கோடைக்கு முன்பே அதிக வெப்பம்: சிறுநீரகத் தொற்றால் மக்கள் அவதி

-

-
கோடைக்கு முன்பே வெப்பம் அதிகரித்துக்
காணப்படுவதால் பொதுமக்கள் அதிக அளவில்
சிறுநீரகத் தொற்றுக்கு ஆளாவதாக மருத்துவர்கள்
தெரிவிக்கின்றனர்.
-
இதன் காரணமாக மருத்துவமனைக்குச் செல்லும்
நோயாளிகளின் எண்ணிக்கையும் அதிகரிப்பதாகவும்
அவர்கள் தெரிவிக்கின்றனர்.
-
தமிழகத்தில் கடந்த பிப்ரவரி மாதத்தில் இருந்தே
வெயிலின் தாக்கம் அதிகரிக்கத் தொடங்கிவிட்டது.
இந்த மாதத்தில் தமிழகத்தின் பல நகரங்களில்
வெயிலின் அளவு 100 டிகிரியைத் தாண்டியுள்ளது.
-
இந்த நிலையில், ஏப்ரல் மாதத்துக்கு முன்பே
வெயிலின் தாக்கம் அதிகரித்துள்ளதால், கோடை
தொடர்பான நோய்களால் மக்கள் பாதிக்கப்
பட்டுள்ளனர்.
-
என்னென்ன நோய்கள்: தமிழகத்தைப் பொருத்தவரை,
கோடை காலத்தில் நீர் மாசுபடுவதால் வயிற்றுக்
கடுப்பு, வயிற்றுப்போக்கு, டைபாய்டு, எலிக் காய்ச்சல்
உள்ளிட்ட நோய்கள் ஏற்பட வாய்ப்பு உள்ளது.
-
கோடை காலத்தில் பரவும் நோய்கள் குறித்து பொது
மக்களிடையே விழிப்புணர்வு உள்ளது. ஆனால்,
ஓசையின்றிப் பரவும் சிறுநீரகத் தொற்று, சிறுநீரகத்தில்
கல் ஆகியவை மக்களிடையே அதிகப் பாதிப்பை
ஏற்படுத்தி வருவதாக மருத்துவர்கள் தெரிவிக்கின்றனர்.
-
ஏன் பாதிப்பு:
வெயில் காலத்தில் உடலின் நீரானது வியர்வை மூலம்
அதிகம் வெளியேறும். இதன் காரணமாக சிறுநீர் கழிப்பது
குறையும். மனிதரின் சிறுநீர்ப் பாதையில் எப்போதும்
பாக்டீரியாக்கள் காணப்படும். அதிக அளவில் தண்ணீர்
குடித்து, அடிக்கடி சிறுநீர் கழிக்கும்போது பாக்டீரியாக்கள்
உடனுக்குடன் வெளியேறும்.
-
வெயில் நேரங்களில் சிறுநீர் குறையும் போது, சிறுநீர்ப்
பாதையில் காணப்படும் பாக்டீரியாக்கள் வெளியேறாமல்
நோய்த்தொற்றை ஏற்படுத்தும். இதன் காரணமாக சிறுநீர்ப்
பாதையில் நோய்த்தொற்று ஏற்படுகிறது. இதேபோல,
தண்ணீர் அதிகம் குடிக்காமல் சிறுநீர் கழிக்காமல் இருந்தால்,
சிறுநீரகத்தில் உள்ள கால்சியம் படிந்து அது கற்களாக
மாறும் என்று மருத்துவர்கள் தெரிவிக்கின்றனர்.
-
இதுகுறித்து சென்னை மருத்துவக் கல்லூரியின் பொது
மருத்துவத் துறைத் தலைவர் டாக்டர் ரகுநாதன்
கூறியதாவது:
-
உடலில் உள்ள நீர்ச்சத்து குறையும் போது சிறுநீரகம்
சம்பந்தப்பட்ட பிரச்னைகள் ஏற்படும். இதன் காரணமாக
கோடை காலத்தில் நீர்ச்சத்து அதிகமுள்ள காய்கறி,
பழங்களை உள்கொள்ளுதல் அவசியம்.
-
கோடை காலத்தில் கைகளில் எப்போதும் குடிப்பதற்கு
நீர் வைத்திருப்பது அவசியம். சாலையோரங்களில் விற்கப்
படும் சுகாதாரமற்ற உணவுப் பொருள்கள், பழச்சாறுகளை
அருந்துவதைத் தவிர்க்க வேண்டும். அவ்வாறு அருந்தினால்
வயிற்றுப்போக்கு உள்ளிட்ட பிரச்னைகள் ஏற்பட
வாய்ப்புள்ளன என்றார் அவர். இந்தப் பிரச்னைகளுக்காக
அரசு மருத்துவமனைகளில் ஒரு நாளைக்கு நூற்றுக்
கணக்கானோர் வெளி நோயாளிகளாக சிகிச்சை பெற்றுச்
செல்வதாக மருத்துவர்கள் தெரிவிக்கின்றனர்.
-
இயற்கை மருத்துவம்: ஆங்கில மருத்துவம் மட்டுமன்றி,
சித்த மருத்துவத்திலும் சிறுநீரகத் தொற்று, சிறுநீரகத்தில்
கல் பிரச்னைக்காக சிகிச்சை பெறுகின்றனர்.

சென்னை அரும்பாக்கம் அரசு சித்த மருத்துவமனையிலும்
கோடை சம்பந்தபட்ட நோய்களுக்கு ஒரு நாளைக்கு சுமார்
200 பேர் சிகிச்சைக்காக வந்து செல்கின்றனர் என்று
மருத்துவர்கள் தெரிவித்தனர்.
-
தப்பிக்க என்ன வழி?
-
* தர்பூசணி, கிர்ணி, வெண்பூசணி போன்ற நீர்ச்சத்து
அதிகமுள்ள காய்கறி, பழங்களை உணவில் சேர்க்க
வேண்டும்.
-
* மோர், இளநீர், எலுமிச்சைச் சாறு ஆகியவற்றை
அருந்தலாம்.
-
* இறுக்கமான ஆடைகளை அணியக் கூடாது.
-
* குழந்தைகள், வயதானோர், சர்க்கரை நோயாளிகள்,
மனநலன் பாதிக்கப்பட்டு சிகிச்சை பெறுவோர் வெயிலில்
அதிகம் செல்லக் கூடாது.
-
* ஒரு நாளைக்கு 2.5 லிட்டர் முதல் 3 லிட்டர் குடிநீர்
அருந்த வேண்டும்.
* அதிக அளவில் குடிநீரைக் குடித்து, குறிப்பிட்ட கால
இடைவெளியில் சிறுநீர் கழிக்க வேண்டும்.
-
---------------------