8 உறுப்பினர்களும், பிஜூ ஜனதாதளத்துக்கு 7 உறுப்பினர்களும்,
பகுஜன் சமாஜ் கட்சிக்கு 6 உறுப்பினர்களும், தி.மு.க.வுக்கு
5 உறுப்பினர்களும் உள்ளனர்.

ஐக்கிய ஜனதாதளம்-ராஷ்ட்ரீய ஜனதாதளம் கூட்டணிக்கு
12 உறுப்பினர்கள் இருக்கிறார்கள்.

எனவே பிராந்திய கட்சிகளின் ஆதரவு இருந்தால் மட்டுமே தேசிய
ஜனநாயக கூட்டணி அரசால் முக்கிய மசோதாக்களை நிறைவேற்ற
முடியும்.
-
-------------------------------------
தினத்தந்தி

டெல்லி மேல்-சபையில் பா.ஜனதா கூட்டணியின் பலம் 74 ஆக அதிகரிப்பு

டெல்லி மேல்-சபையில் பா.ஜனதா கூட்டணியின் பலம் 74 ஆக அதிகரிப்பு

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக