ஒய்யார ஒகாபி!

-
ஆப்ரிக்கக் காடுகளில் மட்டுமே காணப்படும் தனிச்சிறப்பான விலங்குதான் ஒகாபி. பார்ப்பதற்கு வரிக்குதிரை போல் தோற்ற மளிக்கும் ஒகாபி, ஒட்டகச்சிவிங்கியின் நெருங்கிய உறவாகும். ஒகாபி பற்றிய சுவையான தகவல்கள் சில: சாக்லெட் வண்ணத்தில் அழுத்தமான காவி நிற உடலுடன், பின்புறமும், முன்னங்கால்களிலும் வரிக்குதிரை போல கோடுகளுடன், சிறிய கழுத்துடைய ஒட்டகச்சிவிங்கி போல் தோற்றமளிக்கும் காட்டு விலங்குதான் ஒகாபி. இது ஆப்ரிக்காவின் காங்கோ நாட்டுக் காடுகளில் அதிகம் காணப்படுகிறது.
—
ஒட்டகச்சிவிங்கியின் மூதாதையர்களில் உயிரோடு இருக்கும் இரண்டு இனங்கள், ஒட்டகச்சிவிங்கியும் ஒகாபியும் மட்டுமே! இவை இரண்டும் ஜிராஃபிடே (Giraffidae) என்ற குடும்பத்தைச் சேர்ந்தவை. வழுவழுப்பான வெல்வெட் போன்ற ரோமம் கொண்ட ஒகாபி, இரண்டரை மீட்டர் உயரம் வரை வளரும். இதன் எடை 200 முதல் 350 கிலோ வரை இருக்கும். ஆணைவிட பெண் ஒகாபியே உருவத்தில் பெரியதாக காணப்படும். நீண்ட தலையில் கருப்பு முகவாயுடன், பெரியக் கருப்புநிற கண்களும், நீண்ட செவியும் கொண்ட ஒகாபி, மிகுந்த நாணம் கொண்ட விலங்காகும்.
—
இதன் கருமை நிற நாக்கு 18 இஞ்சுகள் நீளமுடையது. நாக்கால் இரு கண்களையும், காதுகளையும் தொட்டுவிடும். இலை தழைகளைப் பறித்து உண்ணும்போது, பற்றிப் பிடித்துக்கொள்ள ஏதுவாய் இதன் நாக்கு விளங்குகிறது. ஆண் ஒகாபிக்கு மட்டுமே முக்கால் அடி நீளமுள்ள கொம்புகள் உண்டு. ரோமத்தால் மூடப்பட்ட இந்த கொம்புகளின் பெயர் ஆசிகோன்ஸ் (Ossicones) ஆகும். பெண் ஒகாபிக்கு கொம்புகள் கிடையாது. காங்கோ நாட்டின் தென், வட, மத்திய காடுகளில் ஒகாபிகள் வாழ்கின்றன. தாவர உண்ணியான ஒகாபி, இலைகள், பழங்கள், புற்கள், கொடி, பூஞ்சை ஆகியவற்றை உண்ணும். மாலை நேரங்களில்தான் ஒகாபி சுறுசுறுப்பாக இயங்கும். இரையைத் தேடி ஒருநாளில் 2.5 மைல் தூரம் வரை நடக்கும்.
–
பசுவைப்போல் அசைபோடும் விலங்கு இது. விழுங்கிய உணவை மீண்டும் வாய்க்கு கொண்டுவந்து மென்று தின்னும். தாவரங்களை மட்டுமே உண்பதால் ஏற்படும் தாதுக் குறைபாட்டுக்காக ஒகாபி ஆற்றங்கரையில் காணப்படும் கந்தகத்தன்மை கொண்ட களிமண்ணை உண்ணும் வழக்கம் கொண்டது. ஒகாபிக்கு அபாரமான கேட்கும் திறனும், மோப்ப சக்தியும் உண்டு. ஒகாபியை உயிர் வாழும் பாறைப்படிமம் (living fossil) என்று ஆராய்ச்சியாளர்கள் குறிப்பிடுகின்றனர். ஏனென்றால் இந்த இனம் புவியியல் கால அளவின்படி நெடுங்காலமாக வாழ்ந்து வருகிறதாம். இதன் புறத்தோற்றமும் முற்காலத்திய விலங்குகளின் வடிவங்களை ஒத்திருக்கிறதாம்.
–
ஆப்ரிக்க மக்கள் பல ஆண்டுகளுக்கு முன்பிருந்தே ஒகாபியின் தோலுக்காகவும், மாமிசத்திற்காகவும் வேட்டையாடி வந்திருக்கின்றனர். ஆனால், 1900ம் ஆண்டு வாக்கில்தான் மேற்குலகம் ஒகாபியைப் பற்றி அறிந்துகொண்டது. பின்பு உலகம் முழுவதுமுள்ள உயிரியல் பூங்காக்களுக்கும், சரணாலயங்களுக்கும் ஒகாபியைக் கொண்டு சென்றுள்ளனர். ஒகாபியின் கர்ப்பகாலம் 14-16 மாதங்கள். ஒரு பிரசவத்தில் ஒரு குட்டியே போடும். பிரசவ நேரம் நெருங்கும்போது, தாய் ஒகாபி அடர்ந்த காட்டுக்குள் ஒளிந்துகொள்ளும். குட்டி பிறந்த சில வாரங்களுக்கு இலை தழைகளுக்குள் ஒளித்து வைத்திருந்து பால் கொடுத்து வளர்க்கும்.
–
இதன் ஆயுட்காலம் சராசரியாக 20 முதல் 30 ஆண்டுகள். ஒகாபியின் முக்கிய எதிரி சிறுத்தைப்புலி. மனிதனும் இதன் பெரிய எதிரியே! காடுகள் அழிந்து வருவதாலும், வேட்டைக்காரர்களாலும் நோய்த் தாக்குதல்களாலும் ஒகாபி இனம் அழிவின் விளிம்பில் உள்ளது. 1900களில் 45,000 எண்ணிக்கையில் இருந்த ஒகாபி, தற்போது சுமார் பத்தாயிரமாகக் குறைந்துவிட்டது.
– ஏ.ஹம்ஸத், கீழக்கரை.
குங்குமம்