சாதனை படைத்த எட்வர்ட் ஜென்னர் - நினைவு தின சிறப்பு பதிவு

பல ஆயிரம் பேரின் மரணத்திற்கு காரணமாக இருந்த பெரியம்மை நோயை ஒழித்து, நோய்த் தடுப்பு துறையின் முன்னோடியாக விளங்கிய எட்வர்ட் ஜென்னரைப் பற்றி இந்தக் கட்டுரையில் காண்போம்..!

எட்வர்ட் ஜென்னர், 17-5-1749-ம் நாள் இங்கிலாந்தில் உள்ள பர்க்லி என்னும் சிற்றூரில் பிறந்தார். சிறுவயதிலேயே பெற்றோரை இழந்த ஜென்னர், சகோதரிகளின் ஆதரவில் வளர்ந்தார்.

14-வது வயதில் பள்ளிப் படிப்பை முடித்த ஜென்னர் மருத்துவத் துறையில் பேரார்வம் கொண்டவராக திகழ்ந்தார். இயற்கையை அதிகம் நேசித்த இவர், நோய்களை இயற்கையின் எதிரியாகப் பார்த்தார். ஆகவே ஒரு மருத்துவராகி இயற்கையை பாதுகாக்க வேண்டும் என்ற விருப்பம் அவரது இளம் பருவத்திலேயே அரும்பிவிட்டது.

ஜென்னர் 'டேனியல் லட்லாவ்' என்ற அறுவை சிகிச்சை மருத்துவரிடம் ஆரம்ப கால பயிற்சியை மேற்கொண்டார். 7 ஆண்டுகள் பயிற்சி பெற்று சிறந்த அறுவை சிகிச்சை நிபுணராகத் தேர்ச்சிபெற்றார்.

1770-ம் ஆண்டு லண்டனில் தூய ஜார்ஜ் மருத்துவமனையில் அறுவை சிகிச்சை நிபுணராகவும், உடற்கூறு அறுவை சிகிச்சையாளராகவும் பணியாற்றினார்.

ஜென்னருக்கு இயற்கை மீதிருந்த ஆர்வம் மற்றும் சிறப்பான மருத்துவ பணியின் காரணமாக இங்கிலாந்தின் ராயல் சொசைட்டி உறுப்பினராகப் பரிந்துரைக்கப்பட்டார்.

இயற்கை ஆர்வலரான ஜென்னர் குயில்களின் வாழ்க்கை முறைப் பற்றி ஆய்வு செய்து வெளியிட்டார்.

1788-ம் ஆண்டு கேதரின் கிங்க்ஸ்கோட் என்பவரை திருமணம் செய்து கொண்டார்.

மாரடைப்பு பற்றி முதன் முதலில் ஆராய்ந்து வெளியிட்ட பெருமை ஜென்னரையே சேரும். இவர் 1792-ம் ஆண்டு செயிண்ட் ஆண்ட்ரூஸ் பல்கலைக்கழகத்தில் மருத்துவப் பட்டம் பெற்றார்.

1796-ம் ஆண்டு பெரியம்மை நோய் வராமல் தடுக்க தடுப்பூசி மருந்தை கண்டுபிடித்து சோதனை செய்து வெற்றிகண்டார். அதன்பின் மேலும் பல ஆய்வுகள் செய்து அம்மை நோய் பற்றிய ஆய்வு நூலை வெளியிட்டார்.

இங்கிலாந்து மற்றும் ஜெர்மனியைச் சேர்ந்த செவெல், ஜென்சன், பெஞ்சமின் ஜெஸ்டி, ரெண்டெல், பிளெட் ஆகியோர் ஜென்னருக்கு முன்பாகவே பெரியம்மை நோய்க்கு தடுப்பு மருந்தை கண்டுபிடித்து இருந்தனர். ஆனால் அவர்களுக்கு பிறகு எட்வர்டு ஜென்னர் கண்டுபிடித்து வெளியிட்ட ஆராய்ச்சி முடிவுகளே விளக்கத்துடன் புரிந்து கொள்ளக் கூடியதாக இருந்தது.

'பிரான்சிஸ்கோ சேவியர் டி பால்மிஸ்' என்பவர் உலகெங்கும் சுற்றுப்பயணம் மேற்கொண்டு ஜென்னர் கண்டறிந்த தடுப்பூசி முறையின் மூலமாக பெரியம்மை நோயை ஒழிப்பதை நோக்கமாகக் கொண்டார். இதனால் ஜென்னரின் புகழ் உலகெங்கும் பரவியது.

ஜென்னர் 1808-ம் ஆண்டு தேசிய தடுப்பூசி கழகத்தைத் தோற்றுவித்தார். இவரது கண்டுபிடிப்புக்கு பல்வேறு விருதுகளும், பதக்கங்களும் கிடைத்தன.

பக்கவாத நோயால் பாதிக்கப்பட்ட எட்வர்ட் ஜென்னர் 1823-ம் ஆண்டு தமது 73-வது வயதில் காலமானார். மருத்துவ உலகில் எட்வர்ட் ஜென்னர் என்ற தனி ஒரு மனிதனின் பங்களிப்பு மிக உன்னதமானது என்றால் அது மிகையல்ல.