4 விக்கெட்டுகளில் தோற்று வெளியேறியது குஜராத்

-
ஐபிஎல் கிரிக்கெட் போட்டியின் 2-ஆவது தகுதிச்சுற்றில்
சன்ரைஸர்ஸ் ஹைதராபாத் அணி 4 விக்கெட்
வித்தியாசத்தில் குஜராத் லயன்சை தோற்கடித்து இறுதிச்
சுற்றுக்கு முன்னேறியது.

பெங்களூரில் ஞாயிற்றுக்கிழமை நடைபெறும் இறுதி
ஆட்டத்தில் பெங்களூர் ராயல் சேலஞ்சர்ஸ் அணியுடன்
மோதுகிறது ஹைதராபாத்.

டேவிட் வார்னர் 58 பந்துகளில் 3 சிக்ஸர், 11 பவுண்டரிகளுடன்
ஆட்டமிழக்காமல் 93 ரன்கள் குவித்து ஹைதராபாதுக்கு வெற்றி
தேடித்தந்தார்.

தில்லியில் வெள்ளிக்கிழமை நடைபெற்ற இந்த ஆட்டத்தில்
ஹைதராபாத் அணியில் முஸ்தாபிஜுர் ரஹ்மான் காயம்
காரணமாக இடம்பெறவில்லை. அவருக்குப் பதிலாக
டிரென்ட் போல்ட் சேர்க்கப்பட்டார்.

டாஸ் வென்ற ஹைதராபாத் கேப்டன் வார்னர் பீல்டிங்கை
தேர்வு செய்தார். இதையடுத்து பேட் செய்த குஜராத் அணியில்
மெக்கல்லத்துடன் புதிய தொடக்க வீரராக ஏகலைவ துவிவேதி
களமிறங்கினார்.

துவிவேதி 5 ரன்கள் மட்டுமே எடுத்த நிலையில்,
புவனேஸ்வர் குமார் வீசிய முதல் ஓவரிலேயே ஆட்டமிழந்தார்.
பின்னர் வந்த கேப்டன் ரெய்னா 1 ரன் எடுத்த நிலையில் போல்ட்
பந்துவீச்சில் வீழ்ந்தார்.

இதையடுத்து மெக்கல்லத்துடன் இணைந்தார் தினேஷ் கார்த்திக்.
இந்த ஜோடி 44 ரன்கள் சேர்த்தது. ஒரு புறம் மெக்கல்லம் தடுமாற,
மறுமுனையில் வேகமாக ரன் சேர்த்த கார்த்திக், போல்ட்டின்
துல்லியமான “த்ரோ’வில் ரன் அவுட்டானார். அவர் 19 பந்துகளில்
1 சிக்ஸர், 4 பவுண்டரிகளுடன் 26 ரன்கள் எடுத்தார்.

இதையடுத்து ஆரோன் ஃபிஞ்ச் களமிறங்க, மெக்கல்லம்
29 பந்துகளில் 32 ரன்கள் சேர்த்து ஆட்டமிழந்தார். பெரிதும் எதிர்
பார்க்கப்பட்ட டுவைன் ஸ்மித் ஒரு ரன்னில் நடையைக் கட்ட,
ஜடேஜா களம்புகுந்தார்.

ஒருபுறம் விக்கெட் சரிந்தாலும், மறுமுனையில் அசத்தலாக ஆடிய
ஃபிஞ்ச், ஹென்ரிக்ஸ் வீசிய 14-ஆவது ஓவரில் ஒரு சிக்ஸர், இரு
பவுண்டரிகளை விரட்டினார். தொடர்ந்து வேகம் காட்டிய அவர்,
பென் கட்டிங் ஓவரில் பவுண்டரியை விளாசி 31 பந்துகளில் அரை
சதம் கண்டார்.

எனினும் அடுத்த பந்திலேயே அவர் போல்டானார்.
அவர் 32 பந்துகளில் 2 சிக்ஸர், 7 பவுண்டரிகளுடன் 50 ரன்கள்
எடுத்தார்.

கடைசிக் கட்டத்தில் பிராவோ 10 பந்துகளில் 20 ரன்கள் சேர்த்து
ஆட்டமிழக்க, 20 ஓவர்களில் 7 விக்கெட் இழப்புக்கு 162 ரன்கள்
குவித்தது குஜராத். ஜடேஜா 15 பந்துகளில் 19, தவல் குல்கர்னி
3 ரன்களுடன் ஆட்டமிழக்காமல் இருந்தனர்.

