வண்டலூரில் கால்கள் ஊனமடைந்த நட்சத்திர ஆமைக்குச் சக்கர கால்கள்

-

சென்னை:
வண்டலூர் அறிஞர் அண்ணா உயிரியல் பூங்காவில்
கால்கள் ஊனமடைந்த நடசத்திர ஆமைக்கு சக்கர
கால்கள் பொருத்தப்பட்டுள்ளது.

இது குறித்து பூங்கா நிர்வாகம் சனிக்கிழமை வெளியிட்ட
செய்திக் குறிப்பு:

அறிஞர் அண்ணா உயிரியல் பூங்காவில், 14 நட்சத்திர
ஆமைகள் பராமரிக்கப்பட்டு வருகின்றன.

இப்பூங்காவில் இயற்கையாகக் காடுகளில் உள்ள கீரிப்
பிள்ளைகள், ஆமைகளின் அடைப்பிடத்திற்குள் நுழைந்து
நட்சத்திர ஆமைகளின் கால்கள் மற்றும் இதர பகுதிகளைக்
கடித்து சேதப்படுத்திவிட்டன.

இவ்வாறு காயமடைந்த ஆமைகள் கைப்பற்றப்பட்டு பூங்கா
விலங்கு மருத்துவமனைக்குக் கொண்டுவரப்பட்டு கால்நடை
மருத்துவர்களால் சிகிச்சையளிக்கப்பட்டு குணப்படுத்தப்
பட்டது.

அதில், ஒரு பெண் நட்சத்திர ஆமைக்கு மட்டும் முன்னங்
கால்கள் நடக்கமுடியாத அளவிற்கு ஊனம் ஏற்பட்டுவிட்டது.
இதனால், இந்த நட்சத்திர ஆமையால் நடமாடவும் மற்றும்
உணவைத் தேடிச் செல்லவும் இயலாத நிலை ஏற்பட்டுவிட்டது.

எனவே, இதனை சரிசெய்வதற்காகப் பூங்கா கால்நடை
மருத்துவர் குழு சிறப்பு ஏற்பாட்டினை செய்தது.

அதன்படி இரண்டு சக்கரங்கள் முனைகளில் பொருத்தப்பட்ட
கம்பி ஒன்று உறுத்தல் தராத எப்பாக்சி கலவைக் கொண்டு
நட்சத்திர ஆமையின் அடிப்புற ஓட்டின்மீது ஒட்டப்பட்டது.
தற்பொழுது, இந்தச் சக்கரங்கள் உதவியுடன் நட்சத்திர
ஆமை வழக்கத்தைவிட வேகமாகத் தாம் விரும்பும் இடத்திற்குச்
சென்று வரவும், உணவைத் தேடிச் செல்லவும் முடிகிறது.

இதுவரை தனிமைப்படுத்தப்பட்டு கூட்டத்திலிருந்து
விலகியிருந்த இந்த நட்சத்திர ஆமை, இப்போது சக்கரங்கள்
உதவியுடன் சிறப்பாகச் செயல்பட்டு வருவதாக தெரிவிக்கப்
பட்டுள்ளது.
-
---------------------------------
தினமணி