கோடையில் மின் பற்றாக்குறை ஏற்படாது

கோடைக் காலத்தில் மின் பற்றாக்குறை ஏற்படாது
என்றும் அதிகரித்துள்ள தேவையைக் கணக்கில்
கொண்டு மின்சார உற்பத்தியும் அதிகரிக்கப்பட்டுள்ளது
என்றும் மின்வாரிய அதிகாரிகள் கூறினர்.

தமிழக மின்சார வாரியத்தின் கீழ் 8 அனல் மின்
நிலையங்கள் செயல்பட்டு வருகின்றன. தமிழகத்துக்குத்
தேவையான பெரும்பாலான அளவு மின்சாரம் அனல்
மின் நிலையங்களில் இருந்துதான் பெறப்படுகிறது.

இதுதவிர, அணைக்கட்டுகள் மூலம் மின்சாரம் சேகரிக்கும்
16 யூனிட்டுகள் உள்ளன. காற்றாலை மின் உற்பத்தி, சூரிய
ஒளி மின்சாரம் என பல்வேறு வகைகளில் மின்சாரம்
தயாரிக்கப்பட்டு வருகிறது.

இவற்றில் அணைக்கட்டுகள், காற்றாலை மின் உற்பத்தி
ஆகியவை குறிப்பிட்ட சீசன்களில் மட்டுமே இயங்க முடியும்.

சூரிய ஒளி மின்சாரத்தைப் பொருத்தவரை ஓராண்டில்
பெரும்பாலான மாதங்கள் உற்பத்தி நடைபெறும். சூரிய ஒளி
மின்உற்பத்தி நிலையங்களின் மூலம் 650 மெகாவாட்
மின்சாரம் உற்பத்தி செய்யப்படுகிறது.

கோடைக்காலத்தில்.. : வழக்கமாக, கோடைக் காலத்தில்
மின்சாரத்தின் தேவை அதிகரிக்கும். இந்த ஆண்டு ஜனவரி
மாதத்தில் மின்சாரத்தின் தேவை அதிகபட்சமாக
12,797 மெகாவாட்டாக இருந்தது. பிப்ரவரி மாதம் முதலே
வெயிலின் தாக்கம் அதிகரிக்கத் தொடங்கியதால் மின்சாரத்தின்
பயன்பாடும் அதிகரிக்கத் தொடங்கியது.

இதனால், மார்ச் மாதத்திலேயே மின்சாரத்தின் தேவை
14,538 மெகாவாட்டை எட்டியது.

5 ஆண்டுகளில் அதிக உற்பத்தி: கடந்த 5 ஆண்டுகளில்
மின்சார உற்பத்தி கணிசமாக உயர்ந்துள்ளது. 2011-ஆம்
ஆண்டில் அதிகபட்சமாக 10,859 மெகாவாட் மின்சாரம்
தயாரிக்கப்பட்டது. 2012-ஆம் ஆண்டில் 11,285 மெகாவாட்,
2014-இல் 13,775 மெகாவாட் உற்பத்தியை எட்டியது.
இந்நிலையில் 2016-ஆம் ஆண்டு ஏப்ரல் 13-ஆம் தேதி
14,736 மெகாவாட்டாகவும், ஏப்ரல் 15-ஆம் தேதி
14,969 மெகாவாட்டாகவும் அதிகரித்துள்ளது.

கடந்த 5 ஆண்டுகளை ஒப்பிடும்போது இந்த ஏப்ரல் மாதத்தில்
அதிக அளவில் மின்சாரம் உற்பத்தி செய்யப்பட்டுள்ளது.

இது தொடர்பாக மின்சார வாரிய உயர் அதிகாரிகள் கூறியது:-

கோடைக்காலத்துக்கு முன்பே வெப்பம் அதிகரித்துள்ளதால்,
மின்சாரத்தின் பயன்பாடும் அதிகரித்துள்ளது. சாதாரண
நேரங்களைக் காட்டிலும் 20 சதவீதம் மின்சாரப் பயன்பாடு
அதிகரித்துள்ளது. அதனைச் சமாளிக்கும் வகையில் சுமார்
15 ஆயிரம் மெகாவாட் மின்சாரம் உற்பத்தி செய்யப்படுகிறது.
இதனால் மின்சாரத் தேவைகள் எட்டப்படுகின்றன.

மே மாதத்தில் அக்னி நட்சத்திரம் தருணத்தில் மின் பயன்பாடு
இன்னும் 5 சதவீதம் வரை அதிகரிக்கக் கூடும். உற்பத்தி
போதுமான அளவு இருக்கும் காரணத்தினால் மின்சார பற்றாக்
குறை ஏற்பட வாய்ப்பு இல்லை என்றனர்.

கண்காணிக்கக் குழு: மின்சார விநியோகத்தில் ஏதேனும் தடை
ஏற்பட்டால், அதனைக் கண்காணிக்க 40 வட்டத்திலும் இளநிலை
உதவியாளர்களின் தலைமையில் 4 பேர் கொண்ட குழு
நியமிக்கப்பட்டுள்ளது. குறைபாடுகள், புகார்கள் குறித்து
உடனுக்குடன் நடவடிக்கை எடுக்கப்படுகிறதா, இரவு நேரத்தில்
மின் விநியோகம் தடைபடுகிறதா உள்ளிட்டவை குறித்து அதிரடி
ஆய்வில் 24 மணி நேரமும் பணியில் இருப்பர்.

கோடையில் தடையில்லா மின்சாரம் வழங்கும் நோக்கில்
செயல்பட்டு வருவதாக அதிகாரிகள் தெரிவிக்கின்றனர்.
-
-----------------------------
தினமணி