சென்னை வணிக மனை உள்பட ரூ. 1411 கோடி மதிப்புள்ள மல்லையா சொத்துக்கள் முடக்கம்

**ayyasamy ram** · **ayyasamy ram** Sat Jun 11, 2016 9:27 pm

புது தில்லி:
வங்கி மோசடி வழக்கில் தலைமறைவாக இருக்கும்
தொழிலதிபர் விஜய் மல்லையாவின் ரூ. 1411 கோடி
சொத்துகளை இந்திய அமலாக்கத் துறை முடக்கம்
செய்து அறிவிக்கை வெளியிட்டுள்ளது.

பிரபல தொழிலதிபரான விஜய் மல்லையா வங்கிகளில்
ரூ. 9000 கோடிக்கும் அதிகமாக கடன் பெற்றுவிட்டு, அதை
திருப்பிச் செலுத்தவில்லை. இதுதொடர்பாக வங்கிகள்
நடவடிக்கை எடுக்க முயன்ற நிலையில், லண்டனுக்கு
தப்பிச் சென்றுவிட்டார் மல்லையா.

இதனிடையே மல்லையா, தான் வகித்து வந்த மாநிலங்களவை
உறுப்பினர் பதவியையும் ராஜிநாமா செய்தார்.

மல்லையாவுக்கு இந்தியாவிடம் ஒப்படைக்க வேண்டும் என
இந்திய அரசின் கோரிக்கையை பிரிட்டிஷ் அரசாங்கம்
நிராகரித்துவிட்டது. இதையடுத்து அவரது பாஸ்போர்ட்
முடக்கப்பட்டது.

மேலும், மல்லையாவை தேடப்படும் குற்றவாளியாக அறிவிக்க
வலியுறுத்தி தில்லி சிறப்பு நீதிமன்றத்தை அமலாக்கத் துறை
அணுகியது.

இந்நிலையில் மல்லையாவுக்குச் சொந்தமான ரூ. 1411 கோடி
சொத்துகளை முடக்கம் செய்து அமலாக்கத் துறை அறிவிக்கை
வெளியிட்டுள்ளது.

அவருக்குச் சொந்தமான வங்கி கணக்கு (ரூ. 34 கோடி),
பெங்களூரு (2291 சஅடி) மற்றும் மும்பையில் (1300 சஅடி) அடுக்குமாடி
குடியிருப்பு வீடுகள், சென்னையில் உள்ள ரூ. 4.5 கோடி மதிப்பிலான
வணிக மனை, கூர்க் பகுதியில் 28.75 ஏக்கர் பரப்பளவில் உள்ள
காஃபி எஸ்டேட், பெங்களூரு நகரில் 8.4 லட்சம் சதுர அடியில் உள்ள
கிங்ஃபிஷர் மாளிகை ஆகியவற்றை அமலாக்கத் துறை முடக்கம்
செய்துள்ளது.
-
---------------
தினமணி