சிறைக்குள் கவிதைகள் எழுதிய சஞ்சய் தத்: விரைவில் புத்தகமாக வெளியிடப்படுகிறது

-
மும்பை தொடர் குண்டு வெடிப்பு வழக்கு தொடர்பான வழக்கில்
5 ஆண்டுகள் சிறைத் தண்டனை அனுபவித்தபோது, சிறைச்சாலைக்குள்
கைதிகளின் உதவியுடன் ஹிந்தி நடிகர் சஞ்சய் தத் கவிதைகள் எழுதியுள்ளார்.

அந்தக் கவிதைகள் அனைத்தும் தொகுக்கப்பட்டு, விரைவில் புத்தகமாக
வெளியிடப்படுகிறது.

இதுகுறித்து சஞ்சய் தத் கூறியதாவது:

சிறையில் உள்ள வானொலி நிலையத்தில் பணிபுரிந்தபடியே இரண்டு வரிகள்
கொண்ட 500 கவிதைகளை சக கைதிகளான சீஷன் குரேஷி, சமீர் ஹிங்க்ளே
ஆகியோரின் உதவியுடன் எழுதினேன். அவை அனைத்தையும் ஹிந்தி மொழியில்
எழுதியுள்ளேன்.

அந்தக் கவிதைத் தொகுப்புகளுக்கு "சலாகேன்' என்று பெயரிட்டுள்ளேன்.
அதை புத்தகமாக வெளியிடுவதற்கு நான் திட்டமிட்டுள்ளேன்.
-
இதுதவிர, மேலும் 100 கவிதைகளையும் எழுதியிருக்கிறேன்.
சிறையில் என்னை மனைவி மான்யதா சந்தித்தது போன்ற உண்மைச் சம்பவங்களை
அதில் குறிப்பிட்டுள்ளேன்.
-
திரைப்படத்தில் நடிக்க ஆர்வம்:
கவிதைகள் எழுதியபோதிலும், திரைப்படத்தில் மீண்டும் நடிப்பதற்கு ஆர்வமாக
இருக்கிறேன். சித்தார்த் ஆனந்த் இயக்கும் படத்தில் நடிக்கவுள்ளேன் என்றார் சஞ்சய் தத்.
-
மும்பையில் கடந்த 1993ஆம் ஆண்டு பயங்கரவாதிகள் நிகழ்த்திய தொடர் குண்டு
வெடிப்புகளில், 250க்கும் மேற்பட்டோர் உயிரிழந்தனர். சுமார் 700 பேர் காயமடைந்தனர்.
இந்தத் தாக்குதலுக்காக அனுப்பி வைக்கப்பட்ட ஆயுதங்களில் இருந்து ஒரு
ஏ.கே. ரக துப்பாக்கியை பயங்கரவாதிகளிடம் இருந்து வாங்கி வைத்திருந்ததாக
சஞ்சய் தத் கைது செய்யப்பட்டார்.
-
இந்த வழக்கில் அவருக்கு 5 ஆண்டுகள் சிறைத் தண்டனை விதிக்கப்பட்டது.
இதையடுத்து புணே எரவாடா சிறையில் அடைக்கப்பட்ட சஞ்சய் தத், சிறையில்
இருந்து நன்னடத்தையை சுட்டிக்காட்டி, முன்கூட்டியே விடுதலை செய்யப்பட்டார்.
-
சிறையில் அவர் இருந்தபோது, அங்குள்ள வானொலி நிலையத்தில் நிகழ்ச்சியைத்
தொகுத்து வழங்குபவராக பணியாற்றினார். பேப்பர் கப்புகளைத் தயாரிக்கும் பணியிலும்
ஈடுபட்டார்.
-
தினமணி