எந்தக் கடவுளும் சட்டம் போடவில்லை

மனதில் பட்டதை பளிச்சென பேசி பரபரப்பை பற்ற வைப்பது
குஷ்பு ஸ்டைல். தீவிர அரசியல்வாதி ஆன பிறகு டி.வி. சேனல்
விவாதங்களில் பங்கேற்று பட்டையைக் கிளப்பிக்
கொண்டிருப்பவர்,
-
போகிற போக்கில் ஆன்மிகத்தைத் தொட்டும் கருத்துச்
சொல்லியிருந்தார். அவரிடம் பேசினோம்.
-
தமிழ்நாடு மகளிர் காங்கிரஸ் தலைவர் பதவியிலிருந்து என்னை
நீக்க குஷ்புதான் காரணம்னு விஜயதாரணி எம்.எல்.ஏ. குற்றம்
சாட்டுகிறாரே?
-
இதுக்கு சிரிப்பு தான் என்னோட பதில். வேறு எதையும் நான்
சொல்ல விரும்பலை. நோ கமெண்ட்ஸ் ப்ளீஸ்...
-
நடிகர் மாதவனிடம் டி.வி. ஷோவில் முத்தம் வாங்கியது பற்றி...?
-
ஓ அதுவா... டி.வி.யில் நான் நடத்தும் சிம்ப்ளி குஷ்பு நிகழ்ச்சிக்கு
விருந்தினராக வந்திருந்தார் மாதவன். அவர் எங்கள் குடும்ப
நண்பர். நானும், மாதவனும் ஒரே துறையில் இருப்பவர்கள்.
-
அந்த வகையில் பேட்டியின் போது எதேச்சையாக எனக்கு மாதவன்
முத்தம் கொடுத்தார். நிகழ்ச்சியைப் பார்க்க வந்திருந்தவங்கள்
எல்லோரும் கைதட்டி ரசிச்சாங்க. அவ்வளவுதான்.
அது ஒரு சாதாரண நிகழ்வு மற்றபடி அதைப்பற்றி பேசுவதில் எந்த
அர்த்தமும் இல்லை. எதிலாவது குற்றம் கண்டுபிடிக்கணும்னு
நெனைக்கிறவங்க ஏதாவது சொல்லிக்கிட்டேதான் இருப்பாங்க.
அதுக்கெல்லாம் முக்கியத்துவம் கொடுக்கக் கூடாது.
-
சனிபகவான் கோயிலுக்குள் பெண்கள் அனுமதிக்கப்படணும்னு
பேசியிருக்கிங்களே?
-
மகாராஷ்டிரா மாநிலம் சிங்கனாபூர்ல சனி பகவானுக்குன்னு
இருக்கற புகழ்பெற்ற கோயில் அது. அந்தக் கோயிலை பெண்கள்
சுற்றி வர அனுமதி உண்டு.

ஆனால், உள்ளே குறிப்பாக கடவுள் இருக்கும் பகுதிக்குள்
பெண்களை அனுமதிப்பதில்லை. கோயில் மனிதர்களால் கட்டப்
பட்டது. ஆனால் அதனுள் இருக்கும் சக்தி படைத்த கடவுள் மனிதர்கள்
யாரையும் வேறுபடுத்திப் பார்ப்பதில்லை.
-
தெய்வத்தின் முன் அனைவரும் சமம், கடவுள் சன்னதியில் ஏழை,
பணக்காரன்னு எந்தப் பாகுபாடும் இருக்கக்கூடாதுன்னு சொல்வாங்க.
அனைத்துத் துறைகளிலும் ஆணுக்குப் பெண் சமமா மாறிக்கிட்டு
வர்ற சமூகத்துல நாம வாழ்ந்துக்கிட்டிருக்கோம்.

அதனால் பெண்களுக்கான உரிமைகளை கொடுக்க மறுப்பது
சரியாங்கிறதுதான் என்னோட கேள்வி?
அதைத்தான் நான் குறிப்பிட்டுச் சொன்னேன். மற்றபடி அதுல எனக்கு
எந்த உள் நோக்கமும் இல்லை. இதை பெரிசுபடுத்த வேண்டிய
அவசியமில்லை.

ஆனால் இஸ்லாமியர்கள் தொழுகை நடத்தும் பள்ளி வாசல்களுக்குள்
பெண்கள் அனுமதிப்பதில்லையே! அதைப் பற்றி நீங்கள் பேசாதது ஏன்?
-
ஒரு விஷயத்தை கவனிக்கணும். நான் எந்த மதத்தையும் குறிப்பிட்டுப்
பேசவில்லை. மதங்களில் மட்டும்தான் என்றில்லை. எங்கெல்லாம்
ஆண்களுக்கு நிகராக பெண்களுக்கு சம உரிமை மறுக்கப்படுகிறதோ
அங்கெல்லாம் அதனை பின்பற்றாதது ஏன் என்கிற என்
ஆதங்கத்தைத்தான் வெளிப்படுத்தினேன்.
-
மனிதர்களை உயர்வாக சமமாக நடத்துங்கன்னு தானே அனைத்து
மதங்களும் போதிக்கின்றன. ஆனால் வழிபாடு நடத்தும் போது மட்டும்
ஆண்-பெண் என்கிற வேறுபாடு பார்ப்பது ஏன்?
-
மதத்தின் சட்ட திட்டங்கள் மனிதர்கள் வகுத்தவைதானே. அவற்றை
இந்துக் கடவுளோ, அல்லாவோ, இயேசுவோ உருவாக்கவில்லையே.
-
அப்படியிருக்க இந்த நேரத்தில் மட்டும்தான் ஆண்கள் வழிபாட்டுக்கு
வரணும். பெண்கள் வரக்கூடாதுன்னு எந்த மதத்தின் கடவுளும்
சொல்லவில்லையே. அதனால் கடவுள் சொல்லாத விஷயங்களை
மனிதர்கள் கடைப்பிடிப்பதும் அதன்படி செயல்படுவதும் சரியா
என்பதைத் தான் சற்று அழுத்தமாகக் கேட்டேன். அவ்வளவுதான்.
-
---------------------------------------

-எஸ். அன்வர்
குமுதம்