ஆஸியை வீழ்த்திய "தனி ஒருவன்':அரையிறுதியில் நுழைந்தது இந்தியா

-
டி20 உலகக் கோப்பை கிரிக்கெட் போட்டியில்
6 விக்கெட் வித்தியாசத்தில் ஆஸ்திரேலியாவை
வீழ்த்தி அரையிறுதியில் நுழைந்தது இந்தியா.
-
முன்னணி பேட்ஸ்மேன்கள் சொதப்பியபோதும்,
தனியொருவனாக களத்தில் நின்று 51 பந்துகளில்
2 சிக்ஸர், 9 பவுண்டரிகளுடன் 82 ரன்கள் குவித்து
இந்தியாவை அரையிறுதிக்கு அழைத்துச் சென்றார்
கோலி.
இந்த ஆட்டத்தில் தோற்ற ஆஸ்திரேலியா,
போட்டியிலிருந்து வெளியேறியது.
-
மொஹாலியில் ஞாயிற்றுக்கிழமை நடைபெற்ற இந்த
ஆட்டத்தில் டாஸ் வென்று முதலில் பேட் செய்த
ஆஸ்திரேலிய அணியில் உஸ்மான்
கவாஜா-ஆரோன் ஃபிஞ்ச் ஜோடி ஆரம்பத்திலேயே
அதிரடியில் இறங்கியது.
-
நெஹ்ரா வீசிய முதல் ஓவரில் பவுண்டரி அடித்து
ரன் கணக்கைத் தொடங்கிய உஸ்மான் கவாஜா,
பூம்ரா வீசிய அடுத்த ஓவரில் ஹாட்ரிக் பவுண்டரி
உள்பட 4 பவுண்டரிகளை பறக்கவிட்டார்.
-
இதன்பிறகு அஸ்வின் ஓவரில் ஆரோன் ஃபிஞ்ச்
தொடர்ச்சியாக இரு சிக்ஸர்களை விளாச,
4 ஓவர்களில் 53 ரன்களை எட்டியது ஆஸ்திரேலியா.
5-ஆவது ஓவரை வீசிய ஆசிஷ் நெஹ்ரா,
உஸ்மான் கவாஜாவை வீழ்த்தினார். அவர்
16 பந்துகளில் 6 பவுண்டரிகளுடன் 26 ரன்கள்
எடுத்தார்.
-
பின்னர் வந்த டேவிட் வார்னர் 9 ரன்களில் வெளியேற,
கேப்டன் ஸ்டீவன் ஸ்மித் 2 ரன்கள் எடுத்த நிலையில்,
யுவராஜ் சிங் பந்துவீச்சில் சர்ச்சைக்குரிய முறையில்
ஆட்டமிழந்தார்.
-
இதன்பிறகு மேக்ஸ்வெல் களமிறங்க, மறுமுனையில்
நங்கூரமாய் நின்ற ஃபிஞ்ச், பாண்டியா பந்துவீச்சில்
வீழ்ந்தார். அவர் 34 பந்துகளில் 2 சிக்ஸர்,
3 பவுண்டரிகளுடன் 43 ரன்கள் எடுத்தார்.
-
இதையடுத்து ஷேன் வாட்சன் களமிறங்க, மறுமுனையில்
வேகமாக ரன் சேர்க்க முயன்ற மேக்ஸ்வெல் 28 பந்துகளில்
31 ரன்கள் எடுத்து பூம்ரா பந்துவீச்சில் போல்டு ஆனார்.
பின்னர் வந்த ஜேம்ஸ் ஃபாக்னர் 10 ரன்கள் சேர்த்த
நிலையில், பாண்டியா வீசிய கடைசி ஓவரின் முதல் பந்தில்
ஆட்டமிழந்தார்.
-
இதையடுத்து பீட்டர் நெவில் களம்புகுந்தார். அந்த ஓவரின்
3-ஆவது பந்தில் வாட்சன் பவுண்டரியை விரட்ட, 5 மற்றும்
6-ஆவது பந்துகளில் ஒரு பவுண்டரி, ஒரு சிக்ஸரை
விளாசினார் பீட்டர் நெவில். இதனால் ஆஸ்திரேலியா
20 ஓவர்களில் 6 விக்கெட் இழப்புக்கு 160 ரன்கள் குவித்தது.
-
வாட்சன் 16 பந்துகளில் 18, பீட்டர் நெவில் 2 பந்துகளில்
10 ரன்களுடன் ஆட்டமிழக்காமல் இருந்தனர்.
கடைசி 5 ஓவர்களில் ஆஸ்திரேலியா 56 ரன்கள் குவித்தது.
எனினும் மிடில் ஓவர்களில் ஆஸ்திரேலியாவை கட்டுப்
படுத்தியது இந்தியா. 5 முதல் 15-ஆவது ஓவர் வரையிலான
11 ஓவர்களில் அந்த அணி 61 ரன்கள் மட்டுமே எடுத்தது.
-
இந்தியத் தரப்பில் ஹார்திக் பாண்டியா இரு விக்கெட்டுகளை
எடுத்தார்.
-
விராட் கோலி 82*:
-
பின்னர் ஆடிய இந்திய அணியில் ஷிகர் தவன் 13,
ரோஹித் சர்மா 12, சுரேஷ் ரெய்னா 10 ரன்களில்
அடுத்தடுத்து ஆட்டமிழந்தனர். இதனால் 7.4 ஓவர்களில்
49 ரன்களுக்கு 3 விக்கெட்டுகளை இழந்து தடுமாறியது
இந்தியா.
-
ஆனால் 4-ஆவது விக்கெட்டுக்கு இணைந்த விராட் கோலி-
யுவராஜ் சிங் ஜோடி சிறப்பாக ஆட,மோசமான நிலையில்
இருந்து மீண்டது இந்திய அணி. மேக்ஸ்வெல் வீசிய
12-ஆவது ஓவரில் கோலி ஒரு சிக்ஸரை விளாச,
ஆடம் ஸம்பா வீசிய அடுத்த ஓவரில் யுவராஜ் சிங் ஒரு
சிக்ஸரை விரட்டினார்.
-
இந்தியா 94 ரன்கள் எடுத்திருந்தபோது ஷேன் வாட்சனின்
அற்புதமான கேட்ச்சில் ஆட்டமிழந்தார் யுவராஜ் சிங்.
அவர் 18 பந்துகளில் 21 ரன்கள் எடுத்தார். இதையடுத்து
கேப்டன் தோனி களம்புகுந்தார்.
-
5 ஓவர்களில் 59:
-
கடைசி 5 ஓவர்களில் இந்தியா வெற்றி பெற 59 ரன்கள்
எடுக்க வேண்டியிருந்தது. அடுத்த இரு ஓவர்களில் இந்தியா
20 ரன்கள் சேர்க்க, கடைசி 3 ஓவர்களில் 39 ரன்கள் எடுக்க
வேண்டிய நிலை ஏற்பட்டது.
-
ஃபாக்னர் வீசிய 18-ஆவது ஓவரில் கோலி இரு
பவுண்டரிகளையும், ஒரு சிக்ஸரையும் விளாச, அந்த
ஓவரில் மட்டும் 19 ரன்கள் கிடைத்தன.
-
தொடர்ந்து கோல்ட்டர் நீல் வீசிய 19-ஆவது ஓவரில்
ஹாட்ரிக் பவுண்டரி உள்பட 4 பவுண்டரிகளை பறக்கவிட்டார்
கோலி.
-
கடைசி ஓவரில் 4 ரன்கள் எடுத்தால் வெற்றி என்ற நிலையில்
தோனி பவுண்டரி அடிக்க, இந்தியா 19.1 ஓவர்களில்
4 விக்கெட் இழப்புக்கு 161 ரன்கள் எடுத்து வெற்றி கண்டது.
-
கோலி 51 பந்துகளில் 82, தோனி 10 பந்துகளில் 18 ரன்களுடன்
ஆட்டமிழக்காமல் இருந்தனர்.
ஆஸ்திரேலியத் தரப்பில் வாட்சன் 2 விக்கெட் எடுத்தார்.
கோலி ஆட்டநாயகனாகத் தேர்வு செய்யப்பட்டார்.
-
--------------------------------
தினமணி

தென் ஆப்பிரிக்கா-இலங்கை மோதல்
--
சூப்பர் 10 சுற்றின் கடைசி ஆட்டமான
தென் ஆப்பிரிக்கா-இலங்கை இடையிலான ஆட்டம்
தில்லியில் திங்கள்கிழமை நடைபெறுகிறது.

இரு அணிகளும் ஏற்கெனவே அரையிறுதி வாய்ப்பை
இழந்துவிட்டதால் இந்த ஆட்டம் சம்பிரதாயத்துக்காகவே
ஆடப்படுகிறது. இந்த ஆட்டம் இரவு 7.30 மணிக்கு
தொடங்குகிறது.
-