பக்கத்து இலைக்குப் பாயசம்.

**M.Jagadeesan** · **M.Jagadeesan** Mon Jan 25, 2016 2:40 pm

வரப்பின் மேலே வாடிநின்ற புல்லொன்று
உரக்கச் சத்தமிட்டு உழவனைக் கூப்பிட்டு
"நீரின்றிக் காயும் நெற்பயிரைக் கண்டீரோ?
வேருக்கு நீர்பாய்ச்சி விளைவைப் பெருக்கியே
வேண்டும் மகசூலைப் பெற்றிடுவீர் " என்றதுவே!

கருநிறக் குயிலொன்று காக்கைக் கூட்டினிலே
கள்ளத் தனமாக முட்டை இட்டபின்னர்
"அருமைக் காக்கையே! உந்தன் முட்டைகளை
அடைகாத்தே குஞ்சுகளைப் பொரித்திடுவீர்! " என்றதுவே.

காதலியின் கைகளிலே எதிர்வீட்டுக் குழந்தை
நாதமுடன் குரலெழுப்பி ஓலமிடும் வேளையிலே
"சத்தமிட்டு அழுகின்ற குழந்தையின் கன்னத்தில்
முத்தமொன்று தந்திட்டால் அழுகை நிற்குமென"
பித்தனைப்போல் நானுரைக்க என்னை அவள்நோக்கி
"பக்கத்து இலைக்குப் பாயசம் வேண்டுமென்று
வெட்கம் எதுவுமின்றிக் கேட்கின்ற நீயெல்லாம்
பக்கம் வராதே! தள்ளிப்போ! " என்றுரைத்தாள்.

K.Senthil kumar · K.Senthil kumar Tue Jan 26, 2016 12:26 am

அருமை ஐய்யா ....

வீணாக வாயை கொடுத்து மாட்டி கொண்ட கதையை இவ்வாறு உவமையும் ,நகைச்சுவையும் கலந்து எழுதமுடியும் என்பதை இந்த கவிதையின் மூலம் கற்றுக்கொண்டேன் ஜாலி