இறுதி வரை பஸ்ஸில் பயணித்த எம்.எல்.ஏ.,

பெரிய சர்ச்சைக்குப் பிறகு புதிய பொறுப்புக்கு வந்திருக்கிறார் ஜான்சிராணி. மகிளா காங்கிரஸ் பிரிவின் தலைவி. காந்தியவாதி ஏ.எஸ். பொன்னம்மாளின் பேத்தி. காரசாரமாக பேசுவார் என எதிர்பார்த்துப் போனால் அரசியல்வாதிக்கான அடையாளமே இல்லாமல் இருந்தா அவர்.
-
'சொந்த ஊர் அழகம்பட்டி. என்னோட அப்பா, அம்மா எனக்க எட்டு வயசு இருக்கும்போதே தவறிட்டாங்க. என் கூடப் பொறந்தவங்க மொத்தம் மூணு சகோதரிகள். பாட்டி பொன்னம்மாள்தான் எங்களை வளர்த்தாங்க. ஸ்கூலிங் முழுக்க நிலக்கோட்டையில் முடிச்சேன். டிகிரி மதுரையில படிச்சேன். அப்புறம் படிப்பு நிமித்தமா சென்னைக்கு வந்தேன். அந்த நேரத்தில் முத்து எனக்கு நண்பராக அறிமகமானார். அவரையே காதல் திருமணம் செய்து கொண்டேன். இப்போ எனக்க ரெண்டு பசங்க.
-
பாட்டியோட மறைவுக்குப் பிறகு எனக்க இந்த அங்கீகாரம் கிடைத்திருக்கிறது. யாரையும் விட இதைச் சரியாக செயல்படுத்த வேண்டும் என்ற பயமும் பொறுப்பும் கூடுதலாக எனக்க இருப்பதாக உணர்கிறேன்' என நிறுத்தி நிதானமாக பேசுகிறார் ஜான்சிராணி.

பாட்டியின் செல்வாக்கால்தான் உங்களுக்க, இந்தப் பதவி கிடைத்திருக்கிறது இல்லையா?
-
நிச்சயமா, அதான் உண்மை. என்னை யாருக்குமே தெரியாது இந்தப் பதவிக்காக போட்டிகள் நடந்த போதுகூட என் பெயர் அடிபடவில்லை. நான் எல்லோரையும் போல மிகச் சாதாரணமாகவே இருந்தேன். திடீரென்று என் பெயரை அறிவித்தபோது எனக்கு பெரும் அதிர்ச்சி. அந்த அடையாளத்தையும் அங்கீகாரத்தையும் என் பாட்டி பொன்னம்மாள்தான் கொடுத்துவிட்டுச் சென்றிருக்கிறார். இந்த நேரத்தில் தலைவர் இளங்கோவன், சோனியாஜி மற்றும் ராகுல்ஜிக்கு என் நன்றியைச் சொல்ல கடமைப்பட்டிருக்கிறேன்.
-
பாட்டியைப் பத்தி சொல்லுங்களேன்?
-
ஒரு சாதாரண தலித் சமூகத்தில் பிறந்தவர், ஏழு முறை சட்டமன்ற உறுப்பினராக செயலாற்றியிருக்கிறார் என்றால் அவருக்கு மக்கள் மத்தியில் எவ்வளவு செல்வாக்கு இருந்திருக்கும் என்று பார்த்துக் கொள்ளுங்கள். நான் பல குக்கிராமங்களுக்கு போகும்போது எல்லாம் பொன்னம்மா பேத்தியா? இந்த ரோட்டை உங்க பாட்டிதாங்க போட்டுக் கொடுத்தாங்கனு இன்றைக்கும் அடையாளம் காட்டுகிறார்கள். பாட்டி அவ்வளவு எளிமையானவர். கடைசி வரை பேருந்திலேயே பயணித்த ஒரு எம்.எல்.ஏ. ஒருமுறை தற்காலிக சபாநாயகராகவும் இருந்திருக்கிறார்.
-
குஷ்பு என்ன சொன்னாங்க?
-
நானே அவரிடம் பேசினேன். வாழ்த்தினார். நல்லா செயல்படுங்கனு சொன்னார். மகிளா டீமை தமிழ்நாட்டில் பெரிய, டீமாக வளர்த்து எடுக்கணும்னு சொன்னார்.

கோஷ்டிப் பூசலை எப்படி சமாளிப்பீங்க?
-
ஆரம்பத்தில் கொஞ்சம் நெருடலாகத்தான் இருந்தது. ஆனால் பொறுப்புக்கு வந்துவிட்டேன். அதிகமாக யாரிடமும் சர்ச்சை செய்ய விரும்பாத ஆள் நான். யார் எப்படி இருந்தாலும் நானே எல்லோரையும் சமமாக பாவிப்பேன். நானே தேடிப்போய் கருத்துக்களை கேட்பேன். கோஷ்டிப்பூசலைக் குறைக்க நிச்சயம் பாடுபடுவேன். என் பாட்டி எதைச் சேர்த்து வைத்தாரோ இல்லையோ நல்ல பெயரை சேர்த்து வைத்துவிட்டுச் சென்றிருக்கிறார். அதை நான் கெடுக்காமல் இருந்தாலே என் அளவுக்கு அது சாதனைதான்!

சட்டமன்ற உறுப்பினராக நிற்கும் ஆசை இருக்கா?

இருக்கு. அதுவும் என் பாட்டி தொகுதியிலேயே போட்டியிடணும் அது என் வாழ்நாள் விருப்பம்.

- கடற்கரய்