சினிமா செய்திகள் ...

பாலிவுட் கவர்ச்சிப் புயல் அலியா பட் இதுவரை நடித்த படங்களில் எல்லாம் கவர்ச்சியாகவே நடித்து வந்திருக்கிறார். இதற்கு நேர்மாறாக ‘உத்தா பஞ்சாப்’ படத்தில், பழங்குடி இன விளையாட்டு வீராங்கனையாக நடிக்கிறார். சிலரால் பாலியல் பலாத்காரம் செய்யப்படும் அலியா பட் அதனை எதிர்த்துப் போராடும் துணிச்சலான பெண்ணாக நடித்திருக்கிறாராம். ஷாகித் கபூர் போதைக்கு அடிமையான ராக்ஸ்டாராக நடித்திருக்கிறார், இருவருக்கும் சிகிச்சை அளிக்கும் டாக்டராக கரீனா கபூர் நடித்திருக்கிறாராம். பூ ஒன்று புயலானது!

‘வேலைன்னு வந்துட்டா வெள்ளக்காரன்’ காமெடிப் படத்துக்குப் பிறகு இயக்குநர் எழிலிடம் உதவியாளர் செல்லாவின் இயக்கத்தில் நடிக்கிறார் விஷ்ணு. அதுவும் பக்கா காமெடி கதையாம். சுசீந்திரனின் நல்லு ஸ்டுடியோஸ் தயாரிக்க, இமான் இசையில் உருவாக இருக்கும் இந்தப் படத்தில் நாயகியாக நடிக்க கௌதம் மேனனின் லேட்டஸ்ட் நாயகி மஞ்சிமா மோகன் ஒப்பந்தம் செய்யப்பட்டுள்ளார். வெள்ளக்காரன் வேகத்தில் விஷ்ணு!

‘வெற்றிவேல்’ படத்தை அடுத்து ‘கிடாரி’ என்ற கிராமத்துக் கதையில் நடித்துவரும் சசிகுமார், அதைத் தொடர்ந்து மீண்டும் ஒரு மதுரை மண் சார்ந்த கிராமிய ஆக்‌ஷன் படத்தில் நடிக்க இருக்கிறார். ‘குட்டிப்புலி’, ‘கொம்பன்’, ‘மருது’ படங்களை இயக்கிய இயக்குநர் முத்தையா தன் முதல் பட ஹீரோ, சசிகுமாருடன் மீண்டும் இணைகிறாராம். இந்தப் படத்தில் எப்படியாவது தன் ஆஸ்தான நாயகி லட்சுமி மேனனை நடிக்க வைக்கத் திட்டமிட்டிருக்கிறார் இயக்குநர் முத்தையா. கெட்டிப்புலிதான்!

எவ்வளவு சர்ச்சைகள் வந்தாலும் அதைப்பற்றிக் கவலைப்படாமல் தன் வழியில், தன் வேலையை மட்டும் பார்க்கும் நடிகைதான் ‘கபாலி’ ராதிகா ஆப்தே. சமீபத்தில் சில ரசிகர்களைத் திட்டி அவர்களோடு சண்டை போட்டிருக்கிறார். அவர் திட்டியது, அவரோடு செல்ஃபி எடுக்க அவரைப் பின் தொடர்ந்த ரசிகர்களைத்தான். ‘என் ரசிகர்கள் என்று பொய் சொல்லி செல்ஃபி கேட்டார்கள், நான் நடித்த மூன்று படங்களின் பெயர்களைக் கேட்டால்கூட அவர்களுக்குத் தெரியவில்லை. என் சினிமா கவர்ச்சியை மட்டும் பார்த்து போட்டோ எடுக்க வந்தால், எனக்கு சுத்தமாகப் பிடிக்காது’ என்று கடுப்பாகக் கூறியிருக்கிறார். நெருப்புடா!

பாடகராக இருந்து ‘மாரி’ படத்தில் வில்லனாக மாறிய விஜய் யேசுதாஸ் தற்போது ஒரு படத்தில் ஹீரோவாக நடிக்க இருக்கிறார். மிகவும் தேர்ந்தெடுத்து நடிக்கும் இயக்குநர் இமயம் பாரதிராஜா, வில்லனாக நடிக்கிறாராம். மணிரத்னத்தின் உதவியாளர்களில் ஒருவர் இயக்கும் இந்தப் படத்துக்கு ‘படைவீரன்’ என்று பெயரிட்டுள்ளார்கள். ஹேப்பி ஸ்டுடியோஸ் என்ற புது தயாரிப்பு நிறுவனம் படத்தைத் தயாரிக்கிறதாம். சந்தோஷம் நீடிக்கட்டும்!

‘இரும்புக்குதிரை’ படத்தில் ரேஸராக அறிமுகமான அலிஷா அப்துல்லா என்ற ரியல் பைக் ரேஸர், அடுத்து விஜய் ஆண்டனியின் ‘சைத்தான்’ என்ற படத்தில் நடித்திருக்கிறார். இந்தப் படத்திலும் தனக்கு மாடர்னான கிளாமர் வேடம்தான் என்று கூறும் அலிஷா, தன்னைப் போலவே ரியல் ரேஸரான அஜித்துடன் ஒரு படத்திலாவது நடித்துவிட வேண்டும் என்று ஆசைப்படுகிறாராம். அதுவும் தன் பைக் ரேஸிங் திறமைகளை வெளிப்படுத்தும் ஆக்‌ஷன் படமாக இருந்தால் இன்னும் சூப்பர் என்கிறார். பில்லா 3 எடுத்தா நீங்கதான்!

