உரிமை மீறல் பிரச்சினை: சட்டப்பேரவையில் கருணாநிதிக்கு கண்டனம்

திமுக தலைவர் கருணாநிதி மீதான உரிமை மீறல் பிரச்சினை தொடர்பாக தமிழக சட்டப்பேரவையில் இன்று (வெள்ளிக்கிழமை) விசாரணை அறிக்கை தாக்கல் செய்யப்பட்டது.

தமிழக சட்டப்பேரவையில் கடந்த செப்டம்பர் மாதம் நடந்த வேளாண்மைத் துறை மானியக் கோரிக்கையின்போது, தான் பேசாததை பேசியதாக திமுக தலைவர் கருணாநிதி முரசொலி நாளிதழில் எழுதியுள்ளதாக வேளாண் துறை அமைச்சர் ஆர்.வைத்திலிங்கம் உரிமை மீறல் புகார் அளித்திருந்தார்.

கருணாநிதி மீது நடவடிக்கை எடுக்க வேண்டும் எனவும் அவர் கோரியிருந்தார். அமைச்சரின் இந்தப் புகார் சட்டப்பேரவையின் உரிமைக் குழுவுக்கு அனுப்பப்பட்டது.

இந்நிலையில், உரிமைக் குழுவின் விசாரணை அறிக்கையை புத்தகமாக அச்சிட்டு சட்டப்பேரவையில் இன்று (வெள்ளிக்கிழமை) துணை சபாநாயகர் பொள்ளாச்சி ஜெயராமன் தாக்கல் செய்தார். அந்த அறிக்கையில் திமுக தலைவருக்கு கண்டனம் தெரிவிக்கப்பட்டிருந்தது.

உரிமைக் குழு பரிந்துரைகளை ஏற்றுக்கொள்வதாக அவையில் தீர்மானம் நிறைவேற்றப்பட்டது. பின்னர் பேசிய சபாநாயகர் தனபால், "திமுக தலைவர் கருணாநிதிக்கு இந்த அவை கண்டனம் தெரிவிக்கிறது. இதுபோன்ற தவறுகளில் இனி ஈடுபடக்கூடாது என அவை எச்சரிக்கிறது" என்றார்.

இதற்கு திமுக உறுப்பினர்கள் கடும் கண்டனம் தெரிவித்தனர். சபாநாயகர் இருக்கையை முற்றுகையிட்டு அவர்கள் கோஷங்களை எழுப்பினர். சபாநாயகர் தனபாலுக்கு எதிராக கோஷங்கள் எழுப்பினர். உரிமைக் குழு அறிக்கை நகல்களை கிழித்தெரிந்தனர்.
-
தமிழ் தி இந்து காம்

இதனையடுத்து, தமிழக சட்டப்பேரவையில் இருந்து திமுக உறுப்பினர்களை வெளியேற்ற சபாநாயகர் உத்தரவிட்டார். திமுகவினர் அனைவரும் வெளியேற்றப்பட்டனர்.

உரிமைக் குழு அறிக்கை மீது விவாதம் நடத்த வேண்டும் என மார்க்சிஸ்ட் கம்யூனிஸ்ட் கட்சியினர் வலியுறுத்தினர். ஆனால், அறிக்கை மீது தீர்மானம் நிறைவேற்றப்பட்டுவிட்டதால் விவாதிக்க அனுமதி கிடையாது என கோரிக்கையை நிராகரித்தார் சபாநாயகர்.