அர்ஜுனா விருதுக்கு ரிது ராணி, வி.ஆர்.ரகுநாத் பெயர்கள் பரிந்துரை

**ayyasamy ram** · **ayyasamy ram** Thu 12 May 2016 - 12:20

-

விளையாட்டுத் துறையில் சாதனைபடைக்கும்
வீரர்களுக்கு வழங்கப்படும் அர்ஜுனா விருதுக்கு
இந்திய மகளிர் ஹாக்கி அணி கேப்டன் ரிது ராணி,
ஆடவர் ஹாக்கி அணி வீரர் வி.ஆர்.ரகுநாத்
ஆகியோரது பெயர்களை ஹாக்கி இந்தியா
பரிந்துரைத்துள்ளது.

இதுதொடர்பாக ஹாக்கி இந்தியா வெளியிட்டுள்ள
அறிக்கையில், “வி.ஆர்.ரகுநாத், தரம்வீர் சிங்,
ரிது ராணி ஆகியோர் அர்ஜுனா விருதுக்காக
பரிந்துரைக்கப்பட்டுள்ளனர்.

அதேபோல், தயான் சந்த் வாழ்நாள் சாதனையாளர்
விருதுக்காக முன்னாள் வீரர் சில்வானஸ் டங் டங்
பரிந்துரைக்கப்பட்டுள்ளார்.

பயிற்சியாளர்களுக்கான துரோணாச்சாரியா
விருதுக்காக, மூத்த பயிற்சியாளர் சி.ஆர்.குமார்
பரிந்துரைக்கப்பட்டுள்ளார்’ என்று தெரிவிக்கப்
பட்டுள்ளது.

இதுகுறித்து, ஹாக்கி இந்தியா செயலர்
மோஹ்த் முஷ்டாக் அகமது கூறுகையில்,
“ஹாக்கி விளையாட்டுக்கான அவர்களது அர்ப்பணிப்பு,
சர்வதேச அளவில் இந்தியாவுக்கு அவர்கள் தேடித்
தந்த பெருமை ஆகியவற்றின் அடிப்படையில் அவர்கள்
இந்த விருதுகளுக்கு பரிந்துரைக்கப்பட்டுள்ளனர்.

அவர்கள் அனைவரும் அனைத்து விதமான
அங்கீகாரத்துக்கும், பாராட்டுதலுக்கும் உரியவர்கள்
என்பதை முழுமையாக நம்புகிறேன்’ என்றார்.

**ayyasamy ram** · **ayyasamy ram** Thu 12 May 2016 - 12:20

இதில் வாழ்நாள் சாதனையாளர் விருதுக்கு
பரிந்துரைக்கப்பட்டுள்ள சில்வானஸ் (70),
1980ஆம் ஆண்டு ஒலிம்பிக்கில் தங்கம் வென்ற
இந்திய ஹாக்கி அணியில் இடம்பெற்றிருந்தார்.

அர்ஜுனா விருதுக்கு பரிந்துரைக்கப்பட்டுள்ள
ரகுநாத், 2005ஆம் ஆண்டு பாகிஸ்தானுக்கு எதிரான
ஹாக்கி தொடரில் சிறப்பாகச் செயல்பட்டார்.

இந்தியாவில் உள்ள மிகச் சிறந்த “டிராக்
ஃப்ளிக்கர்’களில் இவரும் ஒருவராவார்.
2007ஆம் ஆண்டு ஆசிய கோப்பை, 2014ஆம் ஆண்டு
ஆசிய போட்டிகள் ஆகியவற்றில் தங்கம் வென்ற
இந்திய அணியில் ரகுநாத் பங்குவகித்தார்.
அதேபோல், தரம்வீர் சிங்கும் ஆசிய போட்டியில்
தங்கம் வென்ற அணியில் இடம்பிடித்திருந்தார்.
–
இந்திய மகளிர் ஹாக்கி அணி, எதிர்வரும் ரியோ
ஒலிம்பிக்கில் பங்கேற்பதற்கான வாய்ப்பை உறுதி
செய்துள்ளார் ரிது ராணி.

2011ஆம் ஆண்டு இளையோர் உலகக் கோப்பை
உள்ளிட்ட போட்டிகளில் பயிற்சியாளர் சி.ஆர்.குமார்
சிறப்பாகச் செயலாற்றியது குறிப்பிடத்தக்கது.
–
—————————–
தினமணி