‘குற்றப்பத்திரிகை’, ‘குப்பி’, ‘வனயுத்தம்’, ‘ஒரு மெல்லிய கோடு’ ஆகிய படங்களை இயக்கிய ஏ.எம்.ஆர்.ரமேஷ், அடுத்து ராஜீவ்காந்தி படுகொலையை மையப்படுத்திய ஒரு படத்தை இயக்க இருக்கிறாராம். இதற்காக ராஜீவ் காந்தியுடன் இறந்தவர்களின் குடும்பங்களையும், சில அரசு அதிகாரிகளையும், அதற்கான திட்டம் தீட்டியவர்கள் சிலரையும் சந்தித்துப் பேட்டி எடுத்து ஆராய்ச்சி செய்து திரைக்கதை அமைத்திருக்கிறாராம். ராஜீவ்காந்தி கொலை வழக்கை விசாரிக்கும் அதிகாரியாக அர்ஜூனும், ராஜீவ்காந்தி வேடத்தில் ஒரு இந்தி நடிகரும் நடிக்க இருக்கிறார்களாம். குற்றப்பத்திரிகையும் இதுதானே!

இண்டஸ்ட்ரியின் சமீபத்திய ஹாட் ஜோடி ஜி.வி.பிரகாஷ் ‘கயல்’ ஆனந்தி ஜோடிதான். ‘த்ரிஷா இல்லைனா நயன்தாரா’, ‘எனக்கு இன்னொரு பேர் இருக்கு’ படங்களில் அவர்கள் இருவருக்கும் இருந்த கெமிஸ்ட்ரியை பார்த்த இயக்குநர் ராஜேஷ், தான் இயக்கி வரும் ‘கடவுள் இருக்கான் குமாரு’ படத்தில் ஜி.வி.பிரகாஷுக்கு ஜோடியாக ஆனந்தியை ஒப்பந்தம் செய்துவிட்டார். ஏற்கெனவே நிக்கி கல்ராணியும் நாயகியாக நடித்து வந்தாலும் எந்த ஈகோவும் இல்லாமல் நடிக்க ஓகே சொல்லி இருக்கிறார் ஆனந்தி. ஆனந்தம்தான்!

‘சதுரங்க வேட்டை’ படத்துக்குப் பிறகு ஒளிப்பதிவு, நடிப்பு என இரண்டிலும் மாறி மாறி பயணித்து வரும் நட்டி, அடுத்து ஒரு பரபர ஆக்‌ஷன் படத்தில் நடிக்கிறார். பேரரசு திரைக்கதை, வசனம் எழுத ‘மகாராணி கோட்டை’ என்ற படத்தை இயக்கிய வினோத் இந்தப் படத்தை இயக்குகிறாராம். ‘வாடா மவனே’ என படத்தின் தலைப்பிலேயே இறங்கி அடித்திருக்கிறார் நட்டி. நாட்டி!

எப்படியாவது தன் மகளை டாப் ஹீரோயின் ஆக்கிவிட வேண்டும் என்று தீவிரமாக முயற்சி செய்துவரும் அர்ஜுன், தன் மகள் ஐஸ்வர்யாவை வைத்து ஒரே நேரத்தில் தமிழ் மற்றும் கன்னடத்தில் ஒரு படத்தை எடுத்து வருகிறார். ‘காதலின் பொன் வீதியில்’ என்ற பெயரில் உருவாகிவரும் இந்தப் படத்தில் தன் மகளுக்கு ஜோடியாக சந்தன் என்ற புதுமுகத்தை அறிமுகப்படுத்தும் அர்ஜூன், கதை, வசனம் எழுதி இயக்கி சொந்த செலவிலேயே படத்தை எடுத்தும் வருகிறார். மகளுக்காற்றும் உதவி!

தனுஷை வைத்து இளமைத் துள்ளல் நிறைந்த ‘ராஞ்சனா’ படத்தை இயக்கிய ஆனந்த் எல்.ராய் அடுத்து ஷாரூக் கானை இயக்குவதால் ஷாரூக் வயதுக்கேற்ற ஜோடியாக கத்ரீனா கைஃப்பையும், இளைஞர்களை ஈர்க்கும் வகையில் ஒரு இளம் நடிகையையும் நடிக்க வைக்க முடிவெடுத்திருக்கிறார். தனது முந்தைய படத்தில் நடித்த சோனம் கபூர் மற்றும் அலியாபட் ஆகிய இருவரிடமும் பேச்சுவார்த்தை நடத்தியிருக்கிறார். இருவரில் ஒருவர் ஷாரூக்குடன் ரொமான்ஸ் செய்வார்களாம். யூத் கான்!

நன்றி-டைம் பாஸ்