ஹைதராபாத் தரப்பில் புவனேஸ்வர் குமார் 4 ஓவர்களில்
27 ரன்களைக் கொடுத்து 2 விக்கெட்டுகளையும், பென் கட்டிங்
3 ஓவர்களில் 20 ரன்களைக் கொடுத்து 2 விக்கெட்டுகளையும்
சாய்த்தனர்.

வார்னர் 93*: பின்னர் ஆடிய ஹைதராபாத் அணியில்
ஷிகர் தவன் 0, மோசஸ் ஹென்ரிக்ஸ் 11, யுவராஜ் சிங் 8,
தீபக் ஹூடா 4, பென் கட்டிங் 8 ரன்களில் ஆட்டமிழந்தனர்.

ஆனால் மறுமுனையில் தனிநபராக வெளுத்து வாங்கிய
கேப்டன் டேவிட் வார்னர் 35 பந்துகளில் அரை சதம் கண்டார்.

இதன்பிறகு நமன் ஓஜா 10 ரன்களில் நடையைக் கட்ட,
பிபுல் சர்மா களம்புகுந்தார். அவர் வந்த வேகத்தில்
3 சிக்ஸர்களை விளாசினார். மறுமுனையில் அசத்தலாக
ஆடிய வார்னர், பிரவீண் குமார் வீசிய கடைசி ஓவரின் முதல்
பந்தில் பவுண்டரியும், அடுத்த பந்தில் ஒரு ரன்னும் எடுக்க,
19.2 ஓவர்களில் 6 விக்கெட் இழப்புக்கு 163 ரன்கள் குவித்து
வெற்றி கண்டது ஹைதராபாத்.

டேவிட் வார்னர் 58 பந்துகளில் 93, பிபுல் சர்மா 11 பந்துகளில்
3 சிக்ஸர்களுடன் 27 ரன்கள் குவித்து ஆட்டமிழக்காமல்
இருந்தனர்.

குஜராத் தரப்பில் டுவைன் பிராவோ, கெளஷிக் ஆகியோர்
தலா 2 விக்கெட்டுகளை வீழ்த்தினர். டேவிட் வார்னர் ஆட்ட
நாயகனாக தேர்வு செய்யப்பட்டார்.
–

டேவிட் வார்னர்-779
–
இந்த சீசனில் இதுவரை 16 ஆட்டங்களில் விளையாடியுள்ள
டேவிட் வார்னர் 8 அரை சதங்களுடன் 779 ரன்கள்
குவித்துள்ளார். இதன்மூலம் இந்த சீசனில் அதிக ரன்
குவித்தவர்கள் வரிசையில் 2-ஆவது இடத்தைப் பிடித்துள்ள
வார்னர், ஐபிஎல் வரலாற்றில் ஒரு சீசனில் 700 அல்லது அதற்கு
மேற்பட்ட ரன்களைக் குவித்த 4-ஆவது வீரர் என்ற பெருமையைப்
பெற்றுள்ளார்.

கோலி, கெயில், மைக் ஹசி ஆகியோர் மற்ற மூவர். இதில்
கெயில் இரு முறை 700 ரன்களுக்கு மேல் குவித்துள்ளார்.

இதுதவிர ஐபிஎல் வரலாற்றில் இலக்கை துரத்துகிறபோது
(ஒரு தொடரில்) அதிக ரன் குவித்தவர்கள் வரிசையிலும்
முதலிடத்தைப் பிடித்துள்ளார் வார்னர்.
இந்த சீசனில் இலக்கை துரத்தியபோது அவர் 468 ரன்கள்
குவித்துள்ளார்.

முன்னதாக 2014 சீசனில் ராபின் உத்தப்பா 457 ரன்கள்
குவித்ததே சாதனையாக இருந்தது.
–
——————————
–
சுருக்கமான ஸ்கோர்
–
குஜராத்-162/7
–
ஆரோன் ஃபிஞ்ச் 50 (32)
மெக்கல்லம் 32 (29)
புவனேஸ்வர் குமார் 2வி/27
ஹைதராபாத்-163/6
வார்னர் 93* (58)
பிபுல் சர்மா 27* (11)
கெளஷிக் 2வி/22