டெல்லியை வீழ்த்தியது புணே: அசோக் திண்டா, ஆடம் ஸம்பா அபாரம்

-
ஐபிஎல் கிரிக்கெட் போட்டியின் 49-ஆவது லீக் ஆட்டத்தில்
டக்வொர்த் லீவிஸ் விதிப்படி 19 ரன்கள் வித்தியாசத்தில்
டெல்லி டேர்டெவில்ஸை தோற்கடித்தது ரைஸிங் புணே
சூப்பர்ஜயன்ட்ஸ்.

இந்த ஆட்டத்தில் தோல்வி கண்டதன் மூலம் டெல்லி அணி
பிளே ஆஃப் சுற்றுக்கு முன்னேறுவதில் சிக்கல் ஏற்பட்டுள்ளது.
அந்த அணி இதுவரை 12 ஆட்டங்களில் விளையாடி
6 வெற்றிகளை மட்டுமே பெற்றுள்ளது.

விசாகப்பட்டினத்தில் செவ்வாய்க்கிழமை நடைபெற்ற இந்த
ஆட்டத்தில் டாஸ் வென்ற புணே பீல்டிங்கை தேர்வு செய்தது.
இதையடுத்து பேட் செய்த டெல்லி அணிக்கு ஆரம்பத்திலேயே
அதிர்ச்சிக் காத்திருந்தது. டி காக் 2 ரன்களிலும், ஷ்ரேயஸ் ஐயர்
8 ரன்களிலும் திண்டா பந்துவீச்சில் ஆட்டமிழக்க, பின்னர் வந்த
சஞ்ஜு சாம்சன் 10, ரிஷப் பந்த் 4 ரன்களில் நடையைக் கட்டினர்.
இது மேலும் பின்னடைவாக அமைந்தது.

இதையடுத்து ஜே.பி.டுமினி களமிறங்க, மறுமுனையில்
விக்கெட்டை காப்பாற்றுவதற்காக நிதானமாக ஆடிய
கருண் நாயர் 43 பந்துகளில் 5 பவுண்டரிகளுடன் 41 ரன்கள்
சேர்த்து 5-ஆவது விக்கெட்டாக வெளியேறினார்.

இதையடுத்து கிறிஸ் மோரிஸ் களமிறங்க, ஜே.பி.டுமினி
14 ரன்களில் நடையைக் கட்டினார். 19 ஓவர்களில் டெல்லி
அணி 99 மட்டுமே எடுத்திருந்தது.
ஆனால் திசாரா பெரேரா வீசிய 20-ஆவது ஓவரை எதிர்கொண்ட
மோரிஸ், அதில் 2 சிக்ஸர், 2 பவுண்டரிகளை விளாசினார்.
இதனால் அந்த ஓவரில் 22 ரன்கள் கிடைக்க, 20 ஓவர்களில்
6 விக்கெட் இழப்புக்கு 121 ரன்கள் சேர்த்தது
டெல்லி. மோரிஸ் 20 பந்துகளில் 2 சிக்ஸர், 4 பவுண்டரிகளுடன்
38 ரன்கள் குவித்து ஆட்டமிழக்காமல் இருந்தார்.

புணே தரப்பில் அசோக் திண்டா 4 ஓவர்களில் 20 ரன்களை
மட்டுமே கொடுத்து 3 விக்கெட்டுகளை வீழ்த்தினார்.
ஆடம் ஸம்பா 4 ஓவர்களில் 21 ரன்களைக் கொடுத்து 3 விக்கெட்
எடுத்தார்.

புணே வெற்றி:
பின்னர் ஆடிய புணே அணியில் உஸ்மான் கவாஜா-அஜிங்க்ய
ரஹானே ஜோடி முதல் விக்கெட்டுக்கு 3.4 ஓவர்களில்
31 ரன்கள் சேர்த்தது. கவாஜா 13 பந்துகளில் 19 ரன்கள் சேர்த்து
வெளியேற, ஜார்ஜ் பெய்லி களம்புகுந்தார்.

புணே அணி 11 ஓவர்களில் ஒரு விக்கெட் இழப்புக்கு
76 ரன்கள் எடுத்திருந்தபோது 2-ஆவது முறையாக மழை
குறுக்கிட்டது. இதையடுத்து டக்வொர்த் லீவிஸ் விதிப்படி
வெற்றி தீர்மானிக்கப்பட்டது. அதன்படி 19 ரன்கள்
வித்தியாசத்தில் வெற்றி கண்டது புணே.

ரஹானே 36 பந்துகளில் 1 சிக்ஸர், 5 பவுண்டரிகளுடன் 42,
ஜார்ஜ் பெய்லி 8 ரன்களுடன் ஆட்டமிழக்காமல் இருந்தனர்.
தின்டா ஆட்டநாயகனாகத் தேர்வு செய்யப்பட்டார்.

சுருக்கமான ஸ்கோர்
டெல்லி-121/6
கருண் நாயர் 41 (43)
கிறிஸ் மோரிஸ் 38* (20)
அசோக் திண்டா 3வி/20
ஆடம் ஸம்பா 3வி/21
புணே-76/1
ரஹானே 42* (36)
கவாஜா 19 (13)
மோரிஸ் 1வி/12