சவுதியில் ஒரேநாளில் 47 பேருக்கு மரண தண்டனை நிறைவேற்றம்

**கார்த்திக் செயராம்** · 29/10/2015

சவுதி அரேபியாவில் நேற்று மட்டும் 47 பேரின் தலைகளை துண்டித்து மரண தண்டனை நிறைவேற்றப்பட்டதாக அந்நாட்டின் உள்துறை அமைச்சகம் அறிவித்துள்ளது.

சவுதி அரேபியாவின் பிரபல ஷியா முஸ்லிம் இனத்தவர்களின் தலைவரான ஷேக் நிம்ர் அல்-நிம்ரிட்ஸ் மற்றும் 2003-2006-ம் ஆண்டுகளுக்கு இடையில் சவுதியில் தீவிரவாத தாக்குதல்களை நடத்திய அல் கொய்தா தீவிரவாதிகள் 46 பேருக்கு இவ்வாறு மரண தண்டனை நிறைவேற்றப்பட்டதாக தெரியவந்துள்ளது.

சவுதி வரலாற்றிலேயே அதிகபட்சமாக கடந்த 1995-ம் ஆண்டு 192 பேரின் தலைகளை துண்டித்து மரண தண்டனை நிறைவேற்றப்பட்டது. கடந்த (2015) ஆண்டில் மட்டும் 157 பேருக்கு இதைப்போல் தலையை துண்டித்து மரண தண்டனை நிறைவேற்றப்பட்டுள்ளது.

பிரபல ஷியா முஸ்லிம் இனத்தவர்களின் தலைவரான ஷேக் நிம்ர் அல்-நிம்ரிட்ஸ்க்கு விதிக்கப்பட்ட மரண தண்டனையை இரத்து செய்ய வேண்டும். அவருக்கு தண்டனை நிறைவேற்றப்பட்டால் சவுதி அரசு தேவையற்ற எதிர்விளைவுகளை சந்திக்க வேண்டி இருக்கும். அதற்கு பதிலாக மிகப்பெரிய விலையை தர வேண்டியதாகிவிடும் என ஷியா ஆதரவு நாடான ஈரான் முன்னர் எச்சரித்திருந்தது.

அந்த எச்சரிக்கையை பொருட்படுத்தாத சவுதி அரசு நேற்று ஷேக் நிம்ர் அல்-நிம்ரிட்ஸ்-க்கும் மரண தண்டனையை நிறைவேற்றியுள்ளது, குறிப்பிடத்தக்கது.

இந்நிலையில், ஈரான் தலைநகரான டெஹ்ரானில் உள்ள சவுதி தூதரகத்தின் முன்னால் இன்று அதிகாலை போராட்டம் நடத்தியவர்கள், பெட்ரோல் குண்டுகளை வீசி தாக்குதல் நடத்தியுள்ளனர்.

இதனால், மத்திய கிழக்கு மற்றும் அராபிய தீபகற்பம் பகுதி மட்டுமின்றி அமெரிக்கா, இங்கிலாந்து, ஐரோப்பா உள்ளிட்ட மேற்கத்திய நாடுகளில் வாழும் ஷியா பிரிவினருக்கும், சன்னி பிரிவினருக்கும் இடையில் வகுப்புவாத மோதல்கள் ஏற்படலாம். இதன்விளைவாக, மத்திய கிழக்கு மற்றும் வளைகுடா நாடுகளில் அமைதி சீர்குலைந்து, பதற்றம் ஏற்படக்கூடும் என அமெரிக்கா கவலை தெரிவித்துள்ளது.

இதுதொடர்பாக, அமெரிக்க வெளியுறவுத்துறை செய்தி தொடர்பாளர் ஜான் கிர்பி இன்று வெளியிட்டுள்ள அறிக்கையில், மனித உரிமைகளுக்கு மதிப்பளித்து, பாதுகாக்க சவுதி அரசு முன்வர வேண்டும். அதிருப்தியை அமைதியான முறையில் வெளிப்படுத்த அனுமதி அளிக்கப்பட வேண்டும். பிராந்தியத்தில் நிலவிவரும் பதற்றத்தை தணிப்பதற்கு அங்குள்ள அனைத்து தலைவர்களும் இருமடங்கு முனைப்புடன் செயல்பட வேண்டும் என குறிப்பிடப்பட்டுள்ளது.

நன்றி பிபிசி தமிழ்