தினமும் ஒரு சொம்பு பால் ஊற்றுங்கள்...

-
ஒரு கிராமத்திற்கு துறவி ஒருவர் வருகை
தந்தார். அங்கிருந்த கோயிலில் தங்கினார்.
அங்கு காலைக்கடன் முடித்து விட்டு, நீர்
கொண்டு வந்து இறைவனுக்கு அபிஷேகம்
செய்வார்; அலங்காரம் செய்து வழிபடுவார்.
பிறகு தியானத்தில் ஈடுபடுவார்.
-
கிராம மக்களுக்குக் கவனிப்பாரற்று இருந்த
கோயிலில் சாமியார் வந்து தங்கியிருப்பது
மகிழ்ச்சியாக இருந்தது. ஊர் ஜனங்கள்
இறைவனை வணங்குவர், துறவியையும்
வணங்கிச் செல்வர்.
-
பக்தர்கள் அவருக்குத் தேவையானதை அளித்து
ஆதரித்தனர். பக்தர்கள், அவ்வப்போது சாமியாரிடம்
தங்கள் பிரச்னைகளை சொல்வார்கள். துறவியும்,
அவர்களுக்கு ஆறுதலாக இறைவன் திருவருள்
பற்றிச் சொல்வார். எளிய மருத்துவமும் செய்வார்.
-
ஒருநாள் ஒருவர் சாமியாரிடம், 'சாமி, கடவுளை
எனக்குக் காட்ட முடியுமா?' என்று கேட்டார்.
-
துறவி சொன்னார், 'உனக்கு மட்டுமா, ஊரில் உள்ள
எல்லோருமே கடவுளைத் தரிசனம் செய்யலாமே'
என்றார்.
-
பக்தர் 'அப்படிங்களா? அதுக்கு நாங்க என்னங்க
செய்யணும்?'
-
துறவி, 'அதற்கு ஒரு வழி உண்டு. ஊரில்
உள்ளவர்கள் தினமும் ஒரு சொம்பு பால் கொண்டு
வாருங்கள். இங்கு உள்ள அபிஷேகப் பாத்திரத்தில்
பாலை ஊற்றுங்கள். இறைவனுக்குத் தினமும்
பால் அபிஷேகம் நடக்கும். அனைவரும்
இறைவனைத் தரிசிக்கலாம், அபிஷேக தீர்த்தம்
பெறலாம் சில காலத்திற்கு பிறகு கடவுள் உங்கள்
அனைவருக்கும் காட்சியளிப்பார்' என்றார்.
-
அதன்படி கிராமத்து ஜனங்கள் ஒவ்வொருவரும்
ஒரு சொம்புப் பாலைக் கொடுத்தனர்.
இறைவனுக்குத் தினமும் பால் அபிஷேகம் நடக்கும்.
அலங்காரம் ஆராதனை, எல்லாம் நடக்கும். பக்தர்கள்,
அபிஷேக தீர்த்தம் பெறுவர். இறைவனைத் தரிசித்து
மன அமைதியுடன் செல்வார்.
-
துறவியும் தேவையான பாலைப் பெறுவார்.
சில காலம் சென்றது. ஒருநாள் ஒரு பக்தர், 'ஐயா
கடவுள் எங்களுக்கு எப்போது காட்சியளிப்பா' என்று
கேட்டார்.
-
துறவி, 'அன்பர்களே கடவுள் உங்கள் தூயபக்தியைக்
கண்டு மகிழ்ச்சியடைந்துள்ளார். கடவுள் உங்களுக்குத்
தரிசனம் அளிக்கப் புறப்பட்டு விட்டார். விரைவில்
காட்சியளிப்பார்' என்றார்.
-
ஊர் மக்கள் நம்பிக்கையுடன் சென்றனர். பல நாட்கள்
சென்றன.
மீண்டும் ஒருநாள் பக்தர் ஒருவர் 'கடவுள் தரிசனம்
எப்போது?' என்றார்.
-
துறவி சொன்னார், 'அன்பர்களே கடவுளா! அவர்
வந்து விட்டாரே, அதோ பாருங்கள் இறைவனை'
என்றார்.
-
மக்களும் இறைவனைப் பக்தியுடன் வணங்கினார்கள்.
'கடவுளை காண முடியவில்லையா' என ஏக்கம்
அவர்கள் முகத்தில் தெரிந்தது.
-
துறவி விளக்கமாக எடுத்துச் சொன்னார்: 'அன்பர்களே
சில காலம் உங்களில் சிலர் நீர் கலந்து பாலும், சிலர்
கெட்டுப்போன பாலையும், பாத்திரத்தில் ஊற்றி
வந்தனர். அன்றாடம் அபிஷேக தீர்த்தம் அருந்தினீர்களே,
புளிப்பாக இருந்திருக்குமே' என்றார். கூடியிருந்தவர்
ஒருவரையொருவர் பார்த்துக் கொண்டனர்.
-
துறவி சொன்னார்: 'இப்போது அபிஷேக தீர்த்தம்
எவ்வளவு சுவையாக உள்ளது! எப்படி எல்லோரும்
நல்ல பாலையே இப்போது அளிக்கிறீர்கள், கடவுள்
இங்கேயே இருக்கிறார். உங்கள் நம்பிக்கை மட்டுமல்ல;
தூய்மையான .உள்ளங்களில் நிறைந்துள்ளார்
புரிகிறதல்லவா...?'
-
'அன்பர்களே! திடமான நம்பிக்கையுள்ள தூய
உள்ளங்களிலேதான் கடவுள் இருக்கிறார்' என்று
விளக்கினார். பக்தர்களும் கடவுள் தத்துவம் பரிந்து
கொண்டவர்களாக மகிழ்ச்சி ஆரவாரம் செய்தனர்.
-
எப்படி கதை? மனிதன் 'நீதி' குரங்கிலிருந்து மனிதன்
பிறந்தான் - மனிதனிலிருந்து மனிதன் (மனிதம்)
பிறக்காமலா போய்விடும்?
-
இந்த உலகம், உங்கள் உலகம்.
இந்த உலகில் கடவுளின் ஒரு துளி நீங்கள்.
இந்த உலகின் மனித சமுதாயத்தின் தலைவிதையை
நீங்களே, நிர்ணயிக்கிறீர்கள், நீங்களே தான்.
எனவே, இந்த உலகம்; உங்கள் உலகம், இந்த
வாழ்க்கை உங்கள் வாழ்க்கை.
இந்தக் குடும்பம் உங்கள் குடும்பம்.
இந்த நீங்கள் உங்கள் நீங்கள்.
எனவே, உங்களை நீங்கள் செதுக்குங்கள், சிறந்த
சிற்பமாக..
உங்கள் சரிதத்தை எழுதுங்கள், சிறந்த காப்பியமாக,
ஆம், அங்ஙனமே ஆகுக.
அன்பு வெல்க! தர்மம் தழைத்தோங்குக - உலகெங்கும்
அமைதி நிலவுக இதுவே அனைவரின் பிரார்த்தனைகளாக
இருக்கட்டும்!
-
-----------------------------------------

- வ மாசிலாமணி
நன்றி- மஞ்சரி

நல்ல பகிர்வு !