சபரிமலையில் பெண்களுக்கு தடை: பொதுநலன் வழக்கை திரும்ப பெற முடியாது- உச்ச நீதிமன்றம்

-


சபரிமலை கோயிலில் பெண்கள் நுழைவதற்கு விதிக்கப்பட்டுள்ள
தடை தொடர்பாக தொடரப்பட்டுள்ள பொதுநலன் வழக்கை
திரும்ப பெற முடியாது என உச்ச நீதிமன்றம் கூறியுள்ளது.

பருவம் அடையாத சிறுமிகளும், மாதவிலக்கு பருவத்தைத் தாண்டிய
பெண்களும் மட்டுமே சபரிமலை ஐயப்பன் கோவிலில் தரிசனம்
செய்ய முடியும் என்பது மரபு ரீதியாக கடைப்பிடிக்கப்படும் வழக்கம்.

இந்நிலையில், அனைத்து தரப்பு பெண்களுக்கும் வழிபாட்டு
அனுமதியை வழங்க உத்தரவிடக் கோரி இளம் வழக்குரைஞர்கள்
கூட்டமைப்பின் சார்பில் உச்ச நீதிமன்றத்தில் பொதுநல வழக்கு
தொடுக்கப்பட்டுள்ளது.

இந்த வழக்கு, உச்ச நீதிமன்ற நீதிபதிகள் தீபக் மிஸ்ரா, என்.வி.ரமணா
ஆகியோர் அடங்கிய அமர்வு முன்பு சில நாள்களுக்கு முன்பு
விசாரணைக்கு வந்தது.

அப்போது, சபரிமலையில் பெண்களுக்கு அனுமதி மறுக்கப்படுவது ஏன்?
என்று நீதிபதிகள் கேள்வி எழுப்பினர். மேலும், சபரிமலை அனைவருக்கும்
பொதுவான கோயிலாகும். இங்கு வழிபாடு நடத்த அனைவருக்கும்
உரிமை உண்டு. எனினும், இதற்கு மத ரீதியாக (பிற மதத்தினருக்கு
அனுமதி மறுப்பு) கட்டுப்பாடுகள் இருக்கலாம்.

ஆனால், பொதுவான கண்ணோட்டத்தில் கட்டுப்பாடுகளை விதிக்க
முடியாது.மேலும், பெண்களுக்கு அனுமதி மறுக்கப்படுவதற்கு அரசமைப்புச்
சட்டத்திலும் இடமில்லை. அதேவேளையில், சபரிமலையில் பெண்களுக்கு
அனுமதி கிடையாது என்ற மரபு கடந்த 1,500 ஆண்டுகளாக கடைப்
பிடிக்கப்படுகிறதா? என்பதை கேரள அரசு உறுதி செய்ய வேண்டும் என
கூறியிருந்தனர்.

இந்நிலையில் இந்த பொதுநலன் வழக்கை தொடுத்த அமைப்பின் தலைவர்
நௌஷத் அகமது, பொதுநலன் வழக்கை திரும்ப பெறுவதாக உச்ச
நீதிமன்றத்தில் இன்று கூறினார். இந்த வழக்கை தாக்கல் செய்ததது முதல்
தனக்கு 500 தொலைபேசி மிரட்டல்கள் வருகிறது என்றார்.

இதை விசாரித்த நீதிபதிகள் தீபக் மிஸ்ரா, என்.வி.ரமணா ஆகியோர்
ஒரு பொது நலன் வழக்கு தொடுக்கப்பட்டு, விசாரணைக்கு ஏற்றுக் கொள்ளப்
பட்டால், அதை திரும்ப பெற முடியாது என்றனர்.

மேலும், இந்த வழக்கில் நீதிமன்றத்துக்கு உதவி செய்வதற்காக தேவைப்
பட்டால் ஓர் ஆலோசகர் நியமிக்கப்படுவார். பெண்களுக்குரிய உரிமை
குறித்த இந்த வழக்கை இவ்வாறு திடீரென்று திரும்ப பெற முடியாது
என்றனர்.
-
-------------------------------------
தினமணி