அரவக்குறிச்சி-தஞ்சையில் ஜூன் 13 இல் வாக்குப் பதிவு

**ayyasamy ram** · **ayyasamy ram** Sat May 21, 2016 9:38 am

அரவக்குறிச்சி, தஞ்சாவூர் தொகுதிகளில் ஜூன் 13 ஆம் தேதி வாக்குப் பதிவு நடைபெறும் என்று தேர்தல் ஆணையம் அறிவித்துள்ளது.

இந்தத் தொகுதிகளுக்கு வரும் 25 ஆம் தேதி வாக்குப் பதிவு நடைபெறும் என்று ஏற்கெனவே அறிவிக்கப்பட்ட நிலையில், மூன்று வாரங்களுக்கு வாக்குப் பதிவு தள்ளி வைக்கப்பட்டுள்ளது.

கரூர் மாவட்டம் அரவக்குறிச்சி, தஞ்சாவூர் ஆகிய தொகுதிகளில் வாக்காளர்களுக்கு மிகப்பெரிய அளவுக்கு பணமும், பரிசுப் பொருள்களும் விநியோகம் செய்யப்பட்டதாக புகார்கள் எழுந்தன.

இந்தப் புகார்களின் அடிப்படையில், வாக்குப் பதிவு மே 16 ஆம் தேதியில் இருந்து 25 ஆம் தேதிக்கு தள்ளிவைக்கப்பட்டது. மேலும், இரு தொகுதிகளிலும் வாக்காளர்களுக்கு பணமும், பரிசுப் பொருள்களும் வழங்குவதற்கான காரணங்கள் குறித்து ஆராய ஏழு பேர் கொண்ட விசாரணைக் குழுவை தேர்தல் ஆணையம் அமைத்தது.

விசாரணைக் குழுவின் அறிக்கையை மே 19 ஆம் தேதி மாலை 4 மணிக்குள் தாக்கல் செய்ய வேண்டும் எனவும் ஆணையம் உத்தரவிட்டிருந்தது. இந்த உத்தரவைத் தொடர்ந்து, விசாரணைக் குழு தனது அறிக்கையை தாக்கல் செய்தது.

இதைத் தொடர்ந்து, அரவக்குறிச்சி, தஞ்சாவூர் தொகுதிகளில் வாக்குப் பதிவு தேதியை மே 25 ஆம் தேதிக்குப் பதிலாக, ஜூன் 13 ஆம் தேதிக்கு தள்ளி வைத்துள்ளது. இதற்கான உத்தரவை தேர்தல் ஆணையத்தின் மூத்த முதன்மைச் செயலாளர் தபஸ் குமார் வெள்ளிக்கிழமை இரவு பிறப்பித்தார்.

காரணம் என்ன வாக்குப் பதிவு தேதி மேலும் தள்ளிவைக்கப்பட்டதற்கு, தேர்தல் ஆணையம் அளித்துள்ள விளக்கம்:-

அரவக்குறிச்சி, தஞ்சாவூர் தொகுதிகளில் அதிகளவு பணம், பரிசுப் பொருள்கள் விநியோகம் தொடர்பாக விசாரிக்க அமைக்கப்பட்ட குழு தனது அறிக்கையை அளித்துள்ளது. இந்தக் குழுவின் அறிக்கைப்படி, அங்கு பண விநியோகம் குறித்து மேலும் விசாரணை நடத்துவது அவசியமாகும். இதனால், வாக்குப் பதிவை மே 23 ஆம் தேதியில் இருந்து மூன்று வாரங்களுக்கு தள்ளி வைக்க வேண்டியுள்ளது.

இதன்படி, இரு தொகுதிகளிலும் வாக்குப் பதிவானது மே 25 ஆம் தேதிக்குப் பதிலாக, ஜூன் 13 ஆம் தேதி நடைபெறும். இரு தொகுதிகளிலும் தேர்தல் தொடர்பான அனைத்து நடவடிக்கைகளும் ஜூன் 20 ஆம் தேதிக்கு முன்னதாக நிறைவடையும் என்று தபஸ் குமார் தெரிவித்துள்ளார்.
-
தினமணி