நிர்பயா நிதி

மத்திய சாலைப்போக்குவரத்து அமைச்சகம், கடந்த மாத தொடக்கத்தில் மோட்டார் வாகன சட்டத்தின்கீழ் சில உத்தரவுகளைப் பிறப்பிப்பதற்காக, வரைவு உத்தரவுகளை அனைத்து மாநில அரசுகள், மோட்டார் வாகன உற்பத்தி யாளர்கள் உள்பட பல அமைப்புகளுக்கு அனுப்பி கருத்துகளை அனுப்பக் கேட்டிருந்தது. 23 பயணிகளுக்கு மேல் ஏற்றிச்செல்லும் போக்குவரத்து வாகனங்களில் கண்டிப்பாக கண்காணிப்பு கேமரா பொருத்தவேண்டும், எந்த இடத்தில் அந்த வாகனம் சென்றுகொண்டிருக்கிறது என்பதை அருகில் உள்ள போலீஸ் நிலையத்துக்கு தெரிவிக்கும் ஜி.பி.எஸ். கருவியும் பொருத்த வேண்டும் என்பதைக் கட்டாயமாக்கும் உத்தரவுதான் அது. இந்த திட்டத்தை நிறைவேற்றும் வகையிலான முன்னோடி திட்டத்தை ராஜஸ்தான் மாநிலத்தில் அரசு போக்கு வரத்துக்கழகத்துக்கு சொந்தமான 10 சொகுசு மற்றும் 10 சாதாரண பஸ்களில் அமல்படுத்தியுள்ளனர். இதற்கு 50 சதவீத நிதியை மத்திய அரசாங்கம் வழங்கியுள்ளது.

இதேபோன்ற வசதிகளை நாடு முழுவதும் அனைத்து மாநில போக்குவரத்துக்கழக பஸ்களிலும் பொருத்த வேண்டும் என்பதற்கான அறிவிக்கையை மத்திய அரசாங்கம் வெளியிடுகிறது. இதன்படி, பஸ்களில் பெண் களுக்காக ஒதுக்கப்படும் சீட்டுகளில் அபாய எச்சரிக்கை பட்டன்களும் பஸ்சில் கண்காணிப்பு கேமரா மற்றும் ஜி.பி.எஸ். கருவியும் பொருத்தப்பட வேண்டும். பஸ்சில் பயணம் செய்யும் பெண்களுக்கு ஏதாவது விரும்பத்தகாத சம்பவம் நேர்ந்தால் உடனடியாக அவர் இந்த அபாய எச்சரிக்கை பட்டனை அழுத்திவிடலாம். உடனடியாக ஜி.பி.எஸ். கருவி மூலமாக இந்த அபாய செய்தி அருகில் உள்ள காவல் நிலையத்துக்கு அனுப்பப்பட்டுவிடும். அந்த நொடியே பஸ்சில் உள்ள கண்காணிப்பு கேமராவும் இயங்கத்தொடங்கி, அந்த வீடியோவும் போலீஸ் நிலையத்தில் காட்டப்பட்டுவிடும். இது, மின்னல் 
வேகத்தில் போலீசார் நடவடிக்கை எடுக்க உதவியாக இருக்கும். மத்திய அரசாங்கத்தின் இந்த முயற்சி நிச்சயம் வரவேற்கத்தக்கது. ஆனால் இதுபோன்ற முன்னோடி திட்டத்தை பா.ஜ.க. ஆளும் ராஜஸ்தான் மாநிலத்தில்தான் தொடங்கியிருக்கவேண்டும் என்பதில்லை. அரசு போக்குவரத்துக்கழகங்களில் சிறந்துவிளங்கும் தமிழக அரசு போக்குவரத்து கழகங்களிலும் செயல்படுத்தி இருக்கலாமே என்பதுதான் தமிழக மக்களின் ஆதங்கம். முன்னோடி திட்டத்துக்காக ராஜஸ்தான் மாநிலத்துக்கு 
50 சதவீதம் நிதி உதவி வழங்குவது போல அனைத்து மாநில அரசு போக்குவரத்துக்கழகங்களுக்கும் இந்த திட்டத்தை உடனடியாக செயல்படுத்த 50 சதவீதம் மத்திய அரசாங்கம் நிதிஉதவி அளிக்கப்படவேண்டும். 

2012–ம் ஆண்டு டிசம்பர் மாதம் 16–ந் தேதி தலைநகராம் டெல்லியில் ஓடும் பஸ்சில் நிர்பயா என்ற 22 மாணவி கதறக்கதற கற்பழிக்கப்பட்டு, கொடூரமாக கொலை செய்யப்பட்ட பிறகே பெண்கள் பாதுகாப்புக்காக இது போன்ற திட்டங்கள் உருவாகத்தொடங்கின. பெண்கள் பாதுகாப்புக்காக புதிய திட்டங்களை செயல்படுத்த நிர்பயா என்ற நிதியை மத்திய அரசாங்கம் உருவாக்கி, ஆண்டுதோறும் அந்த நிதியில் ஆயிரம் கோடி ரூபாய் ஒதுக்கி, இப்போது 3 ஆயிரம் கோடி ரூபாய்க்குமேல் தூங்கிக்கொண்டு இருக்கிறது. உச்சநீதிமன்றம் இப்போது ‘‘வெறும் வார்த்தை ஜாலம் காட்டாதீர்கள், பெண்கள் பாதுகாப்புக்காக இந்த நிதியைக்கொண்டு திட்டங்கள் வகுக்க மத்திய அரசாங்கம் தவறியதால் இந்த நிதி தூங்கிக்கொண்டு இருக்கிறது’’ என்று கடுமையான கண்டன கணைகளை தொடுத்துவிட்டு, ‘‘எந்த நோக்கத் துக்காக இந்த நிதி உருவாக்கப்பட்டதோ, அந்த நோக்கத்தை மாநில அளவிலும், மாவட்ட அளவிலும் செலவிட திட்டம் வைத்திருக்கிறீர்களா?’’ என்று பதில் அளிக்க கேட்டு இருக்கிறது. எனவே, இன்னும் மத்திய அரசாங்கம் இந்த நிதியை தூங்கப்போட்டுக்கொண்டு இருக்கமுடியாது. போக்குவரத்து வாகனங்களில் பெண் களுக்கு அபாய எச்சரிக்கை பட்டன் பொருத்தும் திட்டம் உள்பட மேலும் பல திட்டங்களுக்கு  அந்தந்த  மாநிலங்களில் உள்ள நிலைமைக்கேற்ப வசதிகள் செய்ய கருத்து களைக்கேட்டு நிதிஉதவி அளித்து செயல்படுத்த வேண்டும். தமிழக அரசும், பெண்கள் பாதுகாப்புக்காக திட்டங்களை தீட்டி, நிர்பயா நிதியிலிருந்து நிதி ஒதுக்க கேட்க வேண்டும்...