நான் கண்டுபிடிச்ச உண்மை – மாதவன் ஓபன் டாக்

-

‘இறுதிச் சுற்று’ படம் ஹிட்டான உற்சாகத்தில் இருந்தார்
மாதவன். தமிழ் சினிமா விதம்விதமான காதல்களில்
கரைந்து கொண்டிருக்கும் கால கட்டத்தில், பெண்கள்
குத்தச் சண்டை மற்றும் விளையாட்டில் கலந்திருக்கும்
அரசியலைக் களமாகக் கொண்ட வித்தியாசமான
இப்படம் மூலம் மாதவனுக்கு அடுத்த ரவுண்ட் ஆரம்பம்.
–
2012ல் வேட்டை வெளியானது. அதற்குப்பின் நீண்ட
இடைவெளி ஏன்?
–
டைரக்டர் சுதா, என்னிடம் இந்த கதையைச் சொல்லி ரொம்ப
நாளாச்சு. நான் ஒப்புக் கொண்டாலும், அதற்காக என்னை தயார்
படுத்திக் கொள்ள வேண்டி இருந்தது. இதற்கிடையில் என்ன
மாதிரியான படங்கள் பண்ணலாம்? எது மாதிரியான படங்கள்
பண்ணக்கூடாது? ரசிகர்களின் எதிர்பார்ப்பு என்ன? சினிமா
இண்டஸ்டிரியில் எப்படி டிரெண்ட் மாறிக் கொண்டிருக்கிறது?
என்று ஒரு சீரியஸான ரிசர்ச் பண்ணினேன்.
–
ரிசர்ச் மூலமாக என்ன கண்டுபிடிச்சீங்க…?
–
ஜனங்க ரொம்ப புத்திசாலிகள். அவங்களை லைட்டாக எடுத்துக்கக்
கூடாது. அவர்கள், தங்கள் யோசிக்க வைக்கும்படியாக, ரசிக்க
வைக்கும்படியாக எதையாவது புதுசாக, வித்தியாசமாகக்
கொடுத்தால்தான் ஏத்துக்கிறாங்க. இல்லேனா, அவர் எத்தனை
பெரிய ஸ்டாராக இருந்தாலும் படத்தை பார்க்க வருவதில்லை.
–
இறுதிச் சுற்று படத்தில் நடிக்க ஒப்புக் கொள்ள உங்களை தூண்டியது
எது?
–
கதைதான். இங்கே பொதுவாக ஸ்போர்ட்ஸ் சம்பந்தமான களம்,
கேரக்டர்ஸ் வைத்து படங்கள் வருவதில்லை. அதுவும் பெண்கள்
ஸ்போர்ட்ஸ் கிடையவே கிடையாது. டைரக்டர் சுதா, நாடு முழுக்க
பயணித்து, பெண்கள் குத்துச் சண்டை பற்றி ஏராளமான
விஷயங்களைச் சேகரித்து, அதன் அடிப்படையில் ஒரு கதையை
உருவாக்கினாங்க.

ஆகவேதான், அடுத்தத் தமிழ் படம் ரொம்ப வித்தியாசமான ஒன்றாக
இருக்க வேண்டும் என்று நினைத்துக் கொண்டிருந்த எனக்கு, அவர்
இந்தக் கதையை சொன்னதும், ரொம்பப் பிடித்துப் போயிடுச்சி.
–
குத்துச் சண்டை கோச்சாக நடிப்பதற்காக உங்களை எப்படித்
தயார்ப்படுத்திக் கொண்டீர்கள்?
–
கடுமையாக உடற்பயிற்சிகள் மூலமாக ஒரு கோச்சுக்குரிய உடற்
கட்டை ஏற்படுத்திக்கிட்டேன். நிறைய குத்துச் சண்டை போட்டி மற்றும்
பயிற்சி வீடியோக்களைப் பார்த்து. ஒரு கோச் எப்படி இருக்கணும்?
பயிற்சியின் போது, மேட்ச் நடக்கும்போது பாடி லங்குவேஜ் எப்படி
இருக்கணும்? இதெல்லாம் உன்னிப்பாகக் கவனித்தேன்.
அதெல்லாம் பல்வேறு சீன்களிலும் நடிக்க எனக்கு ரொம்ப உதவியாக
இருந்தது.
–
எந்தக் காட்சியில் நடிப்பது ரொம்ப சவாலாக இருந்தது?
–
கிளைமாக்சில் போலீசார் என்னை போட்டி நடக்கிற இடத்திலிருந்து
அப்புறப்படுத்தி இழுத்துச் செல்லும் காட்சி கஷ்டமாக இருந்துச்சு.
என்னை இழுத்துச் செல்வதற்கும் ரியாக்ஷன் கொடுக்கணும்.
பாக்ஸிங் ரிங் மீதும் கவனமாக இருக்கணும் என்பதால், கவனமாக
நடிக்க வேண்டிய இருந்தது.
–
—————————–

– சந்திரமௌலி- கல்